Kutendeka 24
24
Abrahamu wasaakula muntu wa kuya kukeba wa kuupua na Izaaki
1Abrahamu waali wasyali mukote wa nsiku ingi, Yawe waali wamupaalile Abrahamu mu byonse. 2Abrahamu waamwanine mubombi wakue mukulu wa mu Nghanda yakue, waali mukulu pa byonse bi-aali nabio nangue, “Biika kuboko kobe kwinsina litanta lyane. 3Ndikukulapia kuli Yawe Leza wa mwiulu ni wa pa kyalo nangue, tekuti ukasaakwile mwana wane mukazi pa babinundue ba Bakanaani bangikeele nabo. 4Inzi ukabe kuya ku kyalo kyane ni ku lupua lwane, umusaakwile mwana wane Izaaki mukazi.”
5Mubombi waipuziizie evi, “Ale kine ozo mukazyana wakaana kwiza mu keno kyalo naakakita syani? Kuti namutwala mwana obe ku kyalo ku waafumine?”
6Abrahamu waalandile evi, “Kengela, tekukeezia kubwezia mwana wane ku kyalo kunaafumine. 7Yawe Leza wa mwiulu wanfumiizie mu nghanda yakua tawe ni mu kyalo kinaavyaliiluemo, ozo wandaile ni kulapa nangue waakapeela keki kyalo ku nvyalo yane, waakatangizia malaika ku ntanzi yobe kuti ukamusaakwila mwana wane mukazi wakue. 8Kine ozo mukazyana wakaana kwiza pamo nobe, teukaba na mulandu pa keki kilapo. Inzi tekukeezia kubwezia mwana wane ku kelia kyalo.” 9Kupwako, mubombi wabiika kuboko kwakue kwinsina litanta lyakua Abrahamu selenzi ni kulapa palua ozu mulandu.
10Mubombi waatweme nghamia lyanondo yakua selenzi, watwama ni bintu biweme waya nabio lya ku Aramu-Naharaimu, ku muzi kwaali kwaikeele Nahori. 11Lu-aafikile, waafukamikile nghamia lya ku kiina kya menda kyaali kumbali muzi. Ozo, waali musita wa kyungulo waali wailapo banakazi ku kutapa menda. 12Waalombele evi, “We Yawe Leza wakua tawelenzi Abrahamu, nakulomba lelo un'mpaale ni kumulangisia tawelenzi buwame. 13Mona ndi pano pa kiina kya menda palipaiza kutapa menda bakazyana bena bantu ba mu muzi. 14Mukazyana undikwana atuule katondo kakue ka menda ni kumulomba n'minemo, alande nangue, ‘Mina, kabili ndikunwinsia ni nghamia yobe,’ ozo i wakuti uye wasaakwiliile mubombi obe Izaaki. Keki i kindikwinikilako nangue wamukitila tawelenzi buwame.”
15Lu-aali tanapwililile kulanda, Rebeka mwina Betueli waizile watweme katondo ka menda pa nkombe. Ozo Betueli waali mwina Nahori mwalawakue kwa Abrahamu. Nahori waali waupile Milka. 16Rebeka waali ni lukebu lwakilile kuwama, kabili waali wakili kinundue. Waakookeele ku kutapa menda, waizuzia katondo ni kusela. 17Olia mubombi waile lubilo kumusensekela ni kumwana nangue, “Nakupaapaata un'mpeeleko menda aniini a mu katondo kobe n'mine.”
18Waalandile evi, “We mwinzio, menda aza umine.” Penka papo watuula kale katondo ka-aali watweme pa nkombe ni kumupeela. 19Lu-aapwile kumina, mukazyana waalandile evi, “Ndikuya kutapa ni ange menda a kunwinsia nghamia mpaka pailikupwila kumina.” 20Penka papo wapongwela kale menda mu kiina kya kumininamo nama ni kuya lubilo ku kutapa ange, watapila nghamia yakue yonse. 21Ozo mubombi mukulu waamutonokeele wataleele amone kine Yawe wakipaala lwendo lwakue ao abe.
22Nghamia luyaapwile kumina, ozo mubombi waabuulile kazele ka oro kaali kafinine shekeli mutanda ni bikano bya oro bibili bya ku maboko byaali byafinine shekeli 120. 23Ozo mubombi mukulu waamwanine evi, “Nakulomba unghane, wewe uli mwina ni? Ku nghanda yakua so kuli ni nkendo kwa kulaala busiku?”
24Rebeka waamwanine evi, “Nene ndi mwina Betueli waavyelue na Milka muka Nahori.” 25Kabili waamwanine evi, “Tukwete bikusi bingi pamo ni binge bilio, ni nkendo ya kulaalako.”
26Ozo mubombi mukulu waafukeeme ni kumupupa Yawe. 27Waalandile evi, “Yawe Leza wakua tawelenzi Abrahamu atasiiwe, pantu bukisinka ni bulayo bwakue bitwaliliile pali tawelenzi. Yawe wakinombola mu nzila mpaka ku nghanda ya balupua bakua tawelenzi.”
28Rebeka waile lubilo ku nghanda yakua nghina ni kubabwila lyasi lyonse. 29Labani ndumeze kwa Rebeka lu-aunvwile, waile lubilo ku ozo mubombi ku kiina kya menda. 30Labani lu-aamwene kazele ni bikano byaali byavwele nkaziize Rebeka, ni kunvua vi-aalandile, waile lubilo kuli mubombi waali waimeene pepi ni nghamia ku kiina kya menda. 31Labani waamwanine evi, “Twende ku nghanda we apaalilue na Yawe. Ale wimaniineki kono? Pantu nene nateanianga nghanda ni nkendo ya nghamia.”
32Mubombi mukulu ni ye waingiile mu nghanda, ni Labani wakakula bitwamo pa nghamia, wapeela nghamia bikusi ni binge bilio, kabili waamuleeteele ozo muntu menda a kusamba ku makasa, wene, pamo ni bantu bakue. 33Bilio lubyaaleetelue, mubombi wakua Abrahamu waalandile evi, “Nene nsilia kale kine nsinalandenke ka nghendeele.”
Labani waamwanine evi, “Ale landa.”
34Waalandile evi, “Nene ndi mubombi mukulu wakua Abrahamu.” 35Yawe waakilile kumupaala tawelenzi, ni ye wakyaluka mukindami. Waamupeele mikooko ni nghombe, ni nfolanga, ni oro, ni babombi balalume ni banakazi, ni nghamia pamo ni punda. 36Sara muka tawelenzi Abrahamu lu-aali wasyali mukote, waamuvyaliile Abrahamu mwana mwalalume wa mu bukote bwakue. Se waamupeele bintu byonse bi-aali nabio. 37Tawelenzi wandapiizie walanda nangue, “Tekuti ukasaakwile mwana wane mukazi pa bakazyana ba Bakanaani ba mu kyalo kingikeelemo. 38Inzi ukaye ku nghanda yakua tawe ni ku lupua lwane, ukaye kumusaakwila mwana wane mukazi wakue.” 39Naamwipuziizie tawelenzi, “Ale kine mukazyana wakaana kwiza kono?” 40Wangasukule, “Yawe undinanakila i waakatangizia malaika wakue ku waakaya, ni ye waakapaala nzila yobe, ni we waakasaakwila mwana wane mukazi wa mu lupua lwane ni wa mu nghanda yakua tawe. 41Inzi paukaya kwana bantu bane, kine bakakaane kukupeela mukazyana, kupwako, wewe teukaba na mulandu.
42“Lunafikanga ku kiina kya menda, nalombanga Yawe Leza wakua tawelenzi Abrahamu, namupaapaata ankwasie mu keki kindimukukita. 43Mona ndi pano pa kiina kya menda. Kansi mukazyana alikwiza ku kutapa menda, ni undikulomba menda aniini a kumina mu katondo kakue, 44kine waitabila kun'mpeela ni kunwinsia nghamia yane, i wakuti uye wasaakwile kuya wali muka mwana wakua tawelenzi. 45Lunaba nasyapwililila mapepo ane a mukansongia, Rebeka wakookelanga ku kiina ku kutapa menda watweme katondo pa nkombe. Namwananga mukazyana, napaapaata kuti an'mpeeleko menda a kumina. 46Penka papo watuula kale katondo ka menda, walanda nangue, ‘Poka umine, kabili ndikunwinsia ni nghamia yobe.’ Nene naminanga, kabili wanwisyanga ni nghamia yane. 47Namwipuzyanga evi, ‘So nani?’ Wangasukanga nangue, ‘Tawe ni Betueli waavyelue na Milka muka Nahori.’ Kupwako, nabuula kazele namuvwika ku moona ni bikomo namuvwika ku maboko. 48Namufukaminanga Yawe ni kumupupa. Namutasyanga Leza wakua tawelenzi Abrahamu wakinombola mu nzila iweme kwiza ku bantu bakua tawelenzi, kono kunaiza kusanga mwana mukazyana mwina wa kwakue kwa tawelenzi wa kuupua na mwina tawelenzi. 49Kansi kine mulikwitabila ni kukita mwanghaniine tawelenzi, nghane. Kabili kine mulikukaana, nghane n'mane kwa kulunghama, kine ni kulio ao kuso.”
50Labani ni Betueli ba-asukile, “Fwefue tetuli na kakulandapo pantu ozu mulandu ufumine kuli Yawe. 51Rebeka ozu, mutwame aye oopue na mwina solenzi nga mwakilandila Yawe.” 52Mubombi mukulu wakua Abrahamu lu-aunvwile evio, waakonteeme pansi ni kumupupa Yawe. 53Ozo mubombi mukulu waafumiizie tuzele twa mutofue ni twa oro pamo ni ngubo, wamupeela Rebeka. Kabili waafumiizie byabupe bya mponvu ni kubapeela ba kwakue kwa mukazyana pamo ni nghina.
54Mubombi mukulu wakua Abrahamu pamo ni bantu baizile nakue baaliile ni kumina, ni kulaala koko kwenka. Lubwaakiile, baabuukile. Mubombi mukulu wakua Abrahamu waalandile evi, “Emwe, n'mpeele nsambu ya kuti n'mbwelelemo kuli tawelenzi.”
55Labani pamo ni nghina kwa Rebeka baalandile evi, “Ata, mulekenke twikale nakue mulungu umo ao nsiku lyanondo, mane akabe kuya.”
56Inzi wene waalandile evi, “Emwe, tekunkaanie pantu Yawe wakin'mpaala mu lwendo lwane, kansi ndeke n'mbwelelemo kuli tawelenzi.”
57Baalandile evi, “Kansi tumukuute mukazyana tumwipuzie tunvue vi-alikulanda.” 58Kupwako, bamukuuta Rebeka, bamwipuzia nangue, “Ati, utonene kuya pamo ni mubombi wakua Abrahamu?”
Wa-asukile nangue, “Ee, ndikuya nakue.”
59Kupwako, bamupeela nsambu Rebeka kuti aye pamo ni mwanakazi wa mu nghanda waali wamusunga. Babo bonse babili baile pamo ni mubombi mukulu wakua Abrahamu pamo ni bantu baali baizile na mubombi mukulu wakua Abrahamu. 60Baamupaalile Rebeka bamwana,
“We mukwetu, ube nghina wa nvyalo ingi.
Nvyalo yobe ikaanzie balwani babo!”
61Rebeka pamo ni babombi bakue bakazyana baiteaniizie, basela pa nghamia ni kuya na mubombi mukulu wakua Abrahamu pamo ni bantu ba-aali nabo.
62Izaaki waile mu nzila ya ku Beri-Lahai-Roi (i kulanda nangue, Kiina kya menda kyakua Mukose aliwan'mona), pantu waali waikeele ku Negebu. 63Musita wa kyungulo Izaaki waile ku makaba ku kulangakana. Waakentele lwa kule ni kumona nghamia yalimukwiza. 64Rebeka ni ye lu-aakentele lwa kule ni kumumona Izaaki, waakookele pa nghamia 65ni kumwipuzia mubombi mukulu wakua Abrahamu, “Ale olia muntu alimukwenda mu bukaba waiza kutusensekela nani?”
“Olia i tawelenzi Izaaki.” Kupwako, wabuula kiteebo ni kwikupilila pa menso.
66Mubombi mukulu wakua Abrahamu waamwanine Izaaki bintu byonse bi-aakitile. 67Izaaki waamwingiziizie Rebeka mu liema mwaali mwaikala nghina Sara. Kupwako, Rebeka wa-aluka mukazi wakue. Izaaki waamutonene Rebeka. Waakoseleziiziwe na kubapo kwakua Rebeka pantu nghina waali wasyafwile.
Iliyochaguliwa sasa
Kutendeka 24: KBTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kitaabua New Testament @The Word For The World Southern Africa. 2023.