ଜହନ 18
18
ଜିସୁନିକି ଗାସାନ୍ ଅନ୍
(ମାତିଉ ୨୬:୪୭–୫୬; ମାର୍କ ୧୪:୪୩–୫୦; ଲୁକ ୨୨:୪୭–୫୩)
1ଜିସୁ ଇ ହାବେତ୍ କାତା ୱେସାନ୍ ତା ଗ୍ରାମ୍ୱାଗାଟାର୍ ଡ଼ାହି କିଦ୍ରନ ଜଡ଼ାତି ଆନେଟ୍ ୱାଡୁ ହଚାନ୍ ହାଚ୍ଚେଞ୍ଜି । ଏଦିମ୍ୱା ରଣ୍ଡି ଗାଡ଼ା ମାଚ୍ଚେ, ଆଟେ ଏୱାଞ୍ଜି ଅଟେ ତା ଗ୍ରାମ୍ବାଗାଟାରି ଏଦିମ୍ୱା ହଟେରି । 2ଇମ୍ୱିନ୍ ଜିହୁଦା ତାଙ୍ଗେ ସତ୍ରୁ କାଜ୍ଜୁତାୱା ସର୍ପି କିତେଞ୍ଜି, ଏୱାଞ୍ଜ୍ ୱାଡ଼େ ଏ ଗର୍ରି ପୁଞ୍ଜାଚ୍ଚେଞ୍ଜି, ଇନାକି ଜିସୁ ଗ୍ରାମ୍ୱାଗାଟାର୍ ଡ଼ାହି ଏ ଗର୍ରିଇନ୍ଦା ଗାପ୍ଚି ହାଜ୍ଜିଚ୍ଚେଞ୍ଜି । 3ଏଦାକି ଜିହୁଦା ସିପେଙ୍ଗ୍ନିକି ଆଟେ ଗାମିନ୍ ଜାଜକଙ୍ଗ୍ ଅଟେ ପାରୁସିଙ୍ଗ୍ ତାୱାଟି ପାଣ୍ଡାନ୍ନି ମନ୍ଦିର ଜପନ୍ତାରିନିକି ଅଆନ୍ ଡୁବ୍ବି, ନାଡ଼ି କଲ୍ଲ ଅଟେ ଦୁର୍ଗୁଙ୍ଗ୍ ଆହାନ୍ ଏଦିମ୍ୱା ଏତାତେଞ୍ଜି । 4ଏମ୍ବାଟି ଜିସୁ ତା ପାଟ୍ଟି ଇନ୍ନା ଇନ୍ନା ଡୁଣ୍ଡେଲ୍ ଆଅନ୍ତିକି ହାଜ୍ଜିନ୍ନେ, ଏଦା ହାବେ ପୁଞ୍ଜାନ୍ ନକେସ୍ ମାଞ୍ଜାନ୍ ଏୱାରିକି ୱେଚ୍ଚେଞ୍ଜି, “ମିରୁ ଇନ୍ଦାରିକି ଦାହ୍ପିଞ୍ଜେରି ?” 5ଏୱାରି ତାଙ୍ଗେ ୱେସ୍ତେରି, ନାଜରିତତି ଜିସୁନିକି । ଏୱାଞ୍ଜି ଏୱାରିକି ୱେସ୍ତେଞ୍ଜି, “ନାନୁ ଏୱାଞ୍ଜ୍ତାନୁ ।” ଇମ୍ୱିନ୍ ଜିହୁଦା ତାଙ୍ଗେ ସତ୍ରୁ କାଜ୍ଜୁତାୱା ସର୍ପି କିତେଞ୍ଜି, ଏୱାଞ୍ଜ୍ ୱାଡ଼େ ଏୱାର୍ ଡ଼ାହି ଡିଡ୍ଡାଚ୍ଚେଞ୍ଜି । 6ଜିସୁ ଏଚ୍ଚିକିଃଆ “ନାନୁ ଏୱାଞ୍ଜ୍ତାନୁ” ଇଞ୍ଜାନ୍ ଏୱାରିକି ୱେସ୍ତେଞ୍ଜି, ଏଚିତୁକାତାୱା ଏୱାରି ବେତକ୍ ମ୍ଲିଆନ୍ ୱିର୍ରାତାୱା ବ୍ଡିତେରି । 7ଏମ୍ବାଟି ଏୱାଞ୍ଜି ଏୱାରିକି ଆଟେ ରଲି ୱେଚ୍ଚେଞ୍ଜି, “ମିରୁ ଇନ୍ଦାରିକି ଦାହ୍ପିଞ୍ଜେରି ?” ଏୱାର୍ ୱେସ୍ତେରି, ନାଜରିତତି ଜିସୁନିକି । 8ଜିସୁ ୱେସ୍ତେଞ୍ଜି, “ନାନୁ ଏୱାଞ୍ଜ୍ତାନୁ, ଇଞ୍ଜାନ୍ ମିଙ୍ଗେ ୱେସ୍ତାତେଃଏ । ଜଦି ମିରୁ ନାଙ୍ଗେ ଦାହ୍ପିଞ୍ଜାଦେରି, ଏହେଙ୍ଗ୍ ଆତେସି ଇୱାରିକି ପିହା ହିଦୁ ।” 9ଏୱାଞ୍ଜି ଇଦା ୱେସ୍ତେଞ୍ଜି, ଇନିସ୍କି ତା ଇ କାତା ସପଲ ଆନେ, “ନିନୁ ନାଙ୍ଗେ ଇନ୍ଦାରିକି ହିଆଞ୍ଜାଦି, ଏୱାର୍ତାୱାଟି ନାନୁ ରଃଅଞ୍ଜିକି ୱାଡ଼େ ମ୍ରାକ୍ଚ୍ଚାହେଃଲ୍ଲାନୁ ।” 10ସିମନ ପିତର ଟାକ୍କେ କଣ୍ଡା ମାଚ୍ଚି ବାଗାଟି ଏୱାଞ୍ଜି ଏଦା ୱେଚାନ୍ ମୁଲନ୍ ଜାଜକ କାମ୍ୱାରେଏଞ୍ଜ୍ତି ତିନ୍ନି କ୍ରିଉ ଡ଼ାଙ୍ଗ୍ନା କାତିତେଞ୍ଜି; ଏ କାମ୍ବାରେଏଞ୍ଜ୍ତି ପାରୁ ମାଲକ । 11#ମାତି ୨୬:୩୯; ମାର୍କ ୧୪:୩୬; ଲୁକ ୨୨:୪୨ଏମ୍ବାଟି ଜିସୁ ପିତରନିକି ୱେସ୍ତେଞ୍ଜି, “ନି କଣ୍ଡା ନି ଟାକ୍କେ କାପତାୱା କିଟ୍ଟାମୁ; ଆବା ନାଙ୍ଗେ ଇମ୍ୱିନ୍ ଗିନ୍ନା ହିଆଞ୍ଜାନେଞ୍ଜି, ନାନୁ ଇନ୍ନା ଏଦିମ୍ବାଟି ଉଃନ୍ନାନୁ ?”
ହାନାନ ନକେସ୍ ଜିସୁ
12ଏମ୍ବାଟି ସିପେଙ୍ଗ୍, ଗାମିନ୍ ସିପେଞ୍ଜ୍ ଆଟେ ଜିହୁଦିଙ୍ଗ୍ତି ଜପନ୍ତାରି ଜିସୁନିକି ଆହ୍ତେରି, 13ଅଟେ ତାଙ୍ଗେ ଗାସାନ୍ କାହେ ହାନାନ ଟାକ୍କେ ଅତେରି ଇନାକି ଏୱାଞ୍ଜି ଏ ଅଁଣ୍ଡୁତି ମୁଲନ୍ ଜାଜକ କୟାପାତି ପତ୍ଲେଞ୍ଜି ମାଚ୍ଚେଞ୍ଜି । 14#ଜହ ୧୧:୪୯,୫୦ଦାଲ୍ଲା ବାଗା ରଃଅଞ୍ଜି ହାଅନ୍ ନେହି ଇଞ୍ଜାନ୍ ଜିହୁଦି ଦାଲ୍ଲାନିକି ଜେ ପରାମର୍ସ ହିଆଚ୍ଚେଞ୍ଜି, ଇୱାଞ୍ଜି ଏ କୟାପା ।
ଜିସୁନିକି ପିତର ଅସ୍ପିକାର କିଅନ୍
(ମାତିଉ ୨୬:୬୯–୭୦; ମାର୍କ ୧୪:୬୬–୬୮; ଲୁକ ୨୨:୫୫–୫୭)
15ସିମନ ପିତର ଅଟେ ଆଟେ ରଃଅଞ୍ଜ୍ ଗ୍ରାମ୍ୱାଗାଟାଞ୍ଜି ଜିସୁତି ବେତଟ୍ ହାଜ୍ଜିଚ୍ଚେଞ୍ଜି । ଏ ଗ୍ରାମ୍ବାଗାଟାଞ୍ଜି ମୁଲନ୍ ଜାଜକନିକି ପୁଞ୍ଜାଚ୍ଚେଞ୍ଜି ଅଟେ ଜିସୁ ଡ଼ାହି ମୁଲନ୍ ଜାଜକତି ଇଡ୍ଡୁ ପିଣ୍ଡା ଟିକ୍ନା ହାଚ୍ଚେଞ୍ଜି; 16ମତ୍ର ପିତର କାଟ ଦାରା ରେଃଏସ୍ ଡିଡ୍ଡାନ୍ ବାସାଆତେଞ୍ଜି । ଏମ୍ବାଟି ଇମ୍ୱିନ୍ ବିହି ଗ୍ରାମ୍ୱାଗାଟାଞ୍ଜି ମୁଲନ୍ ଜାଜକନିକି ପୁଞ୍ଜାଚ୍ଚେଞ୍ଜି, ଏୱାଞ୍ଜି ଦାରା ଜପନ୍ତାଦାଡ଼ିକି ୱେସାନ୍ ପିତରନିକି ଲାଃଇ ତାଚ୍ଚିୱାତେଞ୍ଜି । 17ଏମ୍ବାଟି ଏ ଇଡ୍ଡୁ ଜପନ୍ତି କାମ୍ବାରାଲୁ ପିତରନିକି ୱେସ୍ତେ, ନିନୁ ୱାଡ଼େ ଇନ୍ନା ଇୱାଞ୍ଜ୍ତି ଗ୍ରାମ୍ୱାଗାଟାର୍ ତାୱାଟି ରଃଅଞ୍ଜି ଆଃଏ ? ଏୱାଞ୍ଜି ୱେସ୍ତେଞ୍ଜି, ନାନୁ ଆଃଏ । 18ପେନି ବାଗା କାମ୍ବାରାଙ୍ଗା ଅଟେ ଜପନ୍ତାରି ନାଡ଼ି ଏର୍ଚ୍ଚାନ୍ ଏମ୍ବା ଡିଡ୍ଡାନ୍ ନାଡ଼ି କାନ୍ଦେଚ୍ଚେରି; ପିତର ୱାଡ଼େ ଏୱାର୍ ଡ଼ାହି ଡିଡ୍ଡାନ୍ ନାଡ଼ି କାନ୍ଦେଚ୍ଚେଞ୍ଜି ।
ମୁଲନ୍ ଜାଜକ ଜିସୁନିକି ୱେନ୍ବନ୍
(ମାତିଉ ୨୬:୫୯–୬୬; ମାର୍କ ୧୪:୫୫–୬୪; ଲୁକ ୨୨:୬୬–୭୧)
19ଏମ୍ବାଟି ମୁଲନ୍ ଜାଜକ ଜିସୁନିକି ତା ଗ୍ରାମ୍ୱାଗାଟାର୍ତି କୁଲାଟି ଅଟେ ତା ଗ୍ରାପା କୁଲାଟି ୱେଚ୍ଚେଞ୍ଜି । 20ଜିସୁ ତାଙ୍ଗେ ୱେସ୍ତେଞ୍ଜି, “ନାନୁ ପୁର୍ତି ନକେସ୍ ପକ୍ଚାନ୍ କାତା ୱେସାମାଃଇ; ଇମ୍ୱିନାୱା ହାବେ ଜିହୁଦିଙ୍ଗ୍ ଉହି ଆଇନ୍ନେରି, ଇହିଙ୍ଗ୍ତି ହାଜା ଇଡ୍ଡୁ ଅଟେ ମନ୍ଦିରତାୱା ନାନୁ ଦିନାଙ୍ଗେଃଏ ଗ୍ରାପ୍ଚାମାଃଇ; ନାନୁ ହୁଟ୍ଟାନ୍ ଇନ୍ନି କୁଲା ୱେସାହେଃଲ୍ଲାନୁ । 21ନାଙ୍ଗେ ଇନାବାଗା ୱେଞ୍ଜିଞ୍ଜାଦି ? ନାନୁ ଏୱାରିକି ଇନ୍ନା ୱେସାମାଃଇ, ଏମ୍ବେନାରି ୱେଞ୍ଜାନ୍ନେରି ଏୱାରିକି ୱେନ୍ମୁ; ହୁଡ଼ାମୁ, ନାନୁ ଇନ୍ନା ଇନ୍ନା ୱେସାମାଃଇ ଏୱାରି ଏ ହାବେ ପୁଞ୍ଜାନ୍ନେରି ।” 22ଏୱାଞ୍ଜି ଇଦା ୱେସ୍ପନେଃଏ ଜପନ୍ତାରି ତାୱାଟି ରେଃଏସ୍ ଡିଡ୍ଡାଚି ରଃଅଞ୍ଜି ଜିସୁନିକି ଚାପ୍ଡ଼ା ୱେଚାନ୍ ୱେସ୍ତେଞ୍ଜି, “ନିନୁ ମୁଲନ୍ ଜାଜକନିକି ଇହିଙ୍ଗିସି ୱେସ୍ପିଞ୍ଜି ?” 23ଜିସୁ ତାଙ୍ଗେ ୱେସ୍ତେଞ୍ଜି, “ଜଦି ନାନୁ ଡ଼ଃଆନ୍ କାତା ୱେସ୍ତେ, ଏହେଙ୍ଗ୍ ଆତେସି ଏ ଡ଼ଃଆନ୍ କାତାତି ପରମାନ ହିଆମୁ, ମତ୍ର ଜଦି ନେହି କାତା ୱେସ୍ତେ ଏହେଙ୍ଗ୍ ଆତେସି ଇନାବାଗା ନାଙ୍ଗେ ଚାହ୍ପିଞ୍ଜାଦି ?” 24ଏମ୍ବାଟି ହାନାନ ତାଙ୍ଗେ ଗାସ୍ପାନ୍ ମୁଲନ୍ ଜାଜକ କୟାପା ଟାକ୍କେ ପାଣ୍ଡିତେଞ୍ଜି ।
ଜିସୁନିକି ପିତର ରିହିକ୍ ଅସ୍ପିକାର କିଅନ୍
(ମାତିଉ ୨୬:୭୧–୭୫; ମାର୍କ ୧୪:୬୯–୭୨; ଲୁକ ୨୨:୫୮–୬୨)
25ଏଚ୍ଚିକିଃଆ ସିମନ ପିତର ଡିଡ୍ଡାନ୍ ନାଡ଼ି କାନ୍ଦେଚ୍ଚେଞ୍ଜି । ଏଦିମ୍ୱା ଏୱାରି ତାଙ୍ଗେ ୱେଚ୍ଚେରି, “ନିନୁ ୱାଡ଼େ ଇନ୍ନା ଇୱାଞ୍ଜ୍ତି ଗ୍ରାମ୍ୱାଗାଟାର୍ ତାୱାଟି ରଃଅଞ୍ଜି ଆଃଏ ?” ଏୱାଞ୍ଜି ଅସ୍ପିକାର କିଆନ୍ ୱେସ୍ତେଞ୍ଜି, “ନାନୁ ଆଃଏ ।” 26ମୁଲନ୍ ଜାଜକତି କାମ୍ବାରାଙ୍ଗା ତାୱାଟି ରଃଅଞ୍ଜି, ଇଚ୍ଚେସି, ପିତର ଇନ୍ଦାର୍ତି କ୍ରିଉ କ୍ରାଚାହିଆଚ୍ଚେଞ୍ଜି, ଏୱାଞ୍ଜ୍ତି ରଃଅଞ୍ଜି ପୁନ୍ବାଗାଟାଞ୍ଜି ୱେସ୍ତେଞ୍ଜି, “ନାନୁ ଇନ୍ନା ନିଙ୍ଗେ ତା ଡ଼ାହି ଗାଡ଼ାତାୱା ହୁଡ଼ା ହେଲ୍ଲାଦାଃଆତାନୁ ?” 27ଏମ୍ୱାଟି ପିତର ରିହିକ୍ ଅସ୍ପିକାର କିତେଞ୍ଜି; ଆଟେ ଏଚିୱାଡ଼େ କଜ୍ଜୁ କ୍ଲାତେ ।
ପିଲାତ ନକେସ୍ ଜିସୁ
(ମାତିଉ ୨୭:୧–୨,୧୧–୧୪; ମାର୍କ ୧୫:୧–୫; ଲୁକ ୨୩:୧–୫)
28ଏମ୍ବାଟି ଏୱାରି ଜିସୁନିକି କୟାପା ତାୱାଟି ରୁମିୟ ରାଜିତି ଗାମିନାଞ୍ଜିତି ପ୍ରାସାଦଇନ୍ଦା ଅତେରି; ଏଚିତୁକାତାୱା ଡାଃଏସ୍ ଆଚ୍ଚେ; ଆଟେ ଏୱାରି ଇନିସ୍ ଅସୁଚି ଆଃଏଟେଃଏ ନିସ୍ତାର ରେହାଙ୍ଗ୍ତି ବୁଜି ପାଲ୍ନି ଆନେରି, ଇଦାବାଗା ତାନୁ ପ୍ରାସାଦ ଲାଃଇ ହଃଲ୍ଲାତେଞ୍ଜି । 29ଏଦାକି ପିଲାତ ଏୱାର୍ ଟାକ୍କେ ହଚାନ୍ ୱାନ୍ ୱେଚ୍ଚେଞ୍ଜି, “ଇ କୁଏଞ୍ଜ୍ତି ବିରୁଦିଆଟି ମିରୁ ଇମ୍ୱିନ୍ ଦାବା ତାପିଞ୍ଜେରି ?” 30ଏୱାର୍ ତାଙ୍ଗେ ୱ୍ଡେପ୍ଚ୍ଚି ୱେସ୍ତେରି, “ଇ କୁଏଞ୍ଜି ଜଦି ଡ଼ଃଆନ୍ କାମା କିଆହେଃଲ୍ଲେଞ୍ଜ୍ମା, ଇଚ୍ଚେସି ମାମୁ ନି କାଜ୍ଜୁତାୱା ସର୍ପି କିଆଦାଃଆମୁମା ।” 31ଏମ୍ବାଟି ପିଲାତ ତାଙ୍ଗେ ୱେସ୍ତେଞ୍ଜି, “ମିରୁ ଇୱାଞ୍ଜିକି ଅଆନ୍ ମି ହାଜୁ ଡେହେଙ୍ଗ୍ ଇୱାଞ୍ଜ୍ତି ବିଚାର କିଦୁ ।”
ଏଚ୍ଚେ ଦାଲ୍ଲା ଜିହୁଦିଙ୍ଗ୍ ତାଙ୍ଗେ ୱେସ୍ତେରି, “ଇନ୍ଦାରିକି ହାଅନ୍ତି ଦଣ୍ଡ ହିଅନ୍ ମା ହକତ୍ ହେଃଲ୍ଲେଏ ।” 32#ଜହ ୩:୧୪; ୧୨:୩୨ଜିସୁ ଇନିମିଡି ହାଅନ୍ ହାଜ୍ଜିନ୍ନେଞ୍ଜି, ଏ କୁଲାଟି ଏୱାଞ୍ଜ୍ ଇମ୍ୱିନ୍ କାତା ୱେସାଚ୍ଚେଞ୍ଜି, ଏଦି ଇନିସ୍କି ସପଲ ଆନେ, ଇଦାବାଗା ଏୱାରି ଇଦା ୱେସ୍ତେରି ।
33ମତ୍ର ପିଲାତ ରିହିକ୍ ପ୍ରାସାଦ ଲାଃଇ ହଲ୍ଜାନ୍ ଜିସୁନିକି ଆର୍ଚାନ୍ ତାଙ୍ଗେ ୱେଚ୍ଚେଞ୍ଜି, “ନିନୁ ଇନ୍ନା ଜିହୁଦିଙ୍ଗ୍ତି ରାଜେଞ୍ଜାତି ?” 34ଜିସୁ ୱ୍ଡେପ୍ଚ୍ଚି ୱେସ୍ତେଞ୍ଜି, “ନିନୁ ଇନ୍ନା ଇଦା ନି ତାୱାଟି ୱେସ୍ପିଞ୍ଜି କି ବିହି ଦାଲ୍ଲା ନା କୁଲାଟି ନିଙ୍ଗେ ୱେସାଞ୍ଜାନେରି ?”
35ପିଲାତ ୱ୍ଡେପ୍ଚ୍ଚି ୱେସ୍ତେଞ୍ଜି, “ନାନୁ ଇନ୍ନା ରଃଅଞ୍ଜି ଜିହୁଦିତାନୁ ? ଏୱାରି ମି ପୁଣ୍ଡି ଦାଲ୍ଲା ଅଟେ ଗାମିନ୍ ଜାଜକଙ୍ଗ୍ ନିଙ୍ଗେ ନା କାଜ୍ଜୁତାୱା ସର୍ପି କିଆଞ୍ଜାନେରି; ନିନୁ ଇନ୍ନା କିଆଞ୍ଜି ?”
36ଜିସୁ ୱ୍ଡେପ୍ଚ୍ଚି ୱେସ୍ତେଞ୍ଜି, “ନା ରାଜି ଇ ପୁର୍ତି ଡେହେଙ୍ଗ୍ ଆଃଏ, ଜଦି ନା ରାଜି ଇ ପୁର୍ତିତାୱା ମାନ୍ନି ରାଜି ଡେହେଙ୍ଗ୍ ଆନ୍ନେମା, ଇଚ୍ଚେସି ନାନୁ ଜିହୁଦିଙ୍ଗ୍ କାଜ୍ଜୁତାୱା ସର୍ପି ଆଃଆନ୍ ବାଗା ନା ଦାଲ୍ଲା ଜୁଜ୍ଜି ଆନେର୍ମା; ମତ୍ର ନା ରାଜି ଇ ପୁର୍ତିତାୱା ମାନ୍ନି ରାଜି ଡେହେଙ୍ଗ୍ ଆଃଏ ।”
37ଏମ୍ବାଟି ପିଲାତ ତାଙ୍ଗେ ୱେଚ୍ଚେଞ୍ଜି, “ଏହେଙ୍ଗ୍ ଆତେସି ନିନୁ ଇନ୍ନା ରଃଅଞ୍ଜି ରାଜେଞ୍ଜାତି?”
ଜିସୁ ୱେସ୍ତେଞ୍ଜି, “ନିନୁ ୱେସ୍ପିଞ୍ଜି, ନାନୁ ରଃଅଞ୍ଜି ରାଜେଞ୍ଜି । ନାନୁ ଇନିସ୍ ନିଜ୍ଜା ସାକ୍ୟ ହିଃଇ, ଇଦାବାଗା ନାନୁ ପ୍ଲିଆମାଃଇ ଅଟେ ପୁର୍ତିଇନ୍ଦା ୱାମାଃଇ । ଏମ୍ୱେନାଞ୍ଜି ନିଜ୍ଜାତି ମ୍ରିଃଏଞ୍ଜି, ଏୱାଞ୍ଜି ନା କାତା ୱେନ୍ନେଞ୍ଜି।” 38ପିଲାତ ତାଙ୍ଗେ ୱେସ୍ତେଞ୍ଜି, “ନିଜ୍ଜା ଇନ୍ନାଦି ?” ଇଦା ୱେସାନ୍ ରିହିକ୍ ଜିହୁଦିଙ୍ଗ୍ ଟାକ୍କେ କାଟ ହାଜ୍ଜାନ୍ ଏୱାରିକି ୱେସ୍ତେଞ୍ଜି, ନାନୁ ତା ତାୱାଟି ଇନ୍ନି ଦୁସ ପାଁଣ୍ଡେହେଃଲ୍ଲାନୁ ।
ଜିସୁନିକି ହାଅନ୍ତି ଦଣ୍ଡ
(ମାତିଉ ୨୭:୧୫–୩୧; ମାର୍କ ୧୫:୬–୨୦; ଲୁକ ୨୩:୧୩–୨୫)
39ମତ୍ର ମି ହାଜୁ ମାନ୍ନି ଡେହେଙ୍ଗ୍ ନାନୁ ଜେ ନିସ୍ତାର ରେହାଙ୍ଗ୍ ତୁକାତାୱା ମି ବାଗା ରଃଅଞ୍ଜି ବନ୍ଦିଗାଟାଞ୍ଜିକି ପିହ୍ପନ୍ ଆଇନେ, ଏଦାକି ଜିହୁଦିଙ୍ଗ୍ତି ରାଜେଞ୍ଜିକି ନାନୁ ମି ବାଗା ପିହାହିଆ ଇଞ୍ଜାନ୍ ଇନ୍ନା ମିରୁ ଇଚ୍ଚା କିଞ୍ଜେରିମା ? 40ଏମ୍ବାଟି ଏୱାରି ରିହିକ୍ ଗାପ୍ଚି ଗଲି ଆନ୍ ୱେସ୍ତେରି, “ଇ କୁଏଞ୍ଜିକି ଆଃଏ, ମତ୍ର ବାରବ୍ବାନିକି ।” ଇ ବାରବ୍ବା ରଃଅଞ୍ଜି ଗାଣ୍ଡିଙ୍ଗ୍ ପାଗନ୍ତାଞ୍ଜି ମାଚ୍ଚେଞ୍ଜି ।
Iliyochaguliwa sasa
ଜହନ 18: DWK
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023 NLCI CC BY-NC-ND 4.0
