Matiyu 12
12
Chǝha mee kǝ ɓǝra fartǝ yipti Yahudawecha
(Mar 2:23-28; Luk 6:1-5)
1Ə fartǝˈini, far yipti Yahudawecha. Yesu tǝ kǝmsichiyan mbǝr kandǝ ha tǝ hǝngga alkama. Kǝmsichiyan paɗ mitǝfiˈyanda, nggak kandǝ ɓerǝt wan alkama taˈan, nakandǝ kangnda. 2Kǝ nak Farisiyawechǝ kǝɗu, ndang kanda wa, “No, kǝmsichiyo tandǝ chǝt ǝnɗi ˈyata kusiˈ i Musa kǝ chǝ fee far yipta wa.”
3Nggǝmang kǝ Yesu tanda wa, “Awi, tamwowun changgandǝ ǝnɗi chǝt Dauda tǝ shikechǝ wiˈtiyan, fartǝɗi naa mitǝ fiyanda wa? 4Yimkan Wiri Farta, kangkan kwasaɗi tahsandǝ fee ha. Thla kǝmwakchǝsi chǝka mǝthlan ndu shekechǝ wiˈtiyan kǝ kang nda wa, fǝ pangngǝn chǝ ndak thlǝ kangcha. 5Ndu changgawak nowun ǝ hur kusiˈ i Musa ndat wa, pangngǝncha tǝr wandǝ fartǝ yipta kǝɗ kaa ǝna wa? Paɗ chokwandǝ kǝ fǝ sǝɓanchi kaɗ wa. 6Nggǝt mbuˈowunnda, thla ɓǝranchǝ kǝtǝn shitǝ ha, mǝthlan mǝɗiya. 7Maa tǝ sǝn wun saktǝ nggaˈal ndik taˈan ndat wa, ‘Kafat yahti, ngga thle ɓǝra icha yahti wa.’ Mǝ nowun chakan mee fee chǝwakchǝ ɓǝɓifata wa, chǝndǝ ɓǝɓifata wa. 8Kǝthlǝm nggǝta Waˈi Nefa nggǝt nech kǝ Chinda yi fartǝ yipta.”
Kǝnan Yesu thla saa herˈyan kaɗi
9Malkǝ Yesu minni ha yimkan kǝ hur wur nggomndiyanda. 10Yowun nefsi minni thla saa herˈyan kaɗi. Fowun Farisiyawecha chǝhanka ndǝ mee Yesu ndakanda wa, “Kimsi ǝ kusiˈ i Musa kǝ kǝnan fee yowun kaɗ far yipta wa?” Chihechandǝ mi ini kǝthlǝm kǝ kǝsandǝ tǝ ǝnfa.
11Nggǝmankǝ Yesu tanda wa, “Wun ǝ hurwun naa chohratyansi, hǝm kan kǝ kwiya far yipta. Awi thlǝ chohraɗan nen kǝtan chǝ kesh wa? 12Nefa pǝɗantǝ chohrat ha kaˈan, kǝthlǝm ndaˈan ndiˈchansi kǝ chǝ fee kaakǝta far yipta.”
13Ndang kǝ Yesu nafan wa, “Panan herˈyo ha.” Panan kan ha chat kǝɗu yu kǝn kǝ haran kaɗi, chokkan kǝɗ har thlaa. 14Paɗ chek Farisawechaˈan kesh sakankandǝ ha ǝ mbanɗi nat ndǝ ɓǝllandǝ Yesu.
Ndiiɗ ǝnɗi ha mbuˈtǝ Ishaya
15Kǝ Sǝnkǝ Yesu ǝnɗi nech sǝɓta, malkan minni ha. Parak tertǝ nggomǝn nafchǝ ndi. Kǝnan kan fee nech haˈchan kaɗ nat. 16Tǝɗan kan thlǝmechˈyanda kǝ mbuˈandǝ nef kusheˈtaˈan wa. 17Ichiɗiya chich fee kǝthlǝm kǝ ndiiɗan fee ǝnɗi mbuˈtǝ thlǝ shenuˈtǝ tǝ yahti Farta Ishaya ndat wa.
18“Ə mafatinchiya thla tati,
mǝthlan yahti, thlǝ sǝkchǝ mbǝnanfǝ kaan.
Nii ndiiɗandǝ kaɗ tǝ shemeta,
paɗ nan chak mee yi kit kǝmɗi fee nawakchǝ kǝ Yahudawecha.
19Nee ass inda wa, ndu kǝ shenuˈ tǝ alkǝta wa,
nǝ fee sǝk ɓǝratan ǝ njartǝ mbanchǝɗi pǝthlǝr wurcha wa.
20Kwafɗi nech nduk chet kaɗi, nee chenchǝ kaɗ wa,
Tǝkassɗi nech nduk lifta, nee lifan chǝ wa.
Nechan nat kǝɗuyu kǝ fartǝɗi natǝn chak mee yi kit.
21Fee nawakchǝ kǝ Yahudawech paɗ, nandǝ ɗǝf wanɗǝkaɗat kǝ thlǝman.”
Yesu tǝ kutur hwaˈarcha
(Mar 3:20-30; Luk 11:14-23)
22Ɓan kǝ fee thla na hwaˈarchǝ fiyan shenuˈwa wa, paɗ komnda. Kǝ nan kǝ Yesu kaɗi, nggakkan shenuˈta, tǝ paɗ mǝthlan namǝta. 23Nat nafchaˈan sakandak inda, nda kanda wa, “Thleya, ngga mǝthlan nech kǝ Waˈi Dauda wa?”
24Paɗ kǝ sǝkkǝ Farisiyawechǝ kǝɗu, nda kanda wa, “Tǝ alkǝti kutur hwaˈarcha thlǝ kǝtandǝ nafɗiya hwaˈarchǝ kesh.”
25Nakan tapi sǝn Yesu ǝnɗi nat ndǝ kaɗata, ndangkan tanda wa, “Nat kuturaktǝɗi chakchǝ ha chap, tandǝ chǝt atǝkrechi tǝ raˈan. Paɗ nee mǝn chap wa. Paɗ ndu mǝrɓa ndu wira thla chakchǝ ha chap, tandǝ chǝt atǝkrechi tǝ raˈan, paɗ nee thlar ha wa. 26Maa hweˈrǝ thlǝ kǝtanchan hweˈrǝ kǝsh, tǝn yaandǝ tǝ indiyan hacha. Kǝɗu nech kuturaktǝyan mǝndǝ chap wa kǝni? 27Maa tǝ alkǝti kutur hwaˈarchǝ thlǝ kǝtandi hwaˈarchǝ kesh, tǝ alkǝti wun thlǝ kǝtandǝ kǝmsichiyowun kesh? Kǝthlǝm ndaˈan kǝmsichiyowun nech chakowun mee kǝ ɓǝrataˈan. 28Maa nggǝt thlǝ chǝchi ter tǝ Shemeti hulafǝrta kǝ rǝkani hwaˈarchǝ kesh, awi, kuturakti hulafǝrta ɓi kǝmɗowun ha cha.
29“Nǝ fee mbahǝn yim keuri nefa thla nech kwaˈkwaˈ kǝ haran fee ichiyan wa. Maangga tǝ kǝnan fee kwaɗǝn, kǝn fee mbahǝn kohandǝ ichǝɗi wirˈyan wa.
30“Thla nawakchǝ tǝ nenchi, tǝn kǝ aterekǝtǝna, paɗ nat thla nggomawakcha tǝ nggǝta tǝn wellandǝ kaɗi. 31Kǝthlǝm ndaˈan nggǝt mbuˈowunda, na fee mbahan kallandǝ nafchǝ chǝk yen weˈtǝ ɓǝɓi faɗi chǝt nda. Paɗ nat thla erech Shemeta nǝ fee kalanchǝ ɓǝɓi fat ˈyan ha wa. 32Nat thla ndikchǝ sǝɓtaˈan kǝ ɗar nggǝta Waˈi Nefa naa fee kallandǝ ha. Paɗ nat thla ndikchǝ sǝɓtaˈan kǝ ɗar Shemeta thla chǝɗchǝɗ nǝ fee kallanchǝ ha wa, ndu nakanya ndu yuwa heshiɗi nech ɓata.
Thlǝ sǝnchi fee ɗǝfta tǝ weˈtǝ wanchiyan
33“Maa ɗǝfwun ɗǝftowun kǝn ndiˈchan, nan nggǝt wanchǝ ndiˈchan. Maa ɗǝfwowun ɗǝftowun kǝn ndiˈchan wa, nan nggǝt wanchǝɗi nawakchǝ ndiˈchan. Kǝthlǝm thlǝ sǝnchǝ fee ɗǝfta tǝ weˈtǝ wanchǝɗi thlǝ nggǝttǝn. 34Nakan kun ɓǝɓi nafcha kǝɗ wan pandecha, tǝ kǝn natwun mbuˈ kaa icha? Kǝthlǝm tertǝ ǝnɗi nech hur wanɗikaɗata, ndaˈan thlǝ mbuˈtǝ mee. 35Kaa nefa, mǝt ɗǝf kaa ichi yan ha, thlǝ kǝtanchan kwastǝ ǝn kesh. Ɓǝɓi nefa, mǝt ɗǝf sǝɓtǝ ǝnˈyan ha, thlǝ kǝtanchan sǝɓtǝ ǝn kesh. 36“Kittaˈan nggǝt mbuˈowunda, far chak mee, nat koha shenuˈchǝɗi chǝt nafcha, nan mbuˈ ǝnɗi chich mbuˈtǝndǝ kǝɗu. 37Kǝthlǝm tǝmɗi shenuˈtiyo na fee hǝraˈuta, ndu kǝ kǝnuchǝ fee.”
Fowun nafchǝ kata kǝ pǝnandech fee ǝna saka inda
(Mar 8:11-12; Luk 11:29-32)
38Fowun Farisiyawecha tǝ fǝ chaˈandǝ kusiˈ i Musa kaɗi ndang kanda wa, “Thlǝ chaˈanan kaɗi, yahˈǝnsi kǝ pineˈinchǝn ǝna saka inda. Kǝthlǝm kǝ pǝnaˈanchi wa, ɓecho hulafǝrta.”
39Nggǝmankǝ Yesu tanda wa, “Kun ɓǝɓi nafchi, fǝlaucha, yi yuwa heshiɗiya. Kun kata kǝ pǝnowun chǝ fee ǝna saka inda ǝ hulafǝrta, paɗ nǝ fee pǝnowunchǝ wa. Maangga yi Yunana thlǝ shenuˈtǝ tǝ yahti Farta ndak wa. 40Kǝɗ ǝnɗi mǝndǝ Yunana mahkan wita tǝ farta, mǝthlan hwiri kapa yirfa. Kǝɗu paɗ na nggǝta Waˈi Nefa chǝt mǝndǝ mahkan witǝ tǝ farta ǝ hur kwaa. 41Far chak mee nafchi Neneba nandǝ thlaˈta ɓukwa tǝ nafchi yuwa heshiɗiya, kǝ pǝnandǝ nafchi yuwa heshiɗiya wa chǝ wandǝ keˈke wa. Kǝthlǝm fen tǝrndǝ ha kǝthlǝm ɓasi Yunana. Tǝ paɗ nakanya, thla mbǝranchǝ Yunana ha mǝthlan mǝɗya, paɗ tǝrwowun ha wa. 42Far chak mee, kwitir kǝ nunefa yi hahi Sheba, nan thlaˈtǝ ɓukwa tǝ nafchi yuwa heshiɗiya. Kǝ pǝnanchǝ nafchi yuwa heshiɗiya wa, chǝwandǝ keˈke wa. Kǝthlǝm ɓechan thlaˈtǝ ndukwa heshi kǝ sǝkti mbǝr ndikti kwitira Solomon. Nama paɗ thla ɓǝranchǝ Solomon ha mǝthlan mǝɗya, paɗ tǝrwowun ha wa.”
Nggǝrandi ɓǝɓi shemet in kafi nefa
43“Maa ǝ chi ɓǝɓi shemet kesh fi nefa, thlǝ nechan wiˈtǝ michǝɗi nawaktǝ emsi, kǝthlǝm kǝ mbǝstǝ mǝt yipta. Paɗ ma mbǝswa wa, 44ndakan wa, ‘Ni nggǝrandǝˈin kǝ wurɗinchi maathli ha.’ Kǝ ɓakan nat yowunsi wa, paˈan fee kaɗi, paɗ thlaɗan fee ichiɗi nech wuran. 45Nggǝran kan in kǝ har pongngǝn shemecha muɗ, fee mbǝranchǝ ha tǝ ɓǝɓifata, kǝ ɓandǝ yimndǝsi kǝ chokndǝ ha wuran. Kǝ kǝrsa, chokti nǝfˈini nan mbǝrandǝ thla ha tǝrkwathl kanan. Kǝɗu natǝn nata tǝ ɓǝɓi nafchi yuwa heshiɗiya.”
Man Yesu tǝ wanmanchi Yesu
46Kǝnak Yesu ɗar ndikˈtǝ tǝ nggomnan, manan tǝ wanmanchǝ Yesu tandǝ heshi. Yahndǝ kǝ shenuˈndǝ tǝ ndi. 47Ndangkǝ yowun hur nggomnan wa, “Mu tǝ wanmanchuwa thlarndǝ ha ǝ heshi. Yahndǝs kǝ shenuˈndǝ tǝ wechi.” 48Paɗ nggǝman kǝ Yesu nafan wa, “Wun nech kǝ yaa, paɗ wun nech kǝ wanmanchǝn kǝ hǝssa?” 49Pǝnkan kǝmsichiyan tǝ hera ndakan wa, “Feeya nech kǝ yaa tǝ wanmanchǝna. 50Kǝthlǝm nat thla chich ǝnɗi yahtǝ Papa thla nech ǝ hulafǝrta kǝ cha, mǝthlan nech kǝ wanmana kǝ hǝsnefa, tǝ nunefa, tǝ yaa.”
Iliyochaguliwa sasa
Matiyu 12: GQA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Luke Initiative for Scripture Translation
