Maruku 13
13
Ndik Yesu kǝ ɗar hǝmndi Wiri Farta ha.
1Kǝ nak Yesu chet kesh Wiri Fartaˈan ha, artǝ hur kǝmsichiyan ndang kan wa, “Thlǝ chaˈanan kaɗi, ɗǝmban weˈtǝ paktǝ ɗakwanchǝɗa, tǝ weˈtǝ ndǝti tǝnchaˈan paɗ.” 2Nggǝrang kǝ Yesu su wa, “Niˈin weˈtǝ paktǝ tǝnchiɗiya wa? Nggǝ ɗǝkwensi naa fee mathlǝ chǝka artǝ ɗar sheɗan wa. Nat naa fee pǝpakandǝ ha.”
Tǝrkwathl kan nggwarkana
(Mat 24:3-14; Luk 21:7-19)
3Nak Yesu ɗas ɗar ngwal Zaitun thla nech ɗelengngǝ tǝ Wiri Farta. Ɓak Biturus, tǝ Yohanna, tǝ Yakubu, tǝ Andrawus kǝmɗiyan, paɗ chǝhan kandǝ mee ǝ wuɓtǝ fa. Ndang kanda wa, 4“Mbuˈaˈandǝn, kwati naa ichiɗiya sǝɓta? Paɗ mǝ nech nat kǝ wanɗǝ sǝnansǝ wa ichiɗiya nggak ndǝ ndiitǝha?”
5Nggǝrang kǝ Yesu tandǝs wa, “Mbǝramsi mǝ sakowunchǝ yowun wa. 6Tǝrchan nafcha nech ɓat hur thlǝmna ndat wa, nggǝt nech kǝ Kǝristi, nandǝ naa ɗǝf nafchi terchan kǝ lengndǝ ha. 7Maa ǝ sǝkwun yaancha, tǝ paɗ kusheˈtǝ yaancha, mǝ thlaˈ hurˈinchiyowun wa. Nwaat kǝ landǝ sǝɓta, nat tǝ kǝɗu saˈwu mecheɗan wa. 8Na hahǝ thlaˈandǝ hahǝ fa, paɗ kuturcha kǝ thlaˈandǝ mǝt kuturaktǝ fa. Na hahǝ rǝbtǝf kaan michǝ samǝn samǝn, naa fee chǝt mita. Ndaˈan nech kǝ tǝrkwathl kan nggwarkwana.
9“Paɗaa kǝ mbǝrwunsi indiyowun. Nandǝ kǝssowunda kǝ ɗǝndǝ tǝ wunchi kǝ pangngǝn kutǝrcha, kǝ thlǝfowun chinda hur wur nggom ndi Yahudawecha. Nat kǝthlǝm thlǝmna naa fee ɗǝt tǝ wunchi kǝmɗi nggomnaticha tǝ kutǝrcha kǝthlǝm nggǝta. Nowun mbuˈandǝ tandǝ paɗ ǝnɗi sǝndǝwun kǝ ɗar na. 10Paɗaa kwastǝ ndiktǝɗiya naa fee ɓassandǝ kaɗ hur hahichi nat kwanɗǝn, kǝn ndukwa heshi ɓata. 11Maa ǝ kǝsowunchi nda kǝ ɗǝndǝ tǝ wunchi kǝmɗi fǝ chak mii cha, mǝ lekǝwun kǝ ɗar mǝ natwun mbuˈta wa. Mbuˈam ǝnɗi fǝrowundǝ fee fartǝ ini. Kǝthlǝm ngga kun nech ndikta wa, Shemeta thla Chiɗ Chiɗ.
12Nafchǝ tǝ wanmanan naa yowun fǝr sheɗan kǝ ɓǝlan fee, chindǝ paɗ nan fǝr waˈyan, naa wanchǝ thlaˈandǝ parchina ndǝ fa, kǝ fǝr ndǝ tandǝ kǝ ɓǝlan fee tanda. 13Naa chǝka wun kar wunchi kǝthlǝm nggǝta, paɗaa nat thla kǝrǝschǝ kǝ ndukwaɗan nan hǝraˈta.
Əna lekǝta thla nech tǝkmandǝ Wiri Farta kaɗi
14Maa niwun ǝna lekǝta thla nech tǝkmandǝ Wiri Farta kaɗi, kǝ ɗǝf tǝ nafchǝ nggandǝ yim sǝ wa. (Nat thla nech changata kǝ sǝntǝ ǝnɗi naa fee mbuˈta) Fee nech ǝ hahi Yahudiya, kǝ rakandǝ kǝ hur nggwalcha. 15Nafɗi nech ɗas ɗar kǝnda, mǝ ndawa nan ɓat kaha, kǝ yim keuriyan kǝ tǝr tǝ ǝnawa. 16Nafɗi nech hǝngga, mǝ nda wa nan nggǝrandǝ in kaɗ kǝ tǝr tǝ ǝna chiptiyan wa. 17Ai i nǝssǝɗi nech tǝ wanchi hur tǝ fee nech tǝ wanchi kǝrǝssa wan mǝnchaˈan. 18Shiyama mǝ ɓǝ fartǝ ini hur ɗǝfi tǝ fekta wa. 19Kǝthlǝm naa fee sa nggwarkana kaan wan mǝnchi ini. Weˈtǝ ɓahtǝɗi ha ya tamwu fee chǝta wa thlaˈtǝ fartǝɗi tǝndǝ Farta heshi kǝ nakanya. Peˈwu fee nggǝr chǝt weˈtǝ ndaˈan paɗ wa.
20Mangga ǝnɗi takankǝ Farta wanmǝn chaˈan ha wa, mǝ yowunsi nech hǝraˈata wa. Paɗaa kǝthlǝm tachaˈan tǝɗi tatǝn, ndaˈan chicha takandǝn wanminchaˈan ha. 21Fartǝ ini maa ndi yowun wa, ‘Ɗǝpama, ǝ Kǝristi ya.’ Ndu ‘Ɗǝpama, mǝthlan yu.’ Kǝ fǝrwun kit su wa. 22Kǝthlǝm fee thlǝ ˈyech inchi yanda wa tandǝ nech kǝ Kǝristi tǝ fǝ shenuˈtǝ tǝ yahti Farta yi lekta nandǝ ɓata. Nandǝ chǝt ǝna saka incha tǝ ǝna lekǝchǝ kaan kǝthlǝm kǝ lǝm ndǝ nafcha. Maa nan chǝt kǝɗu, naa ndǝ lǝm tachaˈan. 23Kǝthlǝm ndaˈan, chokam tǝ tahǝs fa. Tapi mbuˈowunchi ichaˈan nat kǝn fartaˈan ɓata.
Nggǝr ɓati Waˈi Nef kaɗi
24Paɗaa farti ini, kǝrsǝ ɓahtiˈini ha yu,
“ ‘Naa wat fartǝ chǝt kǝ wuthla,
ndǝr paɗ ngee fǝr ɗaˈkǝt ˈyan wa.
25wandǝrichǝ hulafǝrta paɗ nandǝ hǝhatat kaha,
tǝ paktǝ alkǝchiɗi nech hulafǝrta nandǝ rǝɓtǝ fa.’
26Fartǝ ini naa nafchi naa Waˈi Nefa ɓat kah hur husamba tǝ alkǝta, paɗ tǝ kapa maanda kaan. 27Paɗ nan thlǝn fǝ thlinchiyan kǝ ngomandǝ fee tatǝn. Nechandǝ nggaktǝ thlaˈtǝ konggal heshi foɗɗa. Nandǝ ngomandat nat thlaˈtǝ ndukwa heshi kǝ ndukwa hulafǝrta.
Ənɗi nat mǝn chaˈata fi ɗǝftǝ shukwata
28“Nakanya chaˈam ǝn ɗar dǝftǝ shukwata, maa chǝpantǝ saˈchiyan kaɗi mǝthlan nggak chithla, sǝnwun wa fektǝ nduk ha. 29Nechan kǝɗu mǝɗiyon, maa ǝ niwun ichiˈini sǝɓta, kǝ sǝnwun su wa fartǝ ɓati Waˈi Nef kaɗ nduk ha, mǝthlan ǝ miimbeya. 30Kittaˈan nati mbuˈowunda, yuwa heshiɗiya nee thlǝrǝt wa maangga tǝ sǝɓ ichiɗiya nat wa. 31Chǝk mǝ ǝ hulafǝrta tǝ heshi, nan thlǝrǝt tǝ kaɗi, ndiktinchi ngee tam thlǝrǝt kaɗ wa.
Nefsǝ sǝnchǝ fartǝ ɓati Waˈi Nef kaɗ wa
32“Paɗaa kǝ ɓǝra fartaˈan ndu wanshengnan nefsǝ sǝncha wa. Chǝka fǝ thlǝnchi Farta hulafǝrta, ndu Wanan wa, Chinan ndak. 33Kǝ mbǝrwunsi, kǝ chok wun tǝ tahǝsfa. Kǝ nowun shita, Kǝthlǝm sǝnwowun wanshengngǝnɗi naa fartaˈan ɓata wa. 34Chok chan kǝɗ nefa thla nech chǝt wiˈta kǝ yowun haha. Kǝ nakan mal wirˈyan ha fǝrankan chǝka wun mafaɗan ǝnɗi natǝn chǝta. mbuˈankan thla nech pǝk mii mbangngan har yuwa kǝ chok tǝ tahǝsfa.
35“Kǝthlǝm ndaˈan chokam tǝ tahǝsfa. Kǝthlǝm sǝnwowun wan shengngǝnɗi naa thlǝ wuran ɓat kaɗ wa. Ndu kǝɓǝ kaɗ farwita, ndu ɗar wita, ndu ǝ kwarti chemsa ndu walwurta. 36Kǝ ɓǝ tukuthl, kǝ ɓǝ mbǝsowunda kun saˈena wa. 37Ənɗi nati mbuˈowundiya, nggǝt mbuˈandi nafchǝ nat. ‘Chokam tǝ tahǝsfa.’”
Iliyochaguliwa sasa
Maruku 13: GQA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Luke Initiative for Scripture Translation
Maruku 13
13
Ndik Yesu kǝ ɗar hǝmndi Wiri Farta ha.
1Kǝ nak Yesu chet kesh Wiri Fartaˈan ha, artǝ hur kǝmsichiyan ndang kan wa, “Thlǝ chaˈanan kaɗi, ɗǝmban weˈtǝ paktǝ ɗakwanchǝɗa, tǝ weˈtǝ ndǝti tǝnchaˈan paɗ.” 2Nggǝrang kǝ Yesu su wa, “Niˈin weˈtǝ paktǝ tǝnchiɗiya wa? Nggǝ ɗǝkwensi naa fee mathlǝ chǝka artǝ ɗar sheɗan wa. Nat naa fee pǝpakandǝ ha.”
Tǝrkwathl kan nggwarkana
(Mat 24:3-14; Luk 21:7-19)
3Nak Yesu ɗas ɗar ngwal Zaitun thla nech ɗelengngǝ tǝ Wiri Farta. Ɓak Biturus, tǝ Yohanna, tǝ Yakubu, tǝ Andrawus kǝmɗiyan, paɗ chǝhan kandǝ mee ǝ wuɓtǝ fa. Ndang kanda wa, 4“Mbuˈaˈandǝn, kwati naa ichiɗiya sǝɓta? Paɗ mǝ nech nat kǝ wanɗǝ sǝnansǝ wa ichiɗiya nggak ndǝ ndiitǝha?”
5Nggǝrang kǝ Yesu tandǝs wa, “Mbǝramsi mǝ sakowunchǝ yowun wa. 6Tǝrchan nafcha nech ɓat hur thlǝmna ndat wa, nggǝt nech kǝ Kǝristi, nandǝ naa ɗǝf nafchi terchan kǝ lengndǝ ha. 7Maa ǝ sǝkwun yaancha, tǝ paɗ kusheˈtǝ yaancha, mǝ thlaˈ hurˈinchiyowun wa. Nwaat kǝ landǝ sǝɓta, nat tǝ kǝɗu saˈwu mecheɗan wa. 8Na hahǝ thlaˈandǝ hahǝ fa, paɗ kuturcha kǝ thlaˈandǝ mǝt kuturaktǝ fa. Na hahǝ rǝbtǝf kaan michǝ samǝn samǝn, naa fee chǝt mita. Ndaˈan nech kǝ tǝrkwathl kan nggwarkwana.
9“Paɗaa kǝ mbǝrwunsi indiyowun. Nandǝ kǝssowunda kǝ ɗǝndǝ tǝ wunchi kǝ pangngǝn kutǝrcha, kǝ thlǝfowun chinda hur wur nggom ndi Yahudawecha. Nat kǝthlǝm thlǝmna naa fee ɗǝt tǝ wunchi kǝmɗi nggomnaticha tǝ kutǝrcha kǝthlǝm nggǝta. Nowun mbuˈandǝ tandǝ paɗ ǝnɗi sǝndǝwun kǝ ɗar na. 10Paɗaa kwastǝ ndiktǝɗiya naa fee ɓassandǝ kaɗ hur hahichi nat kwanɗǝn, kǝn ndukwa heshi ɓata. 11Maa ǝ kǝsowunchi nda kǝ ɗǝndǝ tǝ wunchi kǝmɗi fǝ chak mii cha, mǝ lekǝwun kǝ ɗar mǝ natwun mbuˈta wa. Mbuˈam ǝnɗi fǝrowundǝ fee fartǝ ini. Kǝthlǝm ngga kun nech ndikta wa, Shemeta thla Chiɗ Chiɗ.
12Nafchǝ tǝ wanmanan naa yowun fǝr sheɗan kǝ ɓǝlan fee, chindǝ paɗ nan fǝr waˈyan, naa wanchǝ thlaˈandǝ parchina ndǝ fa, kǝ fǝr ndǝ tandǝ kǝ ɓǝlan fee tanda. 13Naa chǝka wun kar wunchi kǝthlǝm nggǝta, paɗaa nat thla kǝrǝschǝ kǝ ndukwaɗan nan hǝraˈta.
Əna lekǝta thla nech tǝkmandǝ Wiri Farta kaɗi
14Maa niwun ǝna lekǝta thla nech tǝkmandǝ Wiri Farta kaɗi, kǝ ɗǝf tǝ nafchǝ nggandǝ yim sǝ wa. (Nat thla nech changata kǝ sǝntǝ ǝnɗi naa fee mbuˈta) Fee nech ǝ hahi Yahudiya, kǝ rakandǝ kǝ hur nggwalcha. 15Nafɗi nech ɗas ɗar kǝnda, mǝ ndawa nan ɓat kaha, kǝ yim keuriyan kǝ tǝr tǝ ǝnawa. 16Nafɗi nech hǝngga, mǝ nda wa nan nggǝrandǝ in kaɗ kǝ tǝr tǝ ǝna chiptiyan wa. 17Ai i nǝssǝɗi nech tǝ wanchi hur tǝ fee nech tǝ wanchi kǝrǝssa wan mǝnchaˈan. 18Shiyama mǝ ɓǝ fartǝ ini hur ɗǝfi tǝ fekta wa. 19Kǝthlǝm naa fee sa nggwarkana kaan wan mǝnchi ini. Weˈtǝ ɓahtǝɗi ha ya tamwu fee chǝta wa thlaˈtǝ fartǝɗi tǝndǝ Farta heshi kǝ nakanya. Peˈwu fee nggǝr chǝt weˈtǝ ndaˈan paɗ wa.
20Mangga ǝnɗi takankǝ Farta wanmǝn chaˈan ha wa, mǝ yowunsi nech hǝraˈata wa. Paɗaa kǝthlǝm tachaˈan tǝɗi tatǝn, ndaˈan chicha takandǝn wanminchaˈan ha. 21Fartǝ ini maa ndi yowun wa, ‘Ɗǝpama, ǝ Kǝristi ya.’ Ndu ‘Ɗǝpama, mǝthlan yu.’ Kǝ fǝrwun kit su wa. 22Kǝthlǝm fee thlǝ ˈyech inchi yanda wa tandǝ nech kǝ Kǝristi tǝ fǝ shenuˈtǝ tǝ yahti Farta yi lekta nandǝ ɓata. Nandǝ chǝt ǝna saka incha tǝ ǝna lekǝchǝ kaan kǝthlǝm kǝ lǝm ndǝ nafcha. Maa nan chǝt kǝɗu, naa ndǝ lǝm tachaˈan. 23Kǝthlǝm ndaˈan, chokam tǝ tahǝs fa. Tapi mbuˈowunchi ichaˈan nat kǝn fartaˈan ɓata.
Nggǝr ɓati Waˈi Nef kaɗi
24Paɗaa farti ini, kǝrsǝ ɓahtiˈini ha yu,
“ ‘Naa wat fartǝ chǝt kǝ wuthla,
ndǝr paɗ ngee fǝr ɗaˈkǝt ˈyan wa.
25wandǝrichǝ hulafǝrta paɗ nandǝ hǝhatat kaha,
tǝ paktǝ alkǝchiɗi nech hulafǝrta nandǝ rǝɓtǝ fa.’
26Fartǝ ini naa nafchi naa Waˈi Nefa ɓat kah hur husamba tǝ alkǝta, paɗ tǝ kapa maanda kaan. 27Paɗ nan thlǝn fǝ thlinchiyan kǝ ngomandǝ fee tatǝn. Nechandǝ nggaktǝ thlaˈtǝ konggal heshi foɗɗa. Nandǝ ngomandat nat thlaˈtǝ ndukwa heshi kǝ ndukwa hulafǝrta.
Ənɗi nat mǝn chaˈata fi ɗǝftǝ shukwata
28“Nakanya chaˈam ǝn ɗar dǝftǝ shukwata, maa chǝpantǝ saˈchiyan kaɗi mǝthlan nggak chithla, sǝnwun wa fektǝ nduk ha. 29Nechan kǝɗu mǝɗiyon, maa ǝ niwun ichiˈini sǝɓta, kǝ sǝnwun su wa fartǝ ɓati Waˈi Nef kaɗ nduk ha, mǝthlan ǝ miimbeya. 30Kittaˈan nati mbuˈowunda, yuwa heshiɗiya nee thlǝrǝt wa maangga tǝ sǝɓ ichiɗiya nat wa. 31Chǝk mǝ ǝ hulafǝrta tǝ heshi, nan thlǝrǝt tǝ kaɗi, ndiktinchi ngee tam thlǝrǝt kaɗ wa.
Nefsǝ sǝnchǝ fartǝ ɓati Waˈi Nef kaɗ wa
32“Paɗaa kǝ ɓǝra fartaˈan ndu wanshengnan nefsǝ sǝncha wa. Chǝka fǝ thlǝnchi Farta hulafǝrta, ndu Wanan wa, Chinan ndak. 33Kǝ mbǝrwunsi, kǝ chok wun tǝ tahǝsfa. Kǝ nowun shita, Kǝthlǝm sǝnwowun wanshengngǝnɗi naa fartaˈan ɓata wa. 34Chok chan kǝɗ nefa thla nech chǝt wiˈta kǝ yowun haha. Kǝ nakan mal wirˈyan ha fǝrankan chǝka wun mafaɗan ǝnɗi natǝn chǝta. mbuˈankan thla nech pǝk mii mbangngan har yuwa kǝ chok tǝ tahǝsfa.
35“Kǝthlǝm ndaˈan chokam tǝ tahǝsfa. Kǝthlǝm sǝnwowun wan shengngǝnɗi naa thlǝ wuran ɓat kaɗ wa. Ndu kǝɓǝ kaɗ farwita, ndu ɗar wita, ndu ǝ kwarti chemsa ndu walwurta. 36Kǝ ɓǝ tukuthl, kǝ ɓǝ mbǝsowunda kun saˈena wa. 37Ənɗi nati mbuˈowundiya, nggǝt mbuˈandi nafchǝ nat. ‘Chokam tǝ tahǝsfa.’”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Luke Initiative for Scripture Translation