गलातियो 1
1
1ओ कागद पौलुस री तरफ ऊं है। जिणनै प्रेरित होणै रौ हक मिनखां री तरफ ऊं कोनीं, पर परभु यीसु मसीह अर पिता परमेसर री तरफ ऊं है। यीसु मसीह नै मरयोड़ौ मे ऊं जीवता करिया। 2आ चिठ्ठी गलातिया री कलीसिया रै नाम, सगळै मसीह भाइयो री तरफ ऊं है जिकौ म्हारै खनै है। 3पिता परमेसर अर परभु यीसु मसीह ऊं थांनै दया अर सानति मिळती रैवै। 4यीसु मसीह अपणै आप नै अपांरै पाप वास्तै दे दिया, ताकी म्हौरै पिता परमेसर री इछा ऊं म्हौ इण पाप री दुनिया ऊं छूट सकौ। 5उणौरी सौभा जुग जुग होती रैवै। आमीन।
साचौ सुभ संदेस एक ही है
6म्हनै अचूम्बो होवै है की जिकौ परमेसर थांनै मसीह री दया मे बुलाया, थै इता वेगा ही उण ऊं फिर नै दूजा सुभ संदेस नै मांनण लागा हो। 7पण दूजौ कोई सुभ संदेस है ई कोनीं। कीं लोग ऐड़ा है जिकौ थांनै भरमा दैवै। वे मसीह रा सुभ संदेस नै बिगाड़णौ चावै है। 8पण चाहे म्हौ हो या कोई सरगदूत थांनै जिकौ सुभ संदेस म्हौ सुणायो उणनै छोड़नै कोई दूजौ सुभ संदेस सुणावै, तो उणरौ सतियानास होवैला। 9ज्यूं म्हौ पैला कयौ हो, पाछौ वळै कैवूं हूं, की जिकौ सुभ संदेस म्हैं सुणायो उणनै छोड़नै कोई दूजौ सुभ संदेस सुणावै, तो उणरौ सतियानास होवैला। 10म्हैं मिनखां री मांनू के परमेसर री मांनू? कांई म्हैं मिनखां नै राजी करणा चावूं? जे अबै तांई म्हैं मिनखां नै राजी राखतौ तो, मसीह रौ दास नीं होवतो।
परमेसर पौलुस नै बुलायौ
11हे भाइयो, म्हैं थांनै ओ बता दूं की जिकौ सुभ संदेस म्हैं थांनै सुणायो हूं, वो मिनखां रै बणायोड़ो कोनीं है। 12क्यूंकै ओ म्हनै मिनखौ ऊं कोनीं मिळियौ है अर नीं कोई म्हनै सिखायौ है। पर ओ म्हारै माथै खुद यीसु मसीह परगट करयौ है।
13 #
प्रेरि 8:3; 22:4,5; 26:9–11 थै सुण चुका हो की जद यहूदी मत मे पैला हो, तो म्हारी चाल चलण कैड़ी ही? म्हैं परमेसर री कलीसियाओ नै घणी सतातो हो अर उणनै नास करतौ हो। 14#प्रेरि 22:3यहूदियो मे म्हारी उमर रा घणा लोगां ऊं म्हैं आगै हो। क्यूंकै म्हारै बापदादों रै यहूदी रीति रिवाज नै मांनणा रौ म्हनै घणौ जोस हो।
15 #
प्रेरि 9:3–6; 22:6–10; 26:13–18 पण परमेसर म्हनै म्हारी मां रा पेट मे ही चुण लियौ हो अर आपरी करपा मे म्हनै बुलायौ हो। 16परमेसर री इछा ही, की वे म्हारै मे आपरै बेटे नै परगट करै अर म्हैं जिकौ यहूदी नीं है उणमे उणरौ सुभ संदेस सुणाऊं अर इण वास्तै म्हैं किणी मिनखौ री सला कोनीं ली। 17अर नीं ही म्हैं उण लोगां खनै यरुसलेम गियौ, जिकौ म्हारै ऊं पैला प्रेरित हा, बल्कि म्हैं हाथोहाथ अरब देस गियौ अर उठै ऊं पाछौ दमिसक नगर आयौ। 18#प्रेरि 9:26–30पछै तीन साल बाद मे पतरस ऊं मिलनै यरुसलेम नगर गियौ अर पनरा दिन उणरै खनै रियौ। 19पण परभु रा भाई याकूब नै छोड़नै कोई दूजा प्रेरित ऊं कोनीं मिळियौ। 20जिकौ बातां म्हैं थांनै लिखूं हूं, परमेसर नै साथै राखनै कैवूं की ऐ बातां झूठी कोनीं।
21इणरै पछै मे सीरिया अर किलिकिया देसो मे आयौ। 22पण यहूदिया देस री कलीसियाओ मसीह मे ही, जिकौ म्हनै कदैई देख्यौ कोनीं हो। 23अर आ सुणती ही, की जिकौ मसीह रा लोगां नै सतातो हो अर सुभ संदेस माथै विसवास करणैवाळौ रौ नास करतौ हो। आज वोहीज सुभ संदेस रौ परचार करै है। 24वा कलीसिया म्हारी ऐ बातां सुणनै परमेसर री सौभा करती ही।
Iliyochaguliwa sasa
गलातियो 1: RWR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© NLCI CC BY-NC-ND 4.0