Jang 9

Brah Jê-sus tơmbah bnih tiah a mhei lgơơch

1Plah han a troong, Brah Jê-sus sau mbu bnih tiah ơơm a mhei lgơơch. 2Bơl jơrnơ ôp Pang: “Ơi Yau, 'bơơn laa bnih ja lơh dôih, bnih au laa mei bươp bu nei, tak lơh bu nei mhei lgơơch ja dol tiah?” 3Brah Jê-sus ơh: “'Bưn geh đươm bi au, paich mei bươp bu ja lơh dôih; dôh jah kaar Brah Ưn ri kươt tơrsau knông bu nei. 4Plah nha dang nar, bơl bơn phrui lơh pal kaar Yaang ja maanh Hei; mang tơt, 'bưn geh 'bơơn awap lơh kaar kươt. 5Plah Hei nha gôq swich teh, Hei laa rơn aang swich teh ri.”#Mat 5:14; Ja 8:12. 6Ja mor, Pang chhoh u teh, pơih daak kơrsoh wat but bok u pot teq u pi mat bnih tiah, 7ja nei maanh bu nei: “Phrui han u rao ktôk tơrlung Si-lô-ê” (sêr au geh rơih laa “kươt maanh han”). Bei nei, bu nei han u rao, ja nei plơq kơơi kươt sau. 8Gơna poh u bơl bnih noor tôw ja sau bi han dan sa, mor laah: “Au geh dip laa bnih nha gôq dan sa nei 'bưn?” 9Bnih nei mor: “Ngan laa bu nei;” nak leet maanh: “'Bưn geh, dôh laa di mbu rkhơt bei bu nei.” Nha bu nei mor: “Nơơm hei au.” 10Bu ôp bu nei: “Bei nei, lơh bei êch pi mat bi leet pơơk kươt?” 11Bu ơh: “Di mbu chhak laa Jê-sus ja wat bok pot teq u pi mat hei, u maanh hei phrui han tơt tơrlung Si-lô-ê baah rao. Bei nei hei ja han, rao u kươt sau.” 12Bu leet ôp: “Bu nei a êch?” Bi ơh: “Hei 'bưn gưt.”

13Bu liêu bnih noor tôw dol tiah lôh u bơl bnih Pha-ri-si. 14Nar Brah Jê-sus wat bok u pơơk pi mat aan bnih tiah laa nar sa-'bat. 15Bơl bnih Pha-ri-si leet ôp bi kươt aang mat bei êch. Bi ơh: “Bu nei pot bok teq u pi mat hei, hei rao, ja nei kươt sau.” 16Pal du knông phung Pha-ri-si mor: “Bnih au 'bưn geh lôh a Brah Ưn, đươm 'bưn prap nar sa-'bat.” Nak nday nei lah: “Mbu bnih dôih 'baap neh awap kươt pal chmlih chmleek bei nei?” U lwah bu geh baak pơrlang khach. 17Bei nei, bu leet ôp bnih tiah: “Nha bi, bi mor ơơn teq u bnih ja lơh aan bi aang mat?” Bi ơh: “Bu nei laa di mbu grnưt noor.”

18Đươm bei nei, bnih Jo-thai 'bưn jơ bnih au noor tôw laah tiah pa bei au leet kươt sau, aan tơt bu khuôl mei bươp bu nei lôh 19u ôp laah: “Au geh dip laa koon klau bơl 'bei, bnih pa bơl 'bei mor ja lah tiah a mhei lgơơch 'bưn? Nei a hay bei au bi nei leet sau kươt?” 20Mei bươp bu nei ơh: “Bơl hei gưt au laa nơơm koon klau bơl hei, koon dol tiah a mhei lgơơch. 21Dôh bei au lơh bei êch koon kươt sau nei bơl hei 'bưn gưt. Bơl hei kot 'bưn gưt 'bơơn ja pơơk pi mat aan koon. Bơl ay khang ôp koon, koon ja sơp snam hơơi, bu a kươi mor êêng.” 22Mei bươp bnih tiah mor bei nei đươm n'hông bnih Jo-thai, đươm bnih Jo-thai ja ta mor laah mơq 'bơơn chôôl Brah Jê-sus laa Yaang Krist nei dol nduul rlach nhi pơrgum. 23Đươm nei, mei bươp bnih tiah mơ mor: “Koon sơp snam hơơi, khang ôp bu.”

24Di wưt dơq, bơl bnih Pha-ri-si leet khuôl bnih noor tôw ja dol tiah, u mor: “Phrui tư wơơl Brah Ưn! Bơl hei gưt bnih au laa bnih geh dôih.” 25Bi ơh: “Hei 'bưn gưt bu nei geh laa bnih geh dôih 'bưn. Dôh hei dơơn gưt di ntil, nei laa noor tôw hei tiah bei au na nei hei kươt sau.” 26Bu ôp nha: “Bu nei ja lơh ơơn aan bi? Bu nei ja pơơk pi mat bi hơơi laang?” 27Bu ơh: “Hei ja mor n'hai bơl ay hơơi pa bơl ay 'bưn êch iat. A hay bơl ay leet êch iat dơq? Geh lah bơl ay kot êch but jơrnơ bu nei ri 'bưn?” 28Bu jam joot bu nei u mor: “May mơ lah jơrnơ bu nei ri, đươm bơl bơn laa jơrnơ Môi-se ri. 29Bơl bơn gưt Brah Ưn ja lah n'hai Môi-se, dôh teq u bnih au nei bơl bơn 'bưn geh gưt lôh a êch.” 30Bnih tiah ơh: “Bnih ja pơơk pi mat aan hei baah bơl ay 'bưn gưt lôh a êch nei laa di kaar êêng. 31Bơl bơn gưt Brah Ưn 'bưn iat bơl bah geh dôih, dôh mơq 'bơơn đing mbaanh Pang, u lơh tênh rnđêch Pang nei Pang iat bnih nei. 32A khal hư tơt khal au, ndah ơơm ttang mor geh 'bơơn pơơk pi mat aan bnih tiah a mhei lgơơch. 33Mơq bnih au 'bưn lôh a Brah Ưn nei 'bưn geh lơh kươt ơơn ơơm.” 34Bu ơh: “Leq koon bnih may ri ơơm lgơơch knông dôih 'baap baah nha êch kne bơl bơn neh?” Ja nei bu prơh bu nei sot a gaaih.

35Brah Jê-sus ttang bu ja prơh bu nei sot, mơ tơt a mơp bu, Pang ôp: “Bi geh jơ Koon Bnih#9:35 Koon Bnih: Knông m'baak plơơp 'bian ti laa Koon Brah Ưn. 'bưn?” 36Bu ơh: “Ơi Brah, bnih nei laa 'bơơn, jah hei geh awap jơ teq u bnih nei?” 37Brah Jê-sus ơh: “Bi ja sau bnih, u nei laa bnih plah mor n'hai bi.” 38Bi mor: “Ơi Brah, hei jơ,” ja nei smbah Pang. 39Brah Jê-sus mor: “Hei lôh swich teh au jah pơrkat, tak lơh aan bnih tiah kươt sau, nha bơl bah sau leet but tiah.”

40Bơl bnih Pha-ri-si plah gôq dơơh nei ttang bei nei mor n'hai Pang: “Bơl hei kot tiah leq neh?” 41Brah Jê-sus ơh: “Mơq bơl 'bei tiah nei 'bưn geh dôih ơơn, dôh đươm bơl 'bei mor: ‘Bơl hei sau,’ mơ dôih bơl 'bei nha ơơm.”

Iliyochaguliwa sasa

Jang 9: SBL2024

Kuonyesha

Shirikisha

Nakili