Kutendeka 37
37
Yusufu ni bakuluube
1Yakobo waatwaliliile kwikala mu kyalo kya Kanaani, momo mwaali mwaikeele se nga mweni. 2Lyasi lyakua Yakobo ni leli.
Yusufu lu-aali wakili na myaka lyanondo ni kilooba, waali wasunga mikooko ni mbuzi, kabili waali wali pamo ni bakuluube bena Biliha ni Silipa, bakazi bakua Yakobo. Yusufu waile kumubwila se bintu bibiipile byaali byakita bakuluube.
3Inzi Izraeli waali wamutoneesie Yusufu kukila bange baana bonse pantu waali mwana wa mu bukote, kabili waamukitiile nkanzu ya mikumino ilekenkeene. 4Bakuluube lubaamwene nangue Yusufu waali watonenue kukila bange bonse, baamusuulile sana mpaka balekela ni kulanda nakue bwino bwino.
5Busiku bumo Yusufu waalootele kilooto kimo. Lu-aile kubwilako bakuluube kilooto kyakue, baakilile kumusuula. 6Yusufu waalandile evi, “Emwe, unvue kilooto kinalootanga. 7Twile twalimukukaka bisi bya nghano mu bukaba, kisi kyane kyabuukanga ni kwimana misiki, inzi bisi byenu byaimananga byazyungulukiile kisi kyane ni kukikontamina.”
8Bakuluube baamwipuziizie evi, “Eba, umwene nangue wewe i wakaba kututeeka ao kuya wali ni buvinde pali fwefue?” Kabili baakilile sie kumusuula pa mulandu wa bilooto byakue ni pa mulandu wa bintu bi-aali walanda.
9Kabili Yusufu waalootele ni kinge kilooto ni kubabwila bakuluube nangue, “Emwe, kabili nalootanga ni kinge kilooto. Namonanga koba ni kwezi pamo ni ntanda lyanondo ni lumo byankontamina.”
10Inzi lu-aabwilileko se pamo ni bakuluube, se waamusasiliile wamwana nangue, “Eba, i kilooto kya musangoki keki kiwalootanga? Ulangakeene nangue noko ni nene pamo ni bakuluubo bonse twaakeeza kukukontamina?” 11#Mii 7.9Bakuluube kwa Yusufu baamunvwiliile sana bunkua, inzi se waatwaliliile sie kuya walangakana palua bebio bilooto.
Yusufu wasisiiwa
12Busiku bumo bakuluube baile ku Sekemu ku kusunga mikooko yakua sibo. 13Izraeli waamwanine Yusufu, “Unvua, bakuluubo balimukusunga mikooko ku Sekemu.” Ale iza nkutume uye wayako.
Yusufu waalandile evi, “We tawe, kili sie bwino, kuti naya.”
14Se waamwanine evi, “Ale endo waya umone kine bakuluubo bakosele, uye umone ni mikooko kine ili bwino, mane uye wize un'mbwile.”
Evi i vyaatuminue Yusufu na se kufuma mu lulambe lwa Hebroni kuya ku Sekemu. 15Muntu umo waamusangile walimukwenda mu kisonso. Ozo muntu waamwipuziizie Yusufu, “Ewe, ulimukukebaki?”
16Yusufu wa-asukile evi, “Ndimukukeba bakuluamwine. Kuti wanangilila kubalimukusungila mikooko yabo?”
17Ozo muntu waamwanine evi, “Pano baafumangapo kale, pantu naunvwanga balimukulanda nangue, ‘Twende ku Dotana.’” Kupwako, Yusufu wabakonka ni kuya kubasanga ku Dotana.
18Bakuluube baamumwene walimukwiza lwa kule. Lu-aali tanafike papo pa baali, baunvwene kuti bamwipaye. 19Baalandile evi, “Mone kaloota wa bilooto olia alimukwiza! 20Ale tumwipaye ni kumupooza mu kiina kimo kya pa biina. Twaya tulande sie nangue bamwipayanga na kinama, evi tumone kine bilooto byakue byaakakitaki.”
21Rubeni lu-aunvwile balanda evio, waamupokolwele walanda nangue, “Emwe, tekuti tumwipaye, 22tekumukisie, inzi mupooze sie mu keki kiina kili mono mu kaseeba pasili kumukita kantu.” Mapange akua Rubeni aali a kuti aye eze amutwame ni kumutwala kuli se. 23Yusufu lu-aafikile papo paali bakuluube, baamuvuulile nkanzu yakue ya mikumino ilekenkeene i-aali wavwele, 24bamutwama ni kuya kumupooza mu kiina kyaali kyakaminemo menda.
25Lubaikeele kuti balie, baamwene libumba lya Baisimaeli basulu pamo ni nghamia yabo, baali batweme manukato ni zeri ni manemane balimukukookela ku Misri. 26Yuda waabaanine bakuluube, “Emwe, unvue! Kine twamwipaya mwalawetu ni kuzuumia mulopa wakue tulikunonkapoki? 27Nene namona sie kuti tumusisie ku Baisimaeli pasili kumukisia pantu ni mwalawetu, kabili tuli sie nakue mubili umo ni mulopa umo.” Ba kwakue baamwitabiizie. 28#Mii 7.9Basulu ba Bamidiani lubaali balimukupita lya papo, bakuluube baamufumiizie mu kiina ni kumusisia ku Baisimaeli na nfolanga 20. Babo bantu baamutweme ni kuya nakue ku Misri.
29Rubeni lu-aabwelele ni kusanga Yusufu tekuba wali mu kiina, waunvwile bulanda bukata ni kuzabula ngubo yakue. 30Waile kwaali kwali balabakue ni kubaana nangue, “Emwe, Yusufu mu kiina talimo! Ndikukita syani?”
31Baabuulile nkanzu ni kutubia mu mulopa wa kapwata kabaipaile. 32Baatweme nkanzu ya mikumino ilekenkeene ni kuya kumutwalila sibo balanda nangue, “We tawe, twatoolanga ezi ngubo! Monanke kine ni yakua mwana obe ao abe.”
33Se wainikile ni kulanda nangue, “Ezi ni ngubo yakua mwana wane, waliiwanga na kinama. Kisinka Yusufu waazanghununwanga bipusa bipusa!” 34Yakobo waazabwile ngubo yakue ni kuvwala lisaaka mu kitungu. Waamulilile mwana wakue nsiku ingi. 35Baana bakue bonse, balalume pamo ni banakazi, baile kumutalazia, inzi wene waakeene kutalaziwa. Waalandile evi, “Nakaana. Nene nakaba kufua nalimukulila ni kuziikua pepi ni mwana wane.” Ni pakako, waatwaliliile sie kumulila mwana wakue Yusufu.
36Balia Bamidiani baile kumusisia Yusufu ku Misri kuli Potifari kiloolo wakua Farao, kabili i waali kiloolo wa bakalinda.
Iliyochaguliwa sasa
Kutendeka 37: KBTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kitaabua New Testament @The Word For The World Southern Africa. 2023.