ଜହନ 20
20
ଜିସୁ ହାଅନ୍ତାୱାଟି ନିଙ୍ଗନ୍
(ମାତିଉ ୨୮:୧–୮; ମାର୍କ ୧୬:୧–୮; ଲୁକ ୨୪:୧–୧୨)
1ପାଲୁତି କାହେତ୍ ୱାରା ଡାଃଏସ୍ ମାହୁ ମାହୁତାୱା ମଗ୍ଦଲିନି ମରିୟମ ଗ୍ରିପାଙ୍ଗୁଟି ରେଃଏସ୍ ୱାନାହି ଗ୍ରିପାଙ୍ଗୁଟିତାୱା ମୁଚ୍ଚି କିଆଚ୍ଚି ୱାଲ୍ଲି ଦୁରାନ୍ନାଦା ହୁଡ଼ିତେ । 2ଏଦାକି ଏଦି ଡେହାନ୍ ହାଜ୍ଜାନାହି ସିମନ ପିତର ଅଟେ ଜିସୁ ଇନ୍ଦାରିକି ଜେଡା କିଚ୍ଚେଞ୍ଜି, ଏ ବିହି ଗ୍ରାମ୍ୱାଗାଟାଞ୍ଜି ରେଃଏସ୍ ୱାତେ, ଆଟେ ଏୱାରିକି ୱେସ୍ତେ, ଏୱାରି ଗ୍ରିପାଙ୍ଗୁଟିତାୱାଟି ଦାର୍ମୁନିକି ଅଆନ୍ନେରି, ଆଟେ ଏୱାଞ୍ଜିକି ଇମ୍ୱିନାୱା ଇଟ୍ଟାନ୍ନେରି, ଏଦା ମାମୁ ପୁଞ୍ଜେହେଃଲ୍ଲାମୁ । 3ଏମ୍ୱାଟି ପିତର ଅଟେ ଏ ବିହି ଗ୍ରାମ୍ୱାଗାଟାଞ୍ଜି ଗ୍ରିପାଙ୍ଗୁଟିଇନ୍ଦା ହାଲ୍ବନ୍ ବାଗା ହତେରି । 4ଏୱାରି ରିଃଆରି ରୱାଡେ ଡେହନ୍ ମ୍ରାସ୍ତେରି, ମତ୍ର ଏ ବିହି ଗ୍ରାମ୍ୱାଗାଟାଞ୍ଜି ପିତରନିକି ବେତକ୍ କିଆନ୍ ୱିର୍ନା ଡେହାନ୍ କାହେ ଗ୍ରିପାଙ୍ଗୁଟିଇନ୍ଦା ହାଚ୍ଚେଞ୍ଜି, 5ଆଟେ ପ୍ଲାଙ୍ଗାନାହି ଲାଃଇ ମୁଚ୍ଚି କିଆଚ୍ଚି ଜିଡି ଜିରାଙ୍ଗ୍ ହାବେ ମାଚ୍ଚାଦାଃଆ ହୁଡ଼ିତେଞ୍ଜି, ମତ୍ର ଏୱାଞ୍ଜି ଲାଃଇ ହଃଲ୍ଲାତେଞ୍ଜି । 6ଡେଗ୍ଗା ସିମନ ପିତର ୱାଡ଼େ ତା ବେତ ବେତଟ୍ ୱାନାହି ଏତାତେଞ୍ଜି, ଆଟେ ଗ୍ରିପାଙ୍ଗୁଟି ଲାଃଇ ହଲ୍ଜାନାହି ହୁଡ଼ିତେଞ୍ଜି ଜେ, ଜିଡି ଜିରାଙ୍ଗ୍ ସ୍ରୁଆଚ୍ଚୁ, 7ଆଟେ ଏୱାଞ୍ଜ୍ତି ତ୍ଲାଉତାୱା ଇମ୍ୱିନ୍ ଚେଦର୍ ଗାସାଚ୍ଚେରି, ଏଦି ଜିଡି ଜିରା ଡ଼ାହି ମାନ୍ନେଟେଃଏ ବିହି ରଣ୍ଡା ଗର୍ରିତାୱା ମୁଚ୍ଚି ଆନ୍ ମାଚ୍ଚେ । 8ଏଦିମ୍ୱା ଇମ୍ୱିନ୍ ବିହି ଗ୍ରାମ୍ୱାଗାଟାଞ୍ଜି କାହେ ଗ୍ରିପାଙ୍ଗୁଟି ରେଃଏସ୍ ୱାଚ୍ଚେଞ୍ଜି, ଏୱାଞ୍ଜ୍ ୱାଡ଼େ ଲାଃଇ ହଲ୍ଜାନାହି ହୁଡ଼ିତେଞ୍ଜି ଅଟେ ମାଞ୍ଜାଡ଼ି କିତେଞ୍ଜି; 9ଇନାକି ହାଅନ୍ତାରି ତାୱାଟି ଏୱାଞ୍ଜିକି ଜେ ନିକ୍ପନ୍ ଆନେ, ଦର୍ମପୁତିତି ଇ ବାକ୍ୟ ଏୱାରି ଏଚି ଟିକ୍ନା ପୁଞ୍ଜାହେଃଲ୍ଲାତେରି । 10ଡେଗ୍ଗା ଗ୍ରାମ୍ୱାଗାଟାରି ରିହିକ୍ ତା ଇଜ୍ଜା ହାଚ୍ଚେରି ।
ମରିୟମନିକି ଜିସୁ ତଞ୍ଜୁ ଆଅନ୍
(ମାତିଉ ୨୮:୯–୧୦; ମାର୍କ ୧୬:୯–୧୧)
11ମତ୍ର ମରିୟମ ଡ଼ି ଡ଼ି କାଟ ଗ୍ରିପାଙ୍ଗୁଟି ରେଃଏସ୍ ଡିଡ୍ଡାନ୍ ବାସାଆତେ; ଆଟେ ଡ଼ି ଡ଼ି ଏଦି ପ୍ଲାଙ୍ଗାନ୍ ଗ୍ରିପାଙ୍ଗୁଟି ଲାଃଇ ମେହ୍ତେ, 12ଜିସୁତି ଗାଣ୍ଡି ଇମ୍ୱିନ୍ ଗର୍ରିତାୱା ଇଟ୍ଟାଚ୍ଚେରି, ଏମ୍ୱା ତ୍ଲାଉ ରେଃଏସ୍ ରଃଅଞ୍ଜି ଅଟେ କାଟ୍କା ରେଃଏସ୍ ଆଟେ ରଃଅଞ୍ଜି, ଏହେଙ୍ଗିସି ରି ଗାଣ୍ଡି ହୁକୁଲ୍ ଗତାଙ୍ଗ୍ ମେଦ୍ଦାନ୍ନି ଦୁତନିକି କକ୍ଚାଚ୍ଚାନାଦା ହୁଡ଼ିତେ । 13ଏୱାରି ଏୱାଡ଼ିକି ୱେଚ୍ଚେରି, “ଏ ଆଚାଲୁ, ଇନାବାଗା ଡ଼ିଞ୍ଜି ?” ଏଦି ଏୱାରିକି ୱେସ୍ତେ, “ଏୱାରି ନା ଦାର୍ମୁନିକି ଅଆନ୍ନେରି, ଆଟେ ତାଙ୍ଗେ ଇମ୍ୱିନ୍ ଗର୍ରିତାୱା ଇଟ୍ଟାନ୍ନେରି, ଏଦା ନାନୁ ପୁଞ୍ଜେହେଃଲ୍ଲାନୁ ।”
14ଏଦି ଇଦା ୱେସାନ୍ ବେତକ୍ ମ୍ଲିଆନ୍ ଜିସୁନିକି ଡିଡ୍ଡାଚ୍ଚାନ୍ନାଦା ହୁଡ଼ିତେ, ମତ୍ର ଏୱାଞ୍ଜ୍ ଜେ ଜିସୁ, ଏଦା ପୁଃନ୍ନାତେ । 15ଜିସୁ ତାଙ୍ଗେ ୱେସ୍ତେଞ୍ଜି, “ଏ ଆଚାଲୁ, ଇନାବାଗା ଡ଼ିଞ୍ଜି ? ଇନ୍ଦାରିକି ଦାହ୍ପିଞ୍ଜି ?” ଏଦି ଏ ଗାଡ଼ା ଜପନ୍ତାଞ୍ଜି ଇଞ୍ଜାନ୍ ଏଲୁ କିଆନ୍ ୱେସ୍ତେ, “ଆଗ୍ୟାଁ, ନିନୁ ଜଦି ଏୱାଞ୍ଜିକି ଅଆଞ୍ଜି, ଏହେଙ୍ଗ୍ ଆତେସି ଏୱାଞ୍ଜିକି ଇମ୍ୱିନ୍ ଗର୍ରିତାୱା ଇଟ୍ଟାଞ୍ଜି, ନାଙ୍ଗେ ୱେସ୍ତାମୁ, ଆଟେ ନାନୁ ଏୱାଞ୍ଜିକି ଅଆନ୍ ହାଃଇ ।”
16ଜିସୁ ଏଦାଡ଼ିକି ୱେସ୍ତେଞ୍ଜି, “ମରିୟମ ।” ଏଦି ତା ପାଟ୍ଟି ମ୍ଲିଆନାହି ଏବ୍ରି କାତାଟି ଏୱାଞ୍ଜିକି ୱେସ୍ତେ, “ରାବ୍ବୁନି” ଇଚ୍ଚେସି, “ଏ ଗ୍ରାପାଗାଟାତି ।”
17ଜିସୁ ଏଦାଡ଼ିକି ୱେସ୍ତେଞ୍ଜି, “ନାଙ୍ଗେ ଆହାନ୍ କିଟ୍ଟାଦାଃଆ, ଇନାକି ନାନୁ ହାଦାଡ଼ି ଟିକ୍ନା ଆବାତି ରେଃଏସ୍ ୱାନ୍ଦା ହାଜ୍ଜାହେଃଲ୍ଲାନୁ; ମତ୍ର ନା ଆମ୍ୱେସାଙ୍ଗା ରେଃଏସ୍ ହାଜ୍ଜାନ୍ ଏୱାରିକି ୱେସ୍ମୁ, ନାନୁ ନା ଆବା ଅଟେ ମି ଆବା, ନା ମୁଲାପେନୁ ଅଟେ ମି ମୁଲାପେନୁତି ରେଃଏସ୍ ହାଜ୍ଜିମାଃଇ ।” 18ମଗ୍ଦଲିନି ମରିୟମ ହାଜ୍ଜାନ୍, ନାନୁ ଦାର୍ମୁନିକି ହୁଡ଼ାମାଃଇ, ଆଟେ ଏୱାଞ୍ଜ୍ ନାଙ୍ଗେ ଇ ହାବେତ୍ କାତା ୱେସାଞ୍ଜାନେଞ୍ଜି ଇଞ୍ଜାନ୍ ଗ୍ରାମ୍ୱାଗାଟାରିକି କବର ହିତେ ।
ଗ୍ରାମ୍ବାଗାଟାର୍ନିକି ଜିସୁ ତଞ୍ଜୁ ଆଅନ୍
(ମାତିଉ ୨୮:୧୬–୨୦; ମାର୍କ ୧୬:୧୪–୧୮; ଲୁକ ୨୪:୩୬–୪୯)
19ଏ ଦିନା ଇଚ୍ଚେସି, ପାଲୁତି କାହେତ୍ ଦିନା ମିଡ୍ଡଡ଼୍ ତୁକାତାୱା ଏଚ୍ଚିକିଃଆ ଗ୍ରାମ୍ୱାଗାଟାରି ଇମ୍ୱିନ୍ ଇଡ୍ଡୁତାୱା ମାଚ୍ଚେରି, ଜିହୁଦିଙ୍ଗ୍ତି ଗାମିନାରିନିକି ଆଜ୍ଜାନାହି ଏଦିମ୍ବାତି ଦାରାଙ୍ଗ୍ ହାବେ ଟୁଟ୍କାନ୍ ମାଚ୍ଚେରି, ଏଚିତୁକାତାୱା ଜିସୁ ୱାନ୍ ମାଦ୍ଦି ଡିଡ୍ଡାନ୍ ଏୱାରିକି ୱେସ୍ତେଞ୍ଜି, “ମି ପାଟ୍ଟି ଲତୁ ଆପାକାଦି ।” 20ଆଟେ ଇଦା ୱେସାନ୍ ଏୱାଞ୍ଜି ଏୱାରିକି ତା କାସ୍କା ଅଟେ କେରି ତସ୍ତେଞ୍ଜି । ଏମ୍ବାଟି ଗ୍ରାମ୍ୱାଗାଟାରି ଦାର୍ମୁନିକି ହୁଡ଼ାନ୍ ରାହାଙ୍ଗ୍ ଆତେରି । 21ଜିସୁ ଏୱାରିକି ରିହିକ୍ ୱେସ୍ତେଞ୍ଜି, “ଏୱାର୍ ପାଟ୍ଟି ଲତୁ ଆପାକାଦି; ଆବା ଇନିସ୍କି ନାଙ୍ଗେ ପାଣ୍ଡାଞ୍ଜାନେଞ୍ଜି, ନାନୁ ୱାଡ଼େ ଏହେଙ୍ଗିସି ମିଙ୍ଗେ ପାଣ୍ଡେଞ୍ଜାଆ ।” 22ଏୱାଞ୍ଜି ଇଦା ୱେସାନ୍ ଏୱାର୍ କୁଃଏଟି ନେସ୍ତେର୍ ପିହାନ୍ ଏୱାରିକି ୱେସ୍ତେଞ୍ଜି, “ପିର୍ନି ଡିଙ୍ଗାତିଦି ଗ୍ରହନ କିଦୁ । 23#ମାତି ୧୬:୧୯; ୧୮:୧୮ମିରୁ ଜଦି ଇନ୍ଦାର୍ତି ପାପ ମାକ୍ସାଡ଼ି କିଦେରି, ଏୱାଞ୍ଜ୍ତି ପାପ ମାକ୍ସାଡ଼ି ଆନେ; ଆଟେ ଇନ୍ଦାର୍ତି ପାପ ମାକ୍ସାଡ଼ି କିଃଏରି, ଏୱାଞ୍ଜ୍ତି ପାପ ମାକ୍ସାଡ଼ି ଆଃଏ ।”
ଜିସୁ ଆଟେ ତମାସ
24ମତ୍ର ଜିସୁ ଏଚ୍ଚିକିଃଆ ୱାଚ୍ଚେଞ୍ଜି, ଏଚିତୁକାତାୱା ବାରାଗାଣ୍ଡି ତାୱାଟି ତମାସ ପାରୁତି ରଃଅଞ୍ଜି, ଇନ୍ଦାରିକି ଦିଦୁମ ଇଞ୍ଜିଚ୍ଚେରି, ଏୱାଞ୍ଜ୍ ଏୱାର୍ ଡ଼ାହି ହେଃଲ୍ଲାତେଞ୍ଜି । 25ମତ୍ର ବିହି ଗ୍ରାମ୍ୱାଗାଟାରି ତାଙ୍ଗେ ୱେସ୍ତେରି, “ମାମୁ ଦାର୍ମୁନିକି ହୁଡ଼ାନ୍ନାମୁ ।” ମତ୍ର ଏୱାଞ୍ଜ୍ ଏୱାରିକି ୱେସ୍ତେଞ୍ଜି, “ଏୱାଞ୍ଜ୍ତି କାସ୍କାତାୱା ହାପ୍କାତି ତୁର୍ରି ହୁଡ଼ାତେସି ଅଟେ ଏ ଗର୍ରିତାୱା ନା ୱାଞ୍ଜୁ ଡ଼ାହି ଡିଃଗାତେସି ଆଟେ ଏୱାଞ୍ଜ୍ତି ଗାଜା ଆଚି ଗର୍ରିତାୱା କାଜ୍ଜୁ ଡ଼ାହି ଡିଃଗାତେସି ନାନୁ ଏଚ୍ଚେକ୍ ମାଞ୍ଜାଡ଼ି କିଃଆନୁ ।” 26ଆଟ୍ଟା ଦିନାଟି ଏୱାଞ୍ଜ୍ତି ଗ୍ରାମ୍ୱାଗାଟାରି ରିହିକ୍ ଇଡ୍ଡୁ ଲାଃଇ ମାଚ୍ଚେରି ଅଟେ ତମାସ ଏୱାର୍ ଡ଼ାହି ମାଚ୍ଚେଞ୍ଜି । ଦାରାଙ୍ଗ୍ ହାବେ ଟୁଟ୍କାନ୍ ମାଚ୍ଚି ତୁକାତାୱା ଜିସୁ ୱାନ୍ ଏୱାର୍ ମାଦ୍ଦେ ଡିଡ୍ଡାନ୍ ୱେସ୍ତେଞ୍ଜି, “ମି ପାଟ୍ଟି ଲତୁ ଆପାକାଦି ।” 27ଡେଗ୍ଗା ଏୱାଞ୍ଜି ତମାସନିକି ୱେସ୍ତେଞ୍ଜି, “ନି ୱାଞ୍ଜୁ ତାଚ୍ଚାନ୍ ନା କାଜ୍ଜୁତାୱା କିଟାମୁ ଅଟେ ହୁଡ଼ାମୁ ଅଟେ କାଜ୍ଜୁ ତାଚ୍ଚାନ୍ ନା ଗାଜା ଗର୍ରି ଡିଗିଦାମୁ; ମାଞ୍ଜାଡ଼ି କିହେଃଲ୍ଲାନାଞ୍ଜି ଆଃଏଟେଃଏ ମାଞ୍ଜାଡ଼ି କିଅନ୍ତାଞ୍ଜି ଆମୁ ।” 28ତମାସ ଏୱାଞ୍ଜିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ନା ଦାର୍ମୁ, ନା ମୁଲାପେନୁ ।” 29ଜିସୁ ଏୱାଞ୍ଜିକି ୱେସ୍ତେଞ୍ଜି, “ନିନୁ ନାଙ୍ଗେ ହୁଡ଼ିତାୱାଟି ମାଞ୍ଜାଡ଼ି କିଆତି ? ଏମ୍ୱେନାରି ହୁଡ଼େଟେଃଏ ମାଞ୍ଜାଡ଼ି କିଞ୍ଜାନେରି, ଏୱାରି ଦନ୍ୟ ।”
ଇ ପୁତିତି ଉଦେସ
30ଜିସୁ ଗ୍ରାମ୍ୱାଗାଟାର୍ତି ନକେସି ଏହେଙ୍ଗିସି ଏଚ୍ଚେ ଅଟେ ବିହି ବିହି ଆକ୍କାବାଡ଼ାଙ୍ଗ୍ତି କାମା କିଆନ୍ନେଞ୍ଜି, ଏୱା ହାବେ ଇ ପୁତିତାୱା ୱ୍ରିଗା ଆହେଃଲ୍ଲେଏ; 31ମତ୍ର ମିରୁ ଇନିସ୍କି ମାଞ୍ଜାଡ଼ି କିଦେରି ଜେ, ଜିସୁ ମୁଲାପେନୁତି ମ୍ରିଃଏଞ୍ଜି କ୍ରିସ୍ଟ, ଆଟେ ମାଞ୍ଜାଡ଼ି କିଆନ୍ ଇନିସ୍କି ମିରୁ ଏୱାଞ୍ଜ୍ତି ପାରୁଟି ପରନ୍ ପାଁଣ୍ଡେରି, ଏଦାବାଗା ଇ ହାବେ ୱ୍ରିଗାଆନ୍ନେ ।
Iliyochaguliwa sasa
ଜହନ 20: DWK
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023 NLCI CC BY-NC-ND 4.0
