Genesis 7
7
Ruhanzo rorunene
1 Hompa makura ta tantere Nowa asi: “Hwilira memuwato nembo lyoge nalinye; yeeyi ame nyovelike na mono muhungami povantu ava. 2Gusa kwankenye rudi royikorama yokukuhuka pampo, murongo nayine, yitano‐nayivali yoyigara, eyi yitano‐nayivali yoyikadi, ano kwankenye rudi rweyi yokunyata to gusa ko yivali tupu, simwe sosigara, ano esi simwe sosikadi. 3Komarudi goyidira nako ngosikwawo, yitano‐nayivali yoyigara, yitano‐nayivali yoyikadi. Yi rugana eyi, asi nkenye kakorama nokadira ngayi livhare hena pevhu. 4Napa pita mazuva gatano‐nagavali, tani rokesa mvhura mazuva nomurongo‐ne mutenya nomasiku, ni zonagure pevhu yinamwenyo nayinye eyi na sita.” 5Nowa makura ta rugana nayinye eyi ga mu pangerere Karunga.
6Apa rwa wizire ruhanzo pevhu, age Nowa ana kara nonomvhura mafere gatano‐nalimwe. 7Makura Nowa namukadendi novana vendi novakadi vawo tava perama memuwato va yoworoke komema goruhanzo. 8Age kwa zire mo kumwe noyikorama yokukuhuka neyi yokunyata noyikoramagona, 9nayinye kwa zire kumwe naNowa memuwato, moomu ga pangere Karunga. 10Eyi ga pwa mazuva gatano‐nagavali, makura ruhanzo taru wiza pevhu.
11Apa ga sikire Nowa konomvhura mafere gatano‐nalimwe, mezuva lyomurongo nagatano‐nagavali lyokwedi kwauvali, marunone nagenye gokonhi zefuta lyenene taga zahama, ano nomuliu dekeguru tadi paturuka di poomoke mema, 12mvhura tazi roko mazuva nomurongo ne, mutenya nomasiku.
13Omo mezuva olyo, yipo va peramene memuwato oNowa namukadendi novana vendi vatatu oSema naHamu naJafeta novakadi vawo. 14Awo kwa peramene mo nankenye karudi koyikorama yomowiza noyimuna noyikoramagona nankenye kadira. 15Sigara nosikadi sankenye kanamwenyo kwa zire kumwe naNowa, 16moomu ga pangere Karunga. Hompa makura ta zedire evero konyima zaNowa.
17Ruhanzo kwa kere ko mazuva nomurongo ne, mema taga kara etondo lyenene, taga yerura po emuwato pevhu. 18Mema kwa vhukire unene, makura emuwato kuna kuyerauka kontunda zago. 19Kwa vhukire unene, nondundu dononde tadi pwire mo, 20kwa fulire taga pitakana nondundu nompadi nomurongo‐mbali nantano. 21Yinamwenyo nayinye yepevhu tayi fu — yidira noyimuna noyikorama nayinye novantu navenye. 22Yinamwenyo nayinye yepevhu kwa fire. 23Hompa kwa zonagwire yinamwenyo nayinye pevhu, rambanga ko novantu noyimuna noyikoramagona noyidira. Ogu ga dilire kuzonauka, Nowa gelike nava ga peramene nawo memuwato. 24Mema kwa hanzere pevhu mazuva efere nonomurongo ntano.
Iliyochaguliwa sasa
Genesis 7: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003