Genesis 49
49
Jakopo ta tungike vana vendi
1Ga ninka Jakopo ta zigida vana vendi, ta tanta asi: “Pongeni, ni mu tantere eyi ngayi ka mu gwana komazuva gokomeho.
2“Pongeni mu zuvhe,
one vana vaJakopo,
purakeneni kwaIsraeli, guhyeni!
3“Rubena, ove mbeli zange,
nyove nonkondo dange,
muna gomuhowo momutompo gwange,
muzeruki nomunankondo
movana vange navenye.
4Ove kwa fana ruhanzo runa kubabagwira,
nye kapi ngo kara gekuto po unene,
yeeyi wa kere namukadaguhwo,
wa nyateka uro wononkwara dange,
wa u ronderera!
5“Simiyoni naRevhi vantu namumbyendi;
yikwata yawo yokuruganesesa udona.
6Kapi ngani hama ko koyipanga yawo;
kapi ngani va pulisa ko yigongi yawo,
yeeyi awo kudipaga vantu,
nsene vana handuka,
kuremeka nongombe mowina‐wina.
7Ehandu lyawo va li fingilire,
yeeyi enene, nougara wawo,
yeeyi udigu unene.
Ngani va gaununa
mosirongo saJakopo,
tani va haraganesere moVaisraeli.
8“Juda, nyove gweyi!
Nyove ngava fumadeka po vakweni.
Kuwoko koge ngaku kara
konsingo zovanyengi woge.
Vana vaguhwo ngava twa
nongoro kosipara soge.
9Juda nyimegona,
momahaka wa litumbira mo, munwange.
Ta nyongama,
ta ka rara ngwendi nyime.
Yilye gokuvhura kumutjida?
10Mpango zouhompa kapi
ngazi mu tunda Juda,
mpango zoMupanguli kapi ngazi
tunda po pokatji komaguru gendi
dogoro noku nga wiza ogu za hamena.
Ano nomuhoko nadinye ngadi
zuvha mwendi.
11Ta kuminine sindongiligona
sendi kosindjembere,
komandjembere gomawa unene;
ta kuhu yikoverero yendi movhinyu,
movhinyu zongeha ngwendi honde.
12Meho gendi kwa geha kovhinyu,
ano mazego gendi kwa zera komasini.
13“Seburoni nga tunga konontere defuta,
nonkenkera dendi mazenga goyikepa,
sirongo sendi ngasi ka hulira koSidoni.
14“Isasikali sindongili sononkondo,
aso kurara pokatji koyiunda.
15Eyi ga mona mapwizumukiro gomawa,
nosirongo omu sa wapa,
ta nyongama a simbe mudigo gwendi,
a kare goyirugana youngamba.
16“Dana nga pangura vantu vendi,
ngava kara ngwendi mazimo
gamwe gaIsraeli.
17Dana nga kara ezoka lyoponzira,
ezoka lyouhungu ponzira,
ngali huma kakambe kekondo,
murondi gwako nga gwe kagali.
18“Ame eparu lyoge na ndindire, Hompa.
19“Gada ngava mu katukira vamahaka,
nye age nga va toona,
ta va tjida‐tjida.
20“Aseli nga kara nonondya dononzi,
nga horora nondya edi da fira ohompa.
21“Nafitali horongo ezi azi duka,
mwendi kutunda mo nonkango donongwa.
22“Josefa sitjigona senyango,
sitjigona senyango soporunone,
nomutayi daso tadi harava
dogoro kesinya kwina lyekuma.
23Vaponyi tava mu rwisa momudona
nomauta gawo noyikutji yawo,
va mu ponye.
24Nye age uta wendi wazengu,
mawoko gendi ganzi,
kononkondo doMunankondo,
Karunga gwaJakopo,
daMusita, Emanya lyaIsraeli,
25kwaKarunga goguhwo ogu a ku kwafa,
kwaKarunga Munankondo nadinye,
ogu a ku tungike:
Matungiko gomvhura zekeguru
naga gomema gomevhu,
matungiko gomavere nosivharero,
26matungiko aga ga gwana guhwo
kwa pitakana matungiko gomama,
mauhwi gomulyo goyindundu yanarunye
ngaga kara gaJosefa,
ogu va horowora mokatji
kovakuru vendi.
27“Mbenyameni embungu eli ali dipaga;
ngurangura tali li eyi lina dipaga,
ano ngurova tali toporora
eyi lina ka kwata.”
28Aga yigo mazimo murongo nagavali gaIsraeli, neyi ga va tanterere guhyawo. Nkenye ogu kwa mu swereserere keswero eli lya mu wapera.
Nomfa nehoreko lyaJakopo
29Konyima ntani Jakopo ana kupanga, a tantere vana vendi asi: “Ame kukundika nge kekoro lyange. Ngomu horeke nge pomama mekombombo eli lya kara posipapwira sevhu saEfuroni, Muheti, 30mekombombo lyoposipapwira sevhu sopoMakupera, eli lya hama koUpumezuva waMamure, mosirongo saKanani, sipapwira sevhu esi ga rende Abirahamu kwaEfuroni, Muheti, si kare ntoko zoupingwa. 31Omo yimo va horeka Abirahamu namukadendi Sara, amo yimo va vhumbika Isaka namukadendi Repeka, ano Reya nage yimo na mu horeka, 32mosipapwira sevhu nekombombo eli lya kara mo, eli va randa koVaheti.” 33Jakopo tupu ana kumana kuyitantera vana vendi, makura ta tengwidire maguru gendi pouro, makura tagu pu mo. Makura age tava ka mu kundika pwava vekoro lyendi.
Iliyochaguliwa sasa
Genesis 49: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003