Mareke 3
3
Baghala wu oneŋene kwogho
(Mat 12.9-14; Luk 6.6-11)
1Yiisu áfiriyisomo mu nzo a lisamana a ba-Dzwife. Omo óli ya baghala mutsyini wu óneŋene kwogho. 2Baara bákatala Yiisu mu omono kala ti nde ákaadzuhu nde mu etsughu kii sabate mpaala babagha ndagha yi baafwunu nde. 3Mu obo Yiisu ályele kundaa baghala wu óneŋene kwogho ti: «Temene ŋa, ŋa kara li baara bwohono!» 4Ŋa mbihi oŋo nde áfwulu bo ti: «Nki ndagha bágwi muswa mu etsughu kii sabate? Osa bubwe bwunu we osa bubi, obvwuhu bumweẽ bwunu we odzwa?» Lo bo ka bátsughu ndagha o. 5Mu obo, Yiisu átala bo bwohono ya nkehe, ya ámono nyiĩ yi alagha mu nkooro a mikolo ngyi mi bo ya ályele baghala munde ti: «Labala kwogho e we!» Nde álabala kye ya kwogho e nde ébvughuru bu éli nsomo.
6Bu basaapala, ba-Faridzyẽ bábvuŋunu ya baara baba emvuŋunu ki Erode mu osagha mayele ma baadzwa nde.
Yiisu dzuhu babyele balagha
(Mat 4.25; 12.15-16; Luk 6.17-19)
7Yiisu ágyene ku bele a mubu wu a Ngalile ya binduono bi nde. Mpwumu a baara yi nene yínama nde. Yo yífi ku bitsulu bi mansie bibi Ngalile ya Yude, 8ku bvulu lili Yerusaleme, ku etsulu e nsie kii Idume, ku mala mama mu ngulu a nzala yi a Dzurudẽ, ya ku bitsulu bi mansie bibi ku bele a mabvulu mama ku Tire ya Sidõ. Mpwumu a baara yi nene oyo yígyi kundaa nde, mu ku yígyughu mandagha mwohono ma ákagyili nde.
9Nde ályele kundaa binduono bi nde bitwulu nde bwara, mu kuulu mpwumu a baara yinyaã osa nde mpiŋi. 10Mu kuulu, buulu Yiisu ákadzuhu baara balagha, babyele bwohono bákagyighiri mu nyuru a nde ya bákasagha obyeme nde. 11Ŋa ókamono nde mifulu mi mibi, mye míkabwa mu nsie ŋa nkulu nde ya míkakehe engubu ti: «We, we li Mwana a Nzaami!» 12Lo nde ákatswa mye mukele mu ebaghala mpaala minyaã olyele nde na ali.
Yiisu suolo bantumu kwumu ya buolo
(Mat 10.1-4; Luk 6.12-16)
13Ŋa mbihi oŋo, Yiisu ákumu ku yulu a munguo. Nde áti babo ba ásuolo nde mbili ya bo bágyi kundaa nde. 14Nde ásuolo kwumu ya buolo (12) ŋa kara li bo ya ágwi bo nkwumu yi a bantumu mpaala bakala ya nde ya mpaala nde agweghe bo bayitsala Nsia yi Mbwe, 15ya lileene lili obyi mifulu mi mibi.
16Ma me Makwumu ma bantumu ya buolo (12) ba ásuolo nde: Simõ wu ágwi nde nkwumu yi a Piere, 17baana ba Nzebede: Dzake ya Dzã mbwee a nde, ba ógwi Yiisu nkwumu yi a Bowanerengese, mbaala ti «baana ba nganzele», 18Andere, Filipe, Baretelemi, Matye, Toma, Dzake mwana a Alafe, Tade, Simõ musi kana, 19ya Yuda Isikaryote munde wu áatyeghe Yiisu.
Badzighi ba Yiisu bayigwolo nde
20Ŋa mbihi oŋo Yiisu ábvughuru ku nzo, ya mpwumu a baara yífiribvuŋunu oŋo, mu obo Yiisu ya binduono bi nde ka báleene odza o. 21Badzighi ba Yiisu bu bagyughu obo, bágyi mu ogyagwolo nde, mu kuulu bo bákalyele: «Nde ka li mu ofirikasoolo mandagha ma ali mu okagyighili o.»
Yiisu gwi mvuru kundaa ba baakakwighi nde mandagha
(Mat 12.22-32; Luk 11.14-23; 12.10)
22Baluo-mikyene ba báfi ku Yerusaleme bákalyele ti: Nde li a «Beledzebule. Me mu lileene li mfumu a mifulu mi mibi nde ali mu okabyi mifulu mi mibi.»
23Yiisu áti bo mbili ya ábwi obili ya bo mu mankumu: «Bunu-abo Satana akughu ofiribyi Satana? 24Kala ti baara ba emfumu emõ bakaghaba mu odzwana mvulu bo-a-bo, emfumu ekye ka egyili o. 25Ya kala ti baara ba dzumu limõ badzwana bo-a-bo, dzumu lilo ka ligyili o. 26Mu obo kala ti Satana temene nsumu ya ndeme, nde li wu aakaghaba ya ndeme, lileene li nde ka likughu ogyili o, ya nde aasughu. 27Ka oli a mbwuru wu kughu osomo mu nzo a mbwuru nga-a-mpini ya gwolo bilogho bi nde, kala ti ka tswama kuru nde misyi o. Kala ti nde kuru nde misyi, nde kughu obiri bilogho byehene bi bili munsa nzo a nde.
28Mu engaŋma me ndyele be ti: Nzaami sa asa masumu mwohono kolokolo, ngu okala otsaala ku ookatsaala baara, 29lo nswe mbwuru wu aatsaala Mufulu a Ngili si okala ka bunu, ka kughu obagha kolokolo o. Nde li a ebili kii lisumu lili mibvu ya mibvu.» 30Yiisu ábili obo mu kuulu bo bákalyele ti nde li a mufulu wu mubi.
Ngu dzumu li Yiisu
(Mat 12.46-50; Luk 8.19-21)
31Ŋa mbihi oŋo ngughu ya bambwee ba Yiisu báyato. Bo báli ku mbala ya bágweghe mbwuru mu oyita nde mbili. 32Mpwumu a baara yíbwi nsini ya yísi Yiisu ŋa kara, ya bályele nde ndiri: «Ngughu a we, bambwee ba we ya bankele ba we bali ku mbala, bo bali mu okasagha we». 33Yiisu ábvuhulu ndiri: «Nande li ngughu ya bana bali bambwee ba me?» 34Bu atala baara ba báli mu mambee-mambee, nde ályele ti: «Ba me bangughu ya bambwee ba me. 35Mu kuulu, nswe munde wu aasa waa li Nzaami, munde mbwee a me, nkele a me ya ngughu a me.»
Iliyochaguliwa sasa
Mareke 3: txy TEC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024 (Active) Wycliffe Bible Translators, Inc. All rights reserved.
