लूका 8

यीसु आपरै चेलौ रै साथै

1इणरै पछै यीसु गांव गांव अर नगर नगर मे परमेसर रै राज रा सुभ संदेस नै सुणावता होया, अर उणरै बारैह प्रेरित भी उणरै साथै हा। 2#मत 27:55,56; मरकु 15:40,41; लूक 23:49कीं लुगाईयां उणरै साथै ही, जिणनै वे दुस्ट आतमाओ ऊं छुड़ाई अर बिमारियों ऊं सावळ करी। मरियम जिकौ मगदल नगर री ही, उण मे ऊं सात दुस्ट आतमाओ निकाळी ही। 3हेरोदेस रा भंडारी खुजा री लुगाई योअन्‍ना अर साथै सूसन्‍नाह अर घणी ही लुगाईयां तो आपरी सम्पत्ति ऊं यीसु अर उणरै चेलौ री सेवा करती ही।

बीज बोणे रौ दिस्टांत

(मती 13:1–9; मरकुस 4:1–9)

4जद घणी भीड़ भेळी होई, अर नगर नगर रा लोग यीसु खनै आया, तो उणै उणौनै एक दिस्टांत कथा कही, 5“एक बार एक किसान हो जिकौ बीज बोणे गियौ। बीज बोते वगत कीं बीज मारग रै किनारै पड़िया अर पगां ऊं रूंद गिया, अर आकास रै पंखेरू उणौनै चुग लिया। 6कीं बीज पथरीली जमीन मे पड़िया अर उगिया पर नमी नीं मिलणा रै कारण बळ गिया। 7कीं बीज कांटीली झाड़ियौ मे पड़िया, अर झाड़ियौ साथै साथै बढ़नै उण बीजों नै दबा दिया। 8कीं बीज बड़िया जमीन माथै पड़िया अर उगनै सौ गुणा फळिया।”

पछै यीसु कयौ, “जिणरै खनै सुणणै वास्तै कांन है, वे सुण ले।”

दिस्टांत रौ मतलब

(मती 13:10–17; मरकुस 4:10–12)

9यीसु रा चेलौ यीसु ऊं पूछयौ, “इण दिस्टांत रौ कांई अरथ है?”

10यीसु कयौ, “थांनै परमेसर रै राज रा भेद जांणणै री समझ मिळयोड़ी है। बल्कि दूजौ नै दिस्टांतो ऊं समझाऊं हूं, क्यूंकै वे,

‘देखता होया भी नीं देखे है,

अर सुणता होया भी नीं समझै।’ ”

बीज बोणे वाळै रै दिस्टांत रौ मतलब

(मती 13:18–23; मरकुस 4:13–20)

11यीसु उणौनै कयौ, “बीज रै दिस्टांत रौ ओ अरथ है, की बीज परमेसर रा वचन है। 12मारग रै किनारै पड़िया बीज वे लोग है जिकौ वचन सुणै अर सैतान आयनै उणौरै मन मे ऊं वचन निकाळ नै ले जावै, ताकी ऐड़ौ नीं हो की वे विसवास करनै उद्धार पावै। 13पथरीली जमीन मे पड़िया बीज वे लोग है, जिकौ आंणंद ऊं वचन नै मांनै, पण उणरी जड़ नीं पकड़े है। वे थोड़ी जेज तांई विसवास राखै है, बल्कि परीकसा रै वगत भटक जावै है। 14झाड़ियौ में पड़िया बीज वे लोग है, जिकौ सुणै तो है, पण आगै जायनै चिंता, धन अर जीवन रै सुखो में फस जावै अर उणौ मे वचन नीं फळै। 15अर बड़िया जमीन मे पड़िया बीज वे लोग है, जिकौ वचन सुणनै उणनै भलै अर चौखै मन ऊं मांनै अर धीरज ऊं फळ लावै।

दीया री बात

(मरकुस 4:21–25)

16 # मत 5:15; लूक 11:33 “कोई दीया नै बरतन ऊं ढ़कणै या उणनै खटिया रै नीचे राखणै वास्तै नीं लगावै, बल्कि उण नै आळा मे राखै, ताकी मांयनै आवण वाळौ नै उजाळौ मिळै। 17#मत 10:26; लूक 12:2कीं भी लुकयोड़ो कोनीं, जिकौ सांमै नीं आवैला। कीं भी छानौ कोनीं, जिकौ परगट नीं होवैला। 18#मत 25:29; लूक 19:26इण वास्तै सावचेत रैवौ, की थै कीण रीति ऊं सुणौ हो, क्यूंकै जिणरै खनै है उणनै भळै मिळैला, अर जिणरै खनै नीं है, उण खनै ऊं उणरौ जिकौ है वो भी ले लियौ जावैला।”

यीसु री मां अर भाई

(मती 12:46–50; मरकुस 3:31–35)

19यीसु री मां अर भाई यीसु रै खनै आया बल्कि भीड़ रै खातर उण ऊं मिळ नीं सकया। 20तो कोई आयनै यीसु ऊं कयौ, “थारी मां अर थारा भाई बारै ऊभा है अर थारै ऊं मिलना चावै है।”

21यीसु उणनै जबाब दियौ, “म्हारी मां अर भाई तो ऐ है, जिकौ परमेसर रा वचन सुणै है अर उणौनै मांनै है।”

यीसु आंधी अर पांणी नै रोकया

(मती 8:23–27; मरकुस 4:35–41)

22एक दिन यीसु आपरै चेलौ रै साथै एक नाव माथै चढ़या अर उणै उणौ ऊं कयौ, “आओ अपां झील रै पार चालौ।” अर वे नाव नै खोल नै जावण लागा। 23जद नाव चाल री ही, तो यीसु सोह गियो। उण वगत अणचेत आंधी आई, अर नाव मे पांणी भरीजण लागौ अर वे जोखम मे पड़ग्या।

24तो चेला डरनै यीसु खनै आया अर उणनै जगायनै कैवण लागा, “हे मालिक, हे मालिक! म्हौ डूबण वाळा हों।”

तो यीसु उठनै आंधी नै अर पांणी नै हुकम दियौ तो वे थम गी, अर उठै घणी सानति होई। 25पछै यीसु चेलौ नै कयौ, “कठै गियौ थौरो विसवास?”

पण वे डरगा हा अर अचूम्बे ऊं एक दूजा नै कैवण लागा, “ओ कुण है? जिकौ आंधी अर पांणी नै भी हुकम दैवै अर वे इणरै हुकम नै मांनै भी है।”

यीसु एक आदमी नै दुस्टआतमा ऊं छुड़ायो

(मती 8:28–34; मरकुस 5:1–20)

26पछै यीसु अर उणरा चेला नाव ऊं गिरासेनियो रै देस मे पूगा, जिकौ गलील रै झील रै पार हो। 27जद यीसु किनारै माथै उतरिया तो, उणनै उण नगर रौ एक मिनख मिळियौ। उणमे घणी हारी दुस्टआतमाओ ही। अर वो घणा दिनां ऊं नीं तो गाभा पैरतो अर नीं वो घर मे रैवतौ हो। बल्कि वो कबरौ मे रैवतौ हो। 28वो यीसु नै देख नै जोर ऊं हाको करयौ अर उणरै पगां में पड़नै जोर ऊं हाका करनै कयौ, “हे परम परधान परमेसर रा बेटा यीसु, थूं म्हारै ऊं कांई चावै है? म्हैं विणती करूं हूं म्हनै दुख मत दे।” 29वो इण वास्तै बोल्यौ, क्यूंकै यीसु दुस्ट आतमाओ नै उण आदमी मे ऊं निकळनै रौ हुकम दियौ हो। घणी वगत वे उण मिनख माथै मजबुत हो जाती ही, अर उण वगत लोग उणरा हाथो पगां नै हांकळौ ऊं अर बेड़ियों ऊं बांध देता हा, तौभी वो हांकळौ अर बेड़ियों नै तोड़ देतो हो, अर सैतान उणनै रिंदरोही मे लैय जावतौ हो।

30यीसु उण ऊं पूछयौ, “थारौ नाम कांई है।”

तो उणै कयौ, “सेना।” क्यूंकै उण मे घणी हारी दुस्टआतमाओ ही। 31वे यीसु ऊं विणती करी के, “म्हौ नै पाताळ कुंड मे मती नोखो।”

32उठै भाखर माथै गंडूरौ रौ एक मोटो टोळो चरतौ हो, इण वास्तै वे यीसु ऊं विनती करनै कयौ, “म्हौ नै इण गंडूरौ मे घुस जावण दो।” तो यीसु उणौनै घुसनै री आग्या दे दी। 33तद सगळी दुस्ट आतमाओ उण मिनख मे ऊं निकळनै गंडूरौ में घुस गी अर वो गंडूरौ रौ टोळो गुड़कतो गुड़कतो झील मे जा पड़या अर डूबनै मर गिया।

34गंडूरौ नै चरावण वाळा ओ देखनै भाग गिया अर उणौ इणरा समाचार नगर अर गांव मे जायनै सुणाया। 35लोग ओ सुणनै उठै जिकौ होयौ उणनै देखणै गिया अर यीसु रै पगां खनै उण मिनख नै पूरा गाभा पैरयोड़ो सावळ बैठौ देख्यौ, उण मे ऊं दुस्ट आतमाओ निकळ गी ही। ओ देख नै लोग डर गिया हा। 36देखणवाळा कैवण लागा, की दुस्ट आतमाओ ऊं दुखी ओ आदमी कीकर सावळ होयौ। 37उणरै पछै गिरासेनियो रै आजू बाजू सगळी जगा रा लोग यीसु खनै आयनै उण ऊं विणती करी के, “म्हौरै अठै ऊं जाओ परा।” क्यूंकै उणौमे डर घुस गियो हो। पछै यीसु नाव माथै चढ़नै रवाना हो गिया।

38जिण आदमी मे ऊं दुस्ट आतमाओ निकाळी ही वो यीसु ऊं विणती करी के, “म्हनै थारै साथै रैवण दे।”

पण यीसु उणनै विदा करते कयौ, 39“घर जा अर लोगां नै बता की, परमेसर थारै वास्तै कैड़ौ मोटो कांम करयौ है।”

वो आपरै घर जायनै सगळै नगर मे इण बात रौ परचार करनै लागौ के, “यीसु म्हारै वास्तै कितौ मोटो कांम करयौ है।”

बिमार लुगाई अर मरयोड़ी छोरी

(मती 9:18–26; मरकुस 5:21–43)

40जद यीसु पाछा झील री दूजोड़े किनारै माथै आया, तो लोग उणनै घणै आंणंद रै साथै मिळया, क्यूंकै वे सगळा उणरी बाट जोह रिया हा। 41उण वगत याईर नाम रौ एक मिनख जिकौ पराथना घर रौ मुखियौ हो, आयौ अर यीसु रा पगां मे पड़नै विणती करनै लागौ, “म्हारै घर चाल।” 42क्यूंकै उणरै बारैह साल री एकाएक बेटी ही, वां मरणवाळी ही।

जद यीसु उणरै साथै जा रिया हा, तो उठै च्यांरूमेर ऊं लोगां री भीड़ उणनै दबा री ही। 43उण भीड़ मे एक लुगाई जिणनै बारैह साल ऊं लोई पड़नै रौ रोग हो, अर वां आपरी पूरी कमाई सावळ होणै मे लगा दी ही। तौभी वां किणी ऊं भी सावळ कोनीं होई ही। 44वां यीसु रै लारै आयनै उणरै गाभे रै हाथ लगायो अर तुरत उणरौ लोई पड़णौ बंद हो गियो।

45तो यीसु कयौ, “म्हनै कुण हाथ लगायो है?”

जद सगळा मना करणै लागा, तो पतरस कयौ, “हे मालिक, भीड़ थौरे माथै पड़ती ही अर लोग थौरे च्यांरूमेर हा। इण वास्तै कीकर पतौ लागै के, कुण थांनै हाथ लगायो?”

46पण यीसु कयौ, “कोई म्हारै हाथ लगायो है। क्यूंकै म्हनै ठाह पड़ियौ है की म्हारै मे ऊं सामरथ निकळी है।”

47जद लुगाई देख्यौ की वां लुक नीं सकै, तो वां कांपती होई आई, अर यीसु रै पगां में पड़नै सगळै लोगां रै सांमै बतायौ, की वां कीण कारण ऊं यीसु रै हाथ लगायो अर कीकर तुरत सावळ होई। 48यीसु उणनै कयौ, “बेटी थारै विसवास थनै सावळ की है। राजी खुसी ऊं जा।”

49यीसु ओ कैवता ही हा, की पराथना घर रा मुखिया याईर रै घर ऊं आयनै याईर नै कयौ, “थारी बेटी मर गी है। गुरु नै परेसान मत करौ।”

50यीसु ओ सुणनै याईर ऊं कयौ, “डर मत, विसवास करैला तो वां पाछी जी जावैला।”

51यीसु पराथना घर रा मुखिया रै घर में आयनै पतरस अर यूहन्‍ना अर याकूब अर छोरी रा मां बाप नै छोड़ अर किणी नै मांयनै नीं आवण दिया। 52सगळा लोग जिकौ रोवता अर छाती कूटता हा। पण यीसु उणौनै कयौ, “रोवो मत, वां मरी कोनीं पण सोह री है।”

53वे ओ जांणनै, की छोरी मर गी है, वे यीसु री बात माथै हसनै लागा। 54पण यीसु उण छोरी रौ हाथ पकड़नै जोर ऊं कयौ, “हे बेटी, उठ जा।” 55तो उणरौ जीव पाछौ आयग्यौ अर वा तुरत उठगी। यीसु पछै हुकम दियौ, “इणनै कीं खावण वास्तै दो।”

56उणरा मां बाप अचूम्बे में पड़ गिया पण यीसु उणौनै चेताया, “ओ जिकौ कीं होयौ है ओ किणी नै मती कहीजौ।”

Iliyochaguliwa sasa

लूका 8: RWR

Kuonyesha

Shirikisha

Nakili