Kutendeka 42
42
Bakuluube kwa Yusufu baya kusita bilio ku Misri
1Yakobo lu-aamanine nangue bilio bili ku Misri, waabaanine baana bakue nangue, “Mwe baana, ale mukentaniineki? 2#Mii 7.12Nene nakyunvua nangue ku Misri bilio kubili. Kansi kookeleko muye mutusitileko, evi tekuti tufue na nzala.” 3Kupwako, bakuluube lyanondo bakua Yusufu bakookelako baya ku kusita nghano. 4Inzi Yakobo taamutumineko Benyamina mwalawakue kwa Yusufu pantu waali watiina nangue pange kuti wakitikilua na kibiipile.
5Baizraeli baile pamo ni bange bantu ku kusita bilio ku Misri pantu mu kyalo kya Kanaani nzala yaali yakilile. 6Ozo musita, Yusufu waali wali ndabukizi wa kyalo, kabili i waali wasisia bilio ku bantu bonse ba mu byalo. Bakuluube kwa Yusufu baizile kumufukamina ni kulaala kyuba. 7Yusufu lu-ainikile nangue ni bakuluube, waabambile kulanda nabo wasasile nga asibenikile. Waabeepuziizie evi, “Mufumine pi?”
Baamwasukile nangue, “Fwefue tufumine ku kyalo kya Kanaani. Twizile kono ku kusita bilio.”
8Anzia kine Yusufu waabenikile, bene tebaamwinikile. 9#Kut 37.5-10Yusufu waalangulukile bilooto bi-aali waloota. Waabaanine evi, “Mwemue muli nengu. Mwiziile sie kumona bunake bwa kyalo.”
10Baakeene balanda nangue, “Ata we mukulu, fwefue tuli babombi bobe, twiziile sie kusita bilio. 11Fwefue tuli bena umo, tetuli nengu. We mukulu, fwefue tuli bantu ba kisinka.”
12Yusufu waabaanine evi, “Tekukaane, mwemue mwiziile kulengula bunake bwa kyalo.”
13Baalandile evi, “Fwe babombi bobe twaavyelue lyanondo ni babili, baana bena muntu umo wa mu kyalo kya Kanaani, mwalawetu wa mpeleezio asyele na situe, ni unge umo talipo.”
14Yusufu waalandile evi, “Mwemue muli nengu, nga munamyaninanga. 15Ni pakako, namilapila mu liina lyakua Farao nangue mupalile kweziiwanke. Kine mwalawenu tanamoneke pano temukapeelua nsambu ya kubwelela kwenu. 16Tume umo pakati kenu wakuti aye amutwame mwalawenu, ni mwe bange musyale mwakakilue mpaka lwakaba kusininkiziwa bintu bimwalanda. Inzi kulanda kisinka ntanzi yakua Farao mwemue muli nengu.” 17Kupwako, wabakaka bonse mu buloko nsiku itatu.
18Busiku bwa butatu Yusufu waabaanine evi, “Kite bindikumyana mukeeza kufua pantu nene ndinatiina Leza. 19Kine muli bantu ba kisinka, mukwenu umo asyale wakakilue molia mu buloko mumukakilue, inzi mwe bange endo mutwale bilio bya kupwisia nzala kwenu. 20Mukabe kumuleeta mwalawenu pano evi nkabe kusininkizia nangue bulanzi bwenu ni bwa kisinka. Kine mukabe kukita evio nsikaba kumiipaya.”
Ni bo baakitile evio. 21Baalanzyaniizie nangue, “Emwe, kisinka tulubile pantu twaakeene kunvwila mwalawetu nkumbu lu-aali watupaapaata. Keki i kitwaingilila mu aza maavia.”
22 #
Kut 37.21-22
Rubeni waalandile evi, “I kalia kanaamyanine nangue tekumukitile kibiipile, inzi mwe mwaakeene. Te mwamona! Mulopa wakue ulimukukebua pali fwefue.” 23Tebaamanine nangue Yusufu waabenikile pantu waali walanda nabo kupitila mu muntu waali walondolola bulanzi bwabo. 24Yusufu lu-aafumine papo pa baali, waatendekele kulila. Lu-aabweleelepo kabili, waamukwete Simeoni wamukaka ni bonse bamwene.
Bakuluube kwa Yusufu babwelela ku Kanaani
25Yusufu wa-anine bantu babeezuziizie bilio mu masaaka ni kubabiikilamo nfolanga yabo, kabili babapailile ni mpamba ya mu nzila. Evi i vibaabakitiile. 26Baaseziizie masaaka abo pa punda. Kupwako, babamba kuya. 27Lubaafikile pa nkendo ya kuti balaale, umopo waakakwile lisaaka lyakue abuulemo bilio bya kuliisia punda wakue, waamwene nfolanga yakue yali mukati. 28Waabaanine benakue nangue, “Emwe, ize mumone nfolanga yane inabweziiziwanga ezi ili momu mu lisaaka lyane.” Bonse baabambile kukwaka na mwezo balanda nangue, “Ni kiki keki kyatukitilanga Leza?”
29Lubaile kufika kuli sibo Yakobo ku kyalo kya Kanaani, baamubwilile byonse byaabakitikiile nangue, 30“Ozo mukulu wa kekio kyalo waali walanda wasasile sana kuli fwefue, kabili waali walanda nangue, ‘Tuli nengu ya kyalo.’” 31Twaamwanine, “We mukulu, fwefue tetuli nengu, inzi tuli sie bantu ba kisinka. 32Fwefue tuli benenke baana lyanondo ni babili bena situe umo. Mwana umo talipo, mwana mukala wene asyele ku kyalo kya Kanaani kuli situe.” 33Ozo mukulu wa kyalo wakitwana evi, “Pakuti nsininkizie nangue mwemue muli bantu ba kisinka, umo pakati kenu alikusyala kono, inzi bange babwelelemo ni bilio pantu kuli nzala. 34Endo mumutwame mwalawenu mumuleete, mane nkabe kusininkizia nangue temuli nengu, kabili mane nkabe kumibweziizia muntu wenu. Kabili ni mwe mwaakaba mwasuluzia mu keno kyalo.”
35Bonse lubaapongwele bilio mu masaaka abo, kubalua muntu waamwene kafunda kakue ka nfolanga mu lisaaka. Baana bonse pamo ni sibo lubaamwene evio, baatiinine. 36Sibo Yakobo waabaanine evi, “Mwemue mulimukun'mpwila baana bane! Yusufu talipo, ni Simeoni talipo, kabili evi mulimukukeba mumutwame ni Benyamina! Ena we lyemo!”
37Rubeni waamwanine se, “We tawe, kine nsikakubweziizia ozu mwana obe, ukepailemo baba baana bane babili. N'mpeele, ni ne nakaba kumubwezia”
38Waalandile evi, “Ata, ozu mwana wane wene temuya nakue. Unvue, mukuluube waafwile, ozu i wenka asyelepo sie. Pa-akaba kukitikilua na kibiipile mu nzila, nga mwakaba kunengia kufua na kikonko kya mu bukote bwane.”
Iliyochaguliwa sasa
Kutendeka 42: KBTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kitaabua New Testament @The Word For The World Southern Africa. 2023.