Matayo 28
28
Hu̱mbu̱ka ndia Yesu
(Maliko 16:1-10; Luka 24:1-12; Yohana 20:1-10)
1Sabbi̱te u̱ma-u̱ma, Sabbato nalasi̱be Mali̱ya Mangadalina imamoti̱ na Mali̱ya mindietolo nibhaki̱ya zi̱ba bhutulo.
2Bhali̱ngi̱na sa mani̱ naki̱bhi̱nda, nanga malai̱ka mindia Mambombi̱ atuka gulu, naki̱ya ka bhutulo, nakibhuwabe tali toli̱ naki̱li̱ki̱dhi̱a. 3Kei̱soaki yabebeniaga bhia kubha toli̱ ngoye ndiaki yau̱ki̱ bhia bilika. 4Bhasilikale bhatiya si̱ni̱ nibhakititila du̱mbi̱ nibhaki̱gu̱wa gwabhi̱mba nibhakibha bhia ki̱nda.
5Malai̱ka nakibhugia bhakali̱ bhiyo; “Bhukulukutiya, nanga ni̱bi̱ nesi̱ bhuli ka kabha Yesu, mindia bhambamba. 6Kali mehe, ahu̱mbu̱ki̱a, nesi̱ aonga. Bhu̱bi̱ke bhu̱zi̱be kindia yabhambi̱si̱o. 7Du̱mbi̱ bhu̱ye bhusakimane bhubhutolie bhaegi̱ ndibhaki bhiyo; ‘Ahu̱mbu̱ki̱a toli̱ akibhuteketilia ndiye ka Galilaya ndio bhu̱ku̱ki̱dhi̱mbeku̱, kuwo bhukuntangilia kau̱.’ Injo andu̱lu̱ makulu ndie ni̱bhu̱toli̱o.” 8Du̱mbi̱ bhakali̱ bhehe nibhakisakimana tukabho ka bhutulo, nibhali na bhoko no nibhadhedhelu̱, nibhakisakimana tolia bhaegi̱. 9Menjo, Yesu nakibhuenikiliana nakibhugia bhiyo; “Mpempa.” Nibhaki̱mbi̱kabe, nibhaki̱su̱ku̱mana ka kiguaki toli̱ nibhakimulami̱a. 10Du̱mbi̱ Yesu nakibhugia bhiyo; “Bhukulukutiya, bhu̱ye bhubhutolie bhanamami bhai̱ye ka Galilaya, bhakinitangilia kau̱.”
Makulu ndia bhasilikale bhapesi̱a
11Bhakali̱ nibhalia ki̱ya kindia bhaegi̱, bhasilikale bemoti̱ bhai̱ya ka tau̱ni̱ ndia ka Yelusalemu nibhakibhutolia bhabhembi̱ bhangbeku ndibha Mambombi̱ u̱poni ndia aenikani̱o. 12Bhabhembi̱ bhangbeku nibhaki̱si̱dha-si̱dhana na bhangbeku ndibha Bhayu̱daya pesi̱a bhasilikale bi̱ya mbangana, 13nibhakibhutolia bhasilikale bhiyo; “Bhubhutolie bhakpa bhiyo; ‘Bhaegi̱ ndibhaki bhabi̱ki̱ ki̱li̱ya nikilali̱, nibhaki̱bha ki̱nda ndiaki.’ 14Gavuna kaoka yoho, kikimuliya dhaka eti bhukuli na musango toli̱ bhukulukubha na bhoko.” 15Bhasilikale nibhakigba mbangana toli̱ nibhakikola ndia bhabhulagi̱li̱ kolai̱. Makulu yoho adhakiaga kowa Bhayu̱daya bhoponi doi̱sa na lelu.
Yesu nakibhuenikiliana bhaegi̱ ndibhaki komi̱ na moti̱
(Maliko 16:14-18; Luka 24:36-49; Yohana 20:19-23; Bikoluwa ndia Bhakwenda 1:6-8)
16Du̱mbi̱ bhaegi̱ komi̱ na moti̱ bhai̱ya ka Galilaya ka gu̱si̱a kindia Yesu abhugia yabho. 17Ndia bhantangia, nibhakimulami̱a no ndibhetolo nibhakikoma hi̱ki̱li̱za eti andi Yesu. 18Du̱mbi̱ Yesu naki̱bhu̱bi̱kabe nakibhugia bhiyo; “Mambombi̱ ani̱pesi̱ mani̱ poni ndia gulu na gwabhi̱mba. 19Ti̱-no bhu̱ye bhubhuhindule bhakpa ka nsi poni bhabhe bhaegi̱ ndibhamo, bhubhubati̱ze ke i̱na Aba na Mi̱ki̱ na Mwoyo Mawelikana, 20toli̱ bhubhuegesage yeli̱a ka poni ndie nibhulagi̱li̱o, toli̱ nida kibha na bhenu̱ ka bwile sa mpelo.”
Iliyochaguliwa sasa
Matayo 28: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
