Kutendeka 40
40
Yusufu walondolola bilooto bya bakakua nakue
1Bebi byonse lubyaapitile, muntu waali wapeelue nsambu ya kupeela likolo divai, ni olia kaapika wa mikate baamuluviizie Farao, likolo wa ku Misri. 2Farao waabafiitiilue babo babiloolo babili, mukulu wa balia bapeelue nsambu ya kupeela likolo divai, ni mukulu wa bakaapika ba mikate. 3Waabatumine kuya kusungua mu buloko mu nghanda ya mukulu wa bakalinda, momo mwaali mwakakilue Yusufu. 4Mukulu wa buloko waamwanine Yusufu kuti aye wali mubombi wa babo babiloolo babili. Waabasuungile, ni bo baikeelemo musita uniini.
5Busiku bumo busiku, babo bakakua babili, mukulu wa bakateania ba divai ni mukulu wa bakaapika ba mikate baali babombela likolo wa ku Misri, kubalua muntu waalootele kilooto kyaali ni ndubulwilo iibeeleele. 6Yusufu lu-aile kubamona lukeelekeele, waabamwene baali ni bulanda. 7Waipuziizie balia babiloolo babili bakua Farao baali bakakilue pamo nakue mu nghanda yakua Potifari nangue, “Ale lelo mumwenekeeleki mwali ni bulanda?”
8Baamwasukile nangue, “Fwefue twalootanga kubalua muntu kilooto kyakue, ni evi tetuli na muntu wa kutulondolwela.”
Yusufu waabaanine evi, “Eba, Leza te i ali ni buvinde bwa kulondolola bilooto? Ale n'mbwile vimwalootanga.”
9Mukulu wa bakateania ba divai waamwanine Yusufu kilooto kyakue, “Nene nalootanga muzabibu waimeene ku ntanzi yane. 10Ku ozo muzabibu kwakiba misambo itatu. Penka papo maani atomba kale, buluba ni bo bwatoota, ni bisansa bya mizabibu ni byo byapia. 11Namonanga nakwete kikombe kyakua Farao, nabuula mizabibu, nafininamo ni kuya kumupeela Farao.”
12Yusufu waalandile evi, “Elia misambo itatu, i nsiku itatu. 13Nsiku itatu paikaba kupua, Farao wakaba kukufumia mu buloko, ni kukubweziizia mwilo obe u waali wabomba. Wewe wakaba kumupeela Farao kikombe kya divai mu minue nga viwaali wamupeela pa mambo luwaali wali kateania wa divai. 14Inzi ukaananguluke paukapaalua, kabili tekukalaba kunandilako kuli Farao evi ni nene nkakakulue mono mu buloko. 15Pantu kisinka lunaali ku kyalo kyetu kya Baebrania, naibilue. Kabili ni mono mwenka mu Misri nkakilue mu buloko tekuba nali na mulandu.”
16Mukulu wa bakaapika ba mikate lu-aunvwile ndubulwilo ya kilooto yaweme, waamwanine Yusufu nangue, “Ni nene wenka nalootanga naitwikile bipanda bitatu bya mikate. 17Mu kipanda kya pa muulu mwaba mwali bilio byapikilue bya misango ilekekeene byakua Farao, mu kekio kipanda mwakookelanga tooni twaizanga kulia ezio mikate.”
18Yusufu waamwanine evi, “Ndubulwilo ya kilooto ni ezi: Bipanda bitatu i nsiku itatu. 19Nsiku itatu paikaba kupua, Farao wakaba kuputula mutue ni kukulika mubili obe ku kimuti evi tooni tukabe ku kulia.”
20Busiku bwa butatu bwa nsikunkulu ya kuvyalua kwakua Farao, Farao waabatebetele babombi bakue bonse. Mukulu wa bakateania ba bya kumina ni mukulu wa bakaapika ba mikate baakakwilue ni kuleetua pa ntanzi yakua Farao, ni pa ntanzi ya babombi bakue. 21Mukulu wa bakateania ba bya kumina waabweziiziwe pa mwilo wakue, evi atendeke kumutwalila Farao kikombe. 22Inzi mukulu wa bakaapika ba mikate waakulikilue. Byonse byaakitikile nga mwaalandiile Yusufu. 23Inzi mukulu wa bakateania ba bya kumina taamulangulukile Yusufu. Waamulabile.
Iliyochaguliwa sasa
Kutendeka 40: KBTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kitaabua New Testament @The Word For The World Southern Africa. 2023.