Yohane 3
3
Nikodemu kangunng'endela Yesu
1Hino pakibhegha mundu yumu Nfalisayu, lihina lyake kakikemwa Nikodemu, kilongohi ghwa Akaayahudi. 2Aywo kakinng'endele Yesu pakilo na kunng'ombela, “Labi, tungumanya kukita ghwenga ghu nhunda ywakalaghilitwe na Chapanga, kiyaha kahone mundu yunakuhotola kutenda mihabho ayi yighuyitenda ghwenga, handa Chapanga kabhegha ng'obhe papamu na ywombe.”
3Yesu kakinnyanga, “Kulyagila nenga ningughughombela, mundu ywohele ywangabhelekwa paubhili kaahotola ng'obhe kuyingila mu Ghubhutwa ghwa Chapanga.”
4Nikodemu kakinkonya, “Mundu kaahotola bhuli kubhelekwa paubhili? Mundu nahota kaahotola ng'obhe kuyingila mu lutumbo lwa mama ywake pabhili na mbole kabhelekwe kangi!”
5Yesu kakinnyanga, “Kulyaghila nenga ningughughombela, kahone mundu ywohele ywakahotola kuyingila mu Ghubhutwa ghwa Chapanga mbaka kabhelekwe kwa machi na Nhuki ywa Chapanga. 6Bhandu bhangubhelekwa kuhuma kwa abhele bhake, peni bhandu bhangughalambulwa kubhegha bhana bha Chapanga na Nhuki ywa Chapanga. 7Hino, ghukotoke kukangacha panughughombela ghungunoghwa ghubhelekwe kangi. 8Liyegha lingupula kughenda kwohele kuulipala, ghwayihwa lupulo lwake, peni kahone kulimanya kulihuma ebu kulighenda. Yibha ubhwabhu kwa mundu ywohele ywakabhelekwite kwa Nhuki.”
9Nikodemu kakinkonya, “Milando ayi yaahotoleka bhuli?”
10Yesu kakinnyanga, “Ghwenga ghu nhunda nhwadali ywa Isilaeli, na ghwenga ghungumanya ng'obhe milando ayi? 11Kulyaghila nenga ningughughombela, twenga tungukambuka ghatughamanya na kubhoneha lila litulibhona, peni mwenga mungulikana Lilagho lyetu. 12Ningubhaghombela milando yiitendeka pannima, na mwenga mungunhyubhalila ng'obhe, manyubhalila bhuli panuaghombela milando ya kunani kwa Chapanga? 13Kahone mundu ywohele ywakaghendite kunani kwa Chapanga maha nga ywombe ywakahulukite kuhuma kunani kwa Chapanga, ywene ndo Mwana ywa Mundu.”
14Handa bhula Musa pakannyinulite yula liyoka ywa lihabha kula kukibhala, ubhwabhu abhu Mwana ywa Mundu kangukangunoghwa kuyinulighwa kunani, 15ili mundu ywohele ywakanhyubhalila kabheghe na ubhumi ghwa manjubha ghoha ghwanga kupela. 16“Kiyaha Chapanga kakighupala nnima mbaka kakimmuha Mwana ghwake ghwa kighweka, ngati kila mundu ywakanhyubhalila kakotoke kuhobha, ngati kabheghe na ubhumi ghwa manjubha ghoha ghanga pela!” 17Kiyaha Chapanga kakinnaghila ng'obhe Mwana ghwake ngati kaghutose nnima, maha kaghulopohe nnima.
18Mundu ywohele ywakanhyubhalila Mwana kaatoswa ng'obhe, peni mundu ywohele ywanga kunhyubhalila Mwana kaatoswa kala, kiyaha kakinhyubhalila ng'obhe Mwana ywa kighweka ywa Chapanga.
19Na toso yene ndo ayi, kukita lung'ali luhika pannima, peni bhandu bhalupala lubhindo bhaghulema lung'ali, kwa ndendelo yabhe ya uhokelo. 20Kila mundu ywakatenda uhokelo kangulukalalila lung'ali, kangi kanguhika ng'obhe palung'ali ngati mandendelo ghake gha uhokelo ghakotoke kung'alighwa. 21Peni bhala bhanakughungila gha hoto bhanguhika palung'ali, ili mandendelo ghabhe ghabhonekane paubhwelo kukita ghatendeka handa paapala Chapanga.
Yesu na Yohane
22Mbole ya agho, Yesu na ahundwa bhake bhakighenda ku nnima ghwa Yudea, nabho bhakitama akwo manjubha gha mandina na bhakiabatisa bhandu. 23Yohane naywo kakibhegha kangubatisa akwo ku Ainoni ugheghela na kijiji kya Salimu kiyaha akwo kukibhegha na machi ngenju. Bhandu bhakinng'endela akwo ngati bhabatiswe. 24Ayi yikibhegha yikali na Yohane kubhopwa kukibhopo.
25Linjubhalimu ghakihwimbuka malimbano muamoo bha ahundwa bha Yohane yunakubatisa na Nnyahudi yumu yakya luhumu lwa kitohe kya kukuha yikali ya kutundamila. 26Bhala ahundwa bhakinng'endela Yohane na bhakinng'ombela, “Nhunda, yula mundu ywakabheghite na ghwenga kumwambo ya lukemba lwa Yoludani, ywene ghwenga ghukitughombela mihalo yake, hinu kangubatisa na bhandu atangalo bhangunng'endela.”
27Yohane kakiayanga, “Kahone mundu ywakahotola kumokola kilibhi kyohele, ngati mbaka kapeghwe na Chapanga. 28Na mwenga ndo ayimiho bha nenga kukita nikilongela, ‘Nenga nu Kilisto ng'obhe ywakahaghulitwe na Chapanga, ngati naghilwa ninnongolele ywombe.’ 29Nndala yunakutolelwa ndo ywake bambo yunakutolela, peni ghanja ywake bambo yunakutola, kanguyelelwa munu pakaliyihwa lilobhe lya bambo yunakutolela. Hinu nunguyelelwa kyanalumu. 30Ywombe yingunnogha kabheghe nkulu munu na nenga yingunnogha meghe nndoko.”
Ywombe ywakahumite kunani kwa Chapanga
31Ywombe ywakahika kuhuma kunani kabhegha kunani kwa bhandu bhoha. Na ywombe ywakabheghite pannima ndo ywa pannima naywo kanguyobhela milando ya pannima, ngati ywombe ywakahikite kuhuma kunani kwa Chapanga kabhegha nnkulu kwa bhandu bhoha. 32Ywombe kanguaghombela bhandu ghala ghakaghabhonite na kughayihwa, peni kahone mundu ywakauyitikila uyimiho ghwake. 33Peni mundu ywohele ywakauyikitila uyimiho aghwo kanguyimiha kukita ghakalongela Chapanga ndo hoto. 34Ywombe ywakalagihitwe na Chapanga kangulongela malagho gha Chapanga, kiyaha Chapanga kangunpegha Nhuki ywake ili kannongohe mundu aywo kwa milando hyoha. 35Tate kangunpala Mwana, naywo kampegha hilibhi hyoha ili kahitabhale. 36Mundu ywohele ywakanhyubhalila Mwana ywa Chapanga kangubhegha na ubhumi ghwa manjubha ghoha, peni mundu ywanga kunhyubhalila Mwana kataghubhona ng'obhe ubhumi, ngati kiyaghabhu kya Chapanga kyabhegha unani mwake kyanga uhiko.
Iliyochaguliwa sasa
Yohane 3: NTNBL2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Ndwewe @The Word for The World International and Ndwewe Language translation, 2025. All rights reserved
