Kutendeka 29
29
Yakobo wafika kuli Labani
1Yakobo waatwaliliile mu lwendo lwakue ni kuya kufika mu kyalo kya bantu ba ku kabanga. 2Waamwene kiina kya menda mu bukaba pamo ni bisepe bitatu bya mikooko yaali yaleele mumbali. Bebi bisepe byaali byanwinsiiwa menda pa kekio kiina kya menda, ni po paali patupikilue libue likata. 3Bisepe byonse lubyaali byaiza pa kumina menda, basungi baali batupukulapo libue pakuti mikooko imine menda. Luyaali yapua kumina, kabili basungi baali batupikilapo.
4Yakobo waabeepuziizie basungi, “Ati mwe ba kwane, muli ba kupi?”
Baamwasukile nangue, “Fwefue tuli ba ku Harani.”
5Waabeepuziizie evi, “Mumumanine Labani mwinzikulu wakua Nahori?”
Baamwasukile nangue, “Ee, tumumanine.”
6Kabili waabeepuziizie evi, “Ati, Labani akosele?”
Ba-asukile evi, “Ee, akosele, ni Rakeli mwana wakue mwanakazi olia alimukwiza ni mikooko.”
7Yakobo waalandile evi, “Emwe, mone kakili koba, ono te musita wakukolonghania mikooko ni kwinwinsia menda. Ale nwinsie mikooko mwitwale ku kulia bikusi.”
8Baamwanine evi, “Ata, tetuvinda kunwinsia kale ezi mikooko inge luisinakolonghaniwe. Mpaka ni inge ileetuenke mane tutupukule keki kilibue ni kwinwinsia.”
9Yakobo lu-aali wakilimukulanda nabo, Rakeli waafikile ni mikooko yakua se pantu wene i waali musungi. 10Yakobo lu-aamwene Rakeli mwina Labani ndumeze kwa nghina, ni mikooko yakua mwinzioye, waile pa kiina kya menda ni kutupukulapo kilibue. Kupwako, wabamba kunwinsia mikooko yakua mwinzioye. 11Yakobo waamukumbatiile Rakeli ni kutendeka kulila wa-angwile. 12Yakobo waamwanine Rakeli nangue, “Nene ndi wa mu lupua lwakua so, kabili ndi mwina Rebeka.”
Penka papo, Rakeli waya kale lubilo aye amubwileko se. 13Labani lu-aunvwile sie nangue mwipua wakue waiza, waile kumusensekela wali lubilo. Luamusangile, waamukumbatiile. Kupwako, waingila nakue mu nghanda yakue, ni Yakobo waamulondolwela Labani byonse byaakitikile. 14Labani waalandile evi, “Kisinka wewe uli lupua lwane, kabili tuli mubili umo ni mulopa umo.” Yakobo waikeele koko mwezi walingi.
Yakobo waufiiwa Lea ni Rakeli
15Labani waamwanine Yakobo nangue, “Anzia kine uli mwipua wane, nsivinda kukubombia sie kya mpuni. Landa nsazio in'mpalile kuya nakusazia.” 16Labani waali wali na baana babili bakazyana. Mukulu waali wakuutua Lea, ni mwanike waali wakuutua Rakeli. 17Menso akua Lea aali atope, inzi Rakeli waali waweme mubili ni lukebu.
18Yakobo waamutonene Rakeli. Waamwanine Labani nangue, “Naakakubombela myaka kilooba pa mulandu wakua Rakeli mwana obe mwanike.”
19Labani waalandile evi, “Ee, kuti kyawama kukupeela wewe kukila unge. Ikala nane pamo.” 20Yakobo waabombele myaka kilooba pa mulandu wakua Rakeli. Inzi yaamwenekele sie nga nsiku iniini pantu waali wamutoneesie.
21Yakobo waamwanine Labani, “N'mpeele Rakeli abe mukazi wane, ndaale nakue pantu nsiku yane yakumana.” 22Ni pakako, Labani waateaniizie matebeto ni kukupa bantu ba mu muzi. 23Musita wa kyungulo, waamutweme Lea ni kumutwalila Yakobo, ni ye waleele nakue. 24Labani waabuulile mubombi wakue mukazyana liina lyakue Silipa ni kumupeela Lea kuti aye wali mubombi wakue. 25Lubwaakiile, Yakobo wainikile nangue waufiiziwe Lea. Yakobo waamwipuziizie Labani, “We mwinzio, ni syani? Ne naabombeele kuufiwa Rakeli. Ale wakin'mbeepelaki?”
26Labani wa-asukile evi, “Kono kwetu tetuli na mibeele ya kuufianke mwanike kine mukulu tanaupue. 27Pwilililanke mulungu umo wa nsikunkulu yakua Lea. Mane tukabe kukupeela Rakeli wakuti ukabombele inge myaka kilooba.”
28Yakobo waitabiile. Lu-aapwile mulungu umo mu bwinga bwakue, Labani waufiizie Rakeli kuli Yakobo. 29Labani waabuulile mubombi wakue mukazyana liina lyakue Biliha ni kumupeela Rakeli kuti aye wali mubombi wakue. 30Yakobo waile kulaala ni Rakeli, kabili waali wamutoneesie Rakeli kukila Lea. Ni pakako, waamubombeele Labani inge myaka kilooba.
Yakobo wavyalilua baana
31Yawe lu-aamwene nangue Lea taali watonenue, waapeelue buvyazi, inzi Rakeli waali wali nghumba. 32Lea lu-aimitile, waavyele mwana mwalalume. Lea waalandile evi, “Yawe Leza wamona maavia ane, evi mulume wane alikuntona.” Ni pakako, ozo mwana waamwinikile Rubeni.#29.32 RubeniLeli liina mu Kiebrania i kulanda nangue Mona mwana mwalalume. Kabili waalandile evi, “Wakimona bwavia bwane.” 33Kabili lu-aimitile, waavyele mwana mwalalume. Lea waalandile evi, “Yawe Leza wan'mpeela ozu mwana mwalalume pantu wakyunvua nangue nene nsitonenue.” Ni pakako, ozo mwana waamwinikile Simeoni.#29.33 Simeoni Leli liina mu Kiebrania i kulanda nangue Kunvua. 34Kabili lu-aimitile, waavyele mwana mwalalume. Lea waalandile evi, “Lono lwendo mulume wane alikukila kwampana ni nene pantu namuvyalila kale baana batatu balalumenke.” Ni pakako, ozo mwana waamwinikile Lawi.#29.34 Lawi: Leli liina i kulanda nangue Kwampana. 35Kabili lu-aimitile, waavyele mwana mwalalume. Lea waalandile evi, “Lono lwendo namutasia Yawe.” Ni pakako, ozo mwana waamwinikile Yuda.#29.35 Yuda: Leli liina mu Kiebrania i kulanda nangue kutasia. Kupwako ni luvyalo lwapela.
Iliyochaguliwa sasa
Kutendeka 29: KBTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kitaabua New Testament @The Word For The World Southern Africa. 2023.