LUKA 13
13
Yesu akambeli na bato babongola mitema mpo bakowa
1Ntango eika Yesu nolaki mambi mango, eika na bato baiyo omanteyi ma djunda li bato bakanolaka Yesu mambi emakoswelaka bato baiyo ba etuka ya Galileya. Mokambi ya wetuka ya Loma Pilato abapaka mitindo te ba boma bato bango, ntango eika bango nopeyi Kombo mbeka. 2Yesu abavinyelaka te: Teni bokanisi te bato ba Galilaya bango bakuli mpasi yango mpo baiki bato ba masumu boleki bato ba Galileya bantso? 3Too yo bona ka! Mpona bino mpe boleke oyambola masumu mabino ka, bino bantso bokowa se ndenge yango. 4Tompe Bokanisi te, bato 18 ebawaka ntango ekpaka ndaku ndayi ya Silowe, baleki bato baiyo bantso ba Yelusaleme na masumu? 5Too yo bona ka! Mpona bino boleke obongbana ka, bokowa bino bantso se ndenge yango.
Yesu akambeli lisese mpoli nfete mo figo enfa mpa obota mbuma ka
6Bona Yesu akambelaka lisese eti: Moto moko aika na nfete nfayi mo figo amoyonamaka odjala djaayi li vino, akeke naaka mbuma, kasi too akulaka nanfa loko ka. 7Bona akambelaka na mosali wa djaala te: Lenda, ekosweyi mbula ntsato nakaya naka mbuma li nfete mo figo emubo, kasi too nakakula nanfa lombuma loko ka. Omotena; mpo muma kanga ntse se mpamba. 8Mosali wa djaala amovinyelaka te: Nkolo, omotika waa mbula eye! Nakotima ntse belebiyo na nfango nakomovakela nka li bopoli. 9Eyalaka te moboti mbuma ombula emaya, ana bolamu be. Ndi moleke obotaka, anandi namotena.
Yesu abikiyi nfanyala oyumbemaka omokolo mo Sabata
10Mokolo moko mo sabata, Yesu aika nolaki ondaku ya eyanganelo. 11Nfanyala moko aika ana, aika na molimo mobe, molimo mobe nfango momokoswinyaka na bonkumba leka mbula 18. Ntsima yayi eyumbemaka too aika namakoki mabotemi semba ka. 12Ntango emoboko Yesu, amobiangaka mpe akambeli naayi te: Nfanyala okangolami na mpasi yawu! 13Ontsima Yesu amokelelaka maboko amokati, se ontango yango atemeke sika nebe. Mpe atondoko Kombo. 14Kasi Mokondji wa eyanganelo ayokaka nkele mpo Yesu abikiyaka moto mokolo mo sabata. Bona Mokondji wango akambelaka na djunda li bato django te: Mikolo mio motoba, mpoli bokeli mosala; boyaka, Kombo akobikiya omikolo miango kasi omokolo mo sabata ka. 15Nkolo amovinyelaka te: Moto wa bokosi! Teni, moko wabino too akayutola ngombo djaayi too mpunda djaayi mpo alinyueiya mai omokolo mo sabata ka? 16Bona nfanyala oyobo, ao mokitani wa Abalayama, Satana amokangaka ontse ya bokondji vaayi mbula djomi na nfambi, too yo bolamu ka te akangolama oboombo vango omokolo mo sabata? 17Ntango ekambelaka Yesu ndenge yango baini baayi bantso bakoswaka na ntsoni. Bona bato bantso banyalaka na esengo mpoli mabi mantso ma bokanfeyi emaika Yesu nokeli.
Yesu amakokanisa Bokondji bo Kombo na lombuma lo muntalade
(Mt. 13.31-33 ; Mk. 4.30-32)
18Bona Yesu abauwaka waa te: Bokondji bo Kombo bokokani na eloko nde? Nakoki nobomeka na eloko nde? 19Bokondji bo Kombo bokokani na lombuma lo muntalade moto moko lokpaaka mpe aloyoni odjala djaayi. Lombuma lango lobimaka mpe lokoswaka nfete munene mpendja, mpe nyoni likelaka mumbu olikolo li bitabi bi lango.
Yesu amakokanisa Bokondji bo Kombo na mokemo mo mampa
(Mt. 13.33)
20Yesu akambelaka na bango waa te: Bokondji bo Kombo bokokani waa na eloko nde? 21Bokondji bo Kombo bokokani na mokemo mo mampa nfanyala moko amokpaka mpe amosangisi na nkabo ya faline djunda. Kino ntango efulaka faline wantso.
Bokondji bo Kombo bo bonene kasi ekiko ya vango yo ntini
(Mt. 7.13-14,21-23)
22Bona Yesu aika noleki obingumba mpe omboka, aika nolaki ntango eikayi nokeyi mobembo nfayi oyelusaleme. 23Moto moko amuwaka te: Nkolo, bato ebakobika too bao djunda ka? 24Yesu ayanolaka na djunda li bato te: Bokondji bo Kombo bondibe ndaku eyona ekiko ntinini. Bosengeli nokela makasi mpendja mpo bokpela wekiko yango. Mpo bato djunda bakolinga bakpela wekiko yango kasi too bakokpela ka. 25Ntango ekoteme munkolo wa ndaku, akoliba ekiko, bino bato ebakoyala ondjeyi, bokoyala nobeti ekiko, mpe no mokongi te: Molakisi, oloyutolela! Bona munkolo wa ndaku akobovinyela te: Too nayebi eteli yuti bina ka! 26Bona bokokambela te: Toleiki mpe tonyueiki ekambi nawu, oteyiki mpe obabala ba mboka ya biyo! 27Kasi akobovinyela te: Nakambeli nabino, too naboyebi ka, too nayebi mpe eteli yuti bino ka! Bolongba oboo bongai, bino bantso bato bakakela bobe! 28Bona bokolela mpe bokoswa mino na nkelele, mpo boko bo Abalayama, Isaka, Yakobo, mpe Basakoli bantso omanteyi ma Bokondji bo Kombo, kasi bino meni bokolongolama. 29Bato bantso ebao Bayuda ka, bakouta omokili muntso bakole onteke ya Bokondji bo Kombo. 30Bato baiyo ebabononi te too bao nantina ka sikanga, bakoyala bato banene be ontango yango, mpe Bato baiyo ebama bonono nantina sikanga, too bakoyala nantina ka ontango yango.
Yesu amalela mpoli bato ba Yelusaleme
(Mt. 23.37-39)
31Se ontango yango Bafalisayo baiyo bakoswaka ana mpe bakambelaka na Yesu te: Tomakopa ntsango te olongbanga weteli ebo, mpo Mokondji Elode amaka nokoboma. 32Kasi Yesu akambelaka na bango te: Elode wango aondibe lokpii lo mayele mabe! Bokeke na mokanola te: Nakobenginya milimo mibe na nguya mpe nakobikiya bato nanfa ntango ntini, mpe kalabe weyi nakoilinya mosala mo ngai. 33Esengeli nakoba mobembo mo ngai nanfa mikolo mitinini miyo, mpo nakoswa wengumba ya Yelusaleme. Mpo Yelusaleme abononi ndibe eteli ekawa Basakoli bantso. 34Ee! Naona mawa be mpoli bino, bino bato ba Yelusaleme! Bobomi Basakoli mbala be! Bato baiyo ebabotomelaka Kombo bobateyi mabanga. Nalingiki, bobobateli mbala be se ndenge ekabatela nyango wa ntsoo nobatela bana baayi ontse ya mapapu maayi kasi too boiki nontiki ka te nakelabona. 35Yango mambi emabo makosalema, Kombo akobosundola awu na engumba yayu. Too bo kombo waa ka kino bokokambela te: Kombo apambola moto okoya na nkombo yayi!
Iliyochaguliwa sasa
LUKA 13: LIE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Likila Bible by Beyond Translation is licensed under Creative Commons Attribution-ShareAlike 4.0 License.
