Bikoluwa ndia Bhakwenda 2
2
Bi̱ka ndia Mwoyo Mawelikana ka tolo sa Pentekoti̱
1Tolo sa Pentekoti̱ ndia aduwa, bhai̱ki̱li̱za bhoponi bhabha nibhekumesi imamoti̱.#2:1 Pentekoti̱ abhi tolo ndia Bhayu̱daya yabhaliaga bhu̱geni̱ sa kesa ngano. 2Menjo laso atuka gulu nali bhia wewelia sa mani̱, du̱mbi̱ nakituma subha ndabho kindia bhabhi̱ nibhali̱ki̱o. 3Bhatangia ndia abhi̱ bhia dhaka sa kala ndia etinagaku̱ toli̱ naki̱mbi̱kabe nkpa poni. 4Mwoyo Mawelikana abhu̱bi̱kabe bhoponi nibhakitandika onga loki̱ ndia kali ndiabho nesi̱ Mwoyo abhu̱pesi̱a mani̱.
5Ka bwile injo Bhayu̱daya ndibhabhi̱ kimulami̱aga Mambombi̱ tolo poni bhabha nibhali̱ki̱ ka Yelusalemu tukabho ka kyalo poni. 6Ndia bhaoka laso yoho, bi̱ya bhakpa nibhaki̱bi̱ka nki̱li̱ nabhu̱ti̱ni̱ki̱ nanga bhoponi bhaoka loki̱ ndiabho bhai̱ki̱li̱za nibhagbei̱ ongai̱. 7Nki̱li̱ nalia nabhu̱ti̱ni̱ki̱, nibhakieyolu̱li̱a bhiyo; “Yoho akibha bhoni̱? Bhakpa bhehe bhoponi bhakali̱ ndibha ka Galilaya? 8Andiki ndia adhu̱ bhesu̱ poni nikigbei̱ okabho nibhakionga ka loki̱ ndiasu̱? 9Mehe kilibe na bhakpa ndibha ka Pati̱ya na Mediya na Elamu na Mesopotamiya na Yu̱deya na Kapodoki̱ya na Ponto na Asi̱ya, 10Fi̱li̱gi̱ya na Panfi̱li̱ya na Mi̱si̱li̱ na kicweka sa Li̱bbi̱ya bi̱ya na Kilene; bhageni̱ tuka ka Loma. 11Bhayu̱daya imamoti̱ na bhakpa ndibha bhahinduka ka di̱ni̱ sa Ki̱yu̱daya, Bhakulete na Bhahalabbo ki̱oki̱ nibhakionga ka loki̱ ndiasu̱ kima sa mani̱ ndia Mambombi̱ ndia alakoli̱o.” 12Nibhalia kititila na nki̱li̱ nalia nabhu̱ti̱ni̱ki̱, nibhakiolu̱li̱ana bhiyo; “Makulu se yoho andiki?”
13No ndibhetolo ka bi̱ya bhakpa bhabhutebiaga bhai̱ki̱li̱za nibhakibhugia eti, “Bhatami̱li̱a.”
Petelo nakibhutebeza bi̱ya bhakpa
14Du̱mbi̱ Petelo nakitelema imamoti̱ na bhakwenda ndibhetolo komi̱ na moti̱ naki̱mei̱sa laso ndiaki nakibhutolia bhiyo; “Bhayu̱daya dami na bhenu̱ ndibho bhu̱ku̱li̱kaga ka Yelusalemu, bhudhuwe nibhutolie toli̱ bhuokanie bhiani ndie nikaya ongai̱. 15Bhaluku bhehe bhakatami̱li̱ nesi̱ bhu̱gbei̱ kweli̱li̱kana. Yoho andi saha salo ndia u̱ma-u̱ma sa nkpa kanga tamila.” 16Yoho andu̱lu̱ ndia Nabbi̱ Yoweli̱ aonga bhiyo;
17“Ka tolo sa dhakililia,
Nida ki̱bhu̱pesi̱a bhakpa poni Mwoyo mindiamo.
Bhani̱ki̱ ndibhanu̱ bhaki̱pesi̱a bhunabbi̱.
Bhatabhana ndibhanu̱ Mambombi̱ akibhuani̱sa kima,
bhaluku bhangbeku bhakilota.
18Ka tolo injo, nida ki̱bhu̱pesi̱a bhakoli̱ ndibhamo bhaluku na bhakali̱ Mwoyo mindiamo,
toli̱ bhaki̱pesi̱a bhunabbi̱.
19Nikiani̱sa ndia akitina nki̱li̱ gulu
na sazi̱bi̱li̱ai̱be ka nsi,
magi̱la, kala na kuba sa maki̱li̱.
20Mani ada kigali̱ngana bhai̱ ki̱li̱mi̱ki̱aga
na sungi bhai̱ magi̱la
tolo sa mani̱ toli̱ sa ngu̱ko sa bi̱ka ndia Sali̱a Yesu ndia kadoi̱mbe.
21Toli̱ nkpa poni mindia akimueka Sali̱a Mambombi̱ nali kakungaki eti anzune, akinzuna.”#Yoweli̱ 2:28-32
22Bhaisaleli̱ dami, bhuokanie yoho. Yesu mindia ka tau̱ni̱ ndia ka Nazaleti̱ andi muluku mindia Mambombi̱ ambalisana kola ndia akitina nki̱li̱ na sazi̱bi̱li̱ai̱be nakoli̱li̱ kowaki, nesi̱ bhenu̱ bhaku̱mi̱ bhu̱i̱bi̱o. 23Mambombi̱ ampesi̱aku̱ Yesu ka tegeka ndiaki toli̱ nai̱bi̱ ndia aki̱ya enikanai̱. Bhaluku bhakoli̱ kibi bhabhukonia nibhukumbamba ka musalaba toli̱ nibhukumuola. 24No Mambombi̱ amu̱hu̱mbu̱la bhuaki ka ena bhu̱su̱ sa ku̱wa nanga ku̱wa kabhi̱kitoka li̱ka nambhoeliagi̱. 25Dhau̱dhi̱ aonga yoho ndia angbei̱be Yesu eti,
“Nintangia Sali̱a tolo poni nali nemi.
Nanga ali ka kibhoko ndiamo sa kuluku,
Kalibe ndia kinibhangi̱sa.
26Nikionga ninidhedhelu.
Kozo ndiamo akihumulikana ka nihila
27nanga koku̱ya dhuwami ka bhutulo,
toli̱ koku̱ya dhuwa mindia awelikani̱o nakihola.
28Oniani̱si̱ nesi̱yo sa bwomezi̱,
nidhedhelua nanga oli nemi.”
29“Bhatua luganda, nikibhutolia eti, tatasu̱#Zabbu̱li̱ 16:8-11 Dhau̱dhi̱ aku̱wa nibhaki̱mu̱lu̱mba toli̱ na bhutulo ndiaki alimehe doi̱sa lelu. 30No Dhau̱dhi̱ yabhi̱ nabbi̱ toli̱ nai̱bi̱ nesi̱ Mambombi̱ yamulaki̱sani̱ eti aki̱mbi̱sa moti̱ kowa bhananaki ka mbata sa kusali̱a. 31Dhau̱dhi̱ ndia atangia ndia ali namusa, nakiongabe ndia agbei̱be hu̱mbu̱ka ndia Masiya eti bhakanduwa ka bhutulo toli̱ kozo ndiaki kahola. 32Mambombi̱ amu̱hu̱mbu̱la Yesu toli̱ bhesu̱ poni kili bhakai̱so. 33Endindi Yesu ali̱kagi̱ ka kikalo sa ngu̱ko ka kibhoko sa kuluku ndia Mambombi̱. Abaki amulaki̱sana na paki Mwoyo Mawelikana. Yesu andiye mindia adhu̱ poni ndie bhutangi̱o na ndie bhuoki̱o nakibhabe.” 34Dhau̱dhi̱ nku̱mi̱ kaya gulu no agia bhiyo;
“Sali̱a aonga na Sali̱a mindiamo Yesu,
‘Oli̱ke ka kibhoko ndiamo sa kuluku
35doi̱sa ninibhu̱bi̱si̱ bhangi̱gu̱ ndibhako
ku̱si̱a kiguako.’ ”#Zabbu̱li̱ 110:1
36“Ti̱-no bhakpa poni ndibha ka Isaleli̱ bhai̱be eti Mambombi̱ anfoli̱ Yesu minjo mindie bhumpesi̱aku̱ eti bhambambe ka musalaba bhaki Sali̱a toli̱ Ki̱li̱si̱to Nzu̱ni̱ mindia bhakpa.”
37Bhakpa ndia bhaoka kigambo ndia Petelo aonga, naki̱bhu̱tu̱ma ka mulima du̱mbi̱ nibhakimuolu̱li̱a na bhakwenda ndibhetolo bhiyo; “Bhatua luganda, kikoleki?”
38Du̱mbi̱ Petelo naki̱bhu̱si̱ki̱aku̱ bhiyo; “Bhwesi̱ki̱eku̱ bhenu̱ poni toli̱ bhabhu̱bati̱ze ka i̱na ndia Yesu Ki̱li̱si̱to andu̱lu̱ kibi ndianu̱ bhabhugani̱li̱e. Du̱mbi̱ bhukutunga kisembo sa Mwoyo Mawelikana. 39Laki̱sana yoho ali ndianu̱ na bhani̱ki̱ ndibhanu̱ na bhenjo bhoponi ndibha Sali̱a Mambombi̱ mindiasu̱ akibhueka.”
40Petelo abhuhabhula na kigambo ndietolo mamadha toli̱ nalia kibhugamililia bhiyo; “Bhuezune tukanu̱ ka muzo yoho amazinana.” 41Bhenjo ndibha bhabhala kigambo ndiaki bhabhu̱bati̱za toli̱ bhai̱ki̱li̱za bhia nku̱mi̱ salo nibhakieyongelabe ka tolo injo.
Bhuli̱ki̱ imamoti̱ ndia Bhai̱ki̱li̱za
42Bhamotilia ka egesa ndia bhakwenda na gabiana ndia bhabhi̱ nai̱, leliaga imamoti̱ na saba. 43Bhakwenda bhakola kima ndia akitina nki̱li̱ na sazi̱bi̱li̱ai̱be ndia adhuwa nkpa poni nakitiya. 44Bhai̱ki̱li̱za bhoponi bhali̱ka imamoti̱ na gabianaga kima ndiabho ndia bhabhi̱ nai̱ 45Bhasumbesa ndia bhabhi̱ nai̱, yabhampaga nkpa sigikilia ka ndia bhakikabha ndiaki. 46Tolo poni yabhatakananaga ka mulima-bala sa Hekalo, yabhaleliaga imamoti̱ nibhali na dhedhelua ka mulima ndiabho, 47nibhalia kinsinda Mambombi̱ toli̱ bhakpa poni nibhabhu̱ku̱ndi̱. Sali̱a yabhubhikisaga bhenjo ndibha yabhuzunaga tolo poni.
Iliyochaguliwa sasa
Bikoluwa ndia Bhakwenda 2: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
