Matiyu 18
18
Wun nech kǝ kapa nafɗi mbǝranchǝ tandǝ nat
(Mar 9:33-37; Luk 9:46-48)
1Ə wanshengngǝn ini kǝmsichiyan ɓakandǝ kǝ thlǝma Yesu. Chǝhankandǝ tǝ ndat wa, “Wun nech kǝ kapa nafɗi mbǝramchǝ tandǝ ha nat, ǝ hur kuturakti hulafǝrta?” 2ˈYakan wan waa, ɗǝf kan ndi kǝ hurɗǝfi tǝ nanda. 3Ndakan wa, “Kittaˈan nggǝt mbuˈowunnda, maangga tǝ nggǝrawun ǝna chich ˈyowun ha, kǝ chok kǝɗ yi wan wancha wa. Nowun tam yim kǝ kuturakti hulafǝrta wa. 4Kǝthlǝm ndaˈan, nat nafɗi nggǝranchǝ indiyan ha kǝɗ wanɗiya, mǝthlan nech kǝ kapa nafɗi mbǝranchǝ tandǝ ha nat, ǝ kuturakti hulafǝrta.
5“Paɗ nat nafɗi thlǝch wan waa kǝɗ thleya kǝthlǝm nggǝta, thlǝt nenchi. 6Paɗ nat thla ɗǝfchǝ artǝ hur wan wanchiɗa, fee fǝr chǝ kit kǝ nenchi, kǝ chǝndǝ ɓǝɓifata. Kwech mǝ kǝ wokan fee kapa ɗakwan fǝndǝ kǝ ɓǝrata, kǝ mǝk fee ndǝ kǝ kwiɗimǝn hawurta.
Ichiɗi nech ɗǝf nef kǝ chǝt ɓǝɓifata
7“Ai i nafchi heshiɗiya, kǝthlǝm ichǝs huran thla nech ɗǝf nafchǝ kǝ chǝndǝ ɓǝɓifata. Weˈtǝ ichiˈini waat kǝ ɓanda, paɗ ai i nafɗi nech kǝ ɗakwan chǝt wansartaˈan.
8“Maa heryo ndu sartiyo thlǝ ɗǝfchan wech kǝ chǝn ɓǝɓifata, thlenkaɗi mǝkan ko kaɗi. Kwechchan mǝ kǝ yimin tǝ shishingndǝ kǝ kuturakti hulafǝrta tǝ her arta ndu sartǝ arta. Mǝ kǝ yimin tǝ harchi chap, ndu sarchǝ chap, kǝ hur waɗi thlǝ lifwakcha. 9Paɗ maa thlǝ ɗǝfchǝ wenitiyo wech kǝ chin ɓǝɓifata, kǝtanko kaɗi mǝkan ko kaɗi. Kwechchan mǝ kǝ yimin tǝ shishingndǝ kǝ kuturakti hulafǝrta tǝ wenitǝ arta. Mǝ kǝ chokin tǝ wenitǝ chap, paɗ kǝ mǝk fee wech kǝ waɗi thlǝ lifwakcha.
Wuɓtǝ ndikta tǝ chohraɗi sakecha
(Luk 15:3-7)
10“Kǝ wathlowunchi ha, mǝ nggǝmwun fa kǝ njirawun chǝka arta kaɗ, hur wanwan chǝɗiya wa. Kǝthlǝm fǝ thlǝnchi Farta yi wanchaˈan tandǝ ɓukwa tǝ Papa ǝ hulafǝrta weenmǝta. 11[Kǝthlǝm nggǝta Waˈi Nefa ɓechi kǝ hǝraˈani fee sakecha.]
12“Mǝ nech kǝ kaɗatˈyowun? Maa nefsi naa chohrech ˈyansi kumchǝt kum (100), paɗ artǝ sakakan, mǝ natǝn chǝta? Nee mal kumchǝt wanherhaˈarta nggǝrsi wanherhaˈartiɗi (99) ha, kǝlaar nggwella mǝɗi natnda, kǝ ɗǝ ka thla sakecha wa? 13Paɗ maa ǝ mbǝsanchi. Kittaˈan nati mbuˈowunda. Naa fat mbǝnandǝ kaan kǝ ɗar thla artǝ yu, mǝni fee kumchǝt wanherhaˈarta nggǝrsǝ wanherhaˈarta (99) fee sakawakchǝ yu. 14Tǝkǝɗu paɗ Chinwun ǝ hulafǝrta yahwasi kǝ sak artǝ hur wanchiɗiya wa.
Maa chuchǝ wanmu thlǝ fǝr kit, ɓǝɓifat fa
(Luk 17:3)
15“Maa chuchǝ wanmu thlǝ fǝr kit, ɓǝɓifat fa, ɗu mbuˈandǝn ǝnɗi chutǝn, chǝ tǝ mǝthlan ichǝt wun. Maa ǝ sǝktǝ wechi, hǝreˈen wanmu. 16Paɗ maa sǝk wa wech wa, tǝru nef in arta ndu chap kǝ nggǝrwun ɗǝt mbǝs ndi. Kǝthlǝm ndech ndikti Farta wa, naa fee mbǝsandǝ kit tǝ shenuˈtaˈan mǝɗi nafchǝ chap ndu mahkan, maa mbuˈndǝ ǝnɗi sǝndǝ ndǝsi kǝ ɗaran. 17Maa ǝ kartǝ sǝk tanda, mbuˈanko takǝt fǝ tǝr mbanchi Farta. Paɗ maa ǝ kartǝ sǝk chika takǝt fǝ tǝr mbanchi Farta, tǝrkowun ndi kǝɗ nafɗi sǝnwakchǝ Farta, ndu kǝɗ thlǝ thlǝt chamnda.
18“Kittaˈan nati mbuˈowunda, nat ǝnɗi kartuwun fa hur heshi, kǝɗu paɗ naa fee kartǝ hulafǝrta. Paɗ nat ǝnɗi nggǝmnduwun fa hur heshi, kǝɗu paɗ naa fee nggǝmɗǝf hulafǝrta.
19“Kǝɗu, nggǝt nggǝr mbuˈowundǝ tǝ ndat wa, maa nafchǝs chap hurwun hur heshi nggǝmandǝ kǝ ɗar nat ǝnɗi shitǝ nda. Papa thla hulafǝrta nan chandǝ tanda. 20Kǝthlǝm nat mǝɗi nggomndǝ nafchǝ chap ndu mahkan hur thlǝmna, nggǝt minni tǝ tanda.”
Wuɓtǝ ndikta tǝ mafaɗi thlǝ kalwakchǝ ǝn ha
21Kǝrsi thlenni, ɓak Biturus kǝ thlǝma Yesu chǝhan kan ndat wa, “Chinda, nechi kal wanmanǝ ha kurmi maa kurɓanchi chǝ ɓǝɓifat fa? Muɗ wa?”
22Nggǝmankǝ Yesu su wa, “Nduwi wa, muɗ wa, paɗ muɗ kurɓandǝ kumchǝt muɗ.
23“Kǝthlǝm ndaˈan, nech kuturakti hulafǝrta kǝɗ kwitira thla yahchǝs kǝ tiyan mafechˈyan wanɗǝɓithlˈyan natǝn para tanda. 24Kǝ nggak kan. Ɓak fee tǝ artǝ kǝmɗiyan thla natǝn parandi wanɗǝɓithl aru kum (10,000) i talenti, (talenti arta seˈ titǝ thlǝ tera hurat kum chǝt chap). 25Kǝthlǝm nee mbahan ti wa. Chat ɗǝf kǝ kuturan, mǝthlan, tǝ nuwan, tǝ wanchiyan, paɗ tǝ ǝnɗi nessiyan nat, kǝ hǝyan fee kaɗ kǝ tiyan fee wanɗǝɓithlˈyan.
26“Chat kopkǝ mafaɗan ha pangngǝnan, shiyankan tǝ ndat wa, ‘Kǝrsu nenchǝ har, ni tiyu chǝka mǝ kaɗi.’ 27Kuturan haɗankǝ mafaɗi fa, kalankan kumataˈan ha, kalkanndǝ ha.
28“Paɗ kǝrsaɗan kǝ chek mafaɗan kesh, mbǝsankan yowun mafata thla natǝn paraˈandi ndǝnari kumchǝt kum (100). Kǝsankan ɓǝratiyan nggakkan yaˈanda, ndangkan wa, ‘Tiyitǝn kumatǝɗi nati parawechi.’
29“Chat shiketǝ terˈyan chamkan kuruminchǝha kǝ pangngǝnan shiyankan tǝ ndat wa, ‘Kǝrsu nenchǝ har, ni tiyu chǝka mǝ kaɗi.’
30“Mafaɗi tǝrkananyu karkan kǝrǝs ndi. Paɗ ɗǝfkan kǝ mǝk fee ndi kǝ pursuna, kǝ fartǝɗi natǝn tiyan wanɗǝɓithlɗi natǝn paraˈndi. 31Kǝ nak takǝɗ shikechǝ fǝ tarchiyan ǝnɗi chǝt maafaɗiya, sǝɓkǝ hwirˈyandǝ kaɗ kaan, ɗǝkandǝ mbuˈandǝ kuturan nat ǝnɗi sǝɓcha.
32“Kǝrsǝ ndaˈan, kuturan thlǝnkan kǝ ˈyan fee ndi ndangkan wa, ‘Chǝ ɓǝɓi mafata, kaluchǝ ha nat ǝnɗi nati parawechi, kǝthlǝm ǝ shiyichin. 33Awi, kǝmwasi kǝ shisheen shiketǝ terˈyosi, kǝɗ ǝnɗi shisheti wech wa?’ 34Hur sǝɓtǝ hwira, kuturan fǝrkan ndi kǝmɗi fǝ para pursunecha kǝ ɓahan fee, se titǝ nat ǝnɗi na fee parandi.
35“Kǝɗu paɗ na Papa hulafǝrta chandǝ chǝkwun hurwun, thla karchǝ kalandǝ wanmanan ha tǝ hwir arta.”
Iliyochaguliwa sasa
Matiyu 18: GQA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Luke Initiative for Scripture Translation
