Genesis 46
46
Jakopo ta dirukire koEgipite
1Ano Israeli kwa zire noyininke nayinye eyi ya mu hamena, makura ta wiza moBereseba. Age makura ta zambere Karunga goguhwe Isaka nonzambo. 2Karunga makura ta uyunga naIsraeli momamonekero gomasiku, ta mu tantere asi: “Jakopo, Jakopo!” Age ta limburura asi: “Nyame ogu!”
3Age makura ta tanta asi: “Nyame Karunga, Karunga goguhwo. Wa ha tjira kuza koEgipite, yeeyi ame ngani ka ku ninka o ka kare muhoko gomunene. 4Ame tani zi noge koEgipite, ame nyame hena ngani ku tengwida oku, ano Josefa yige nga mbandwira meho goge.”
5Jakopo makura ta tundu po poBereseba va ze. Ano vana vaIsraeli tava pereke guhyawo novakadi vawo novana vawo momatemba aga ga tumine Farawo asi ga ka va simburure. 6Awo makura tava gusa yimuna yawo nemona eli va kongere mosirongo saKanani. Jakopo kumwe noruvharo rwendi narunye makura tava wiza moEgipite, 7kumwe novana vendi wovagara novatekuru vendi wovagara, novana vendi wovakadi novatekuru vendi wovakadi, ruvharo rwendi narunye kwa zire naro koEgipite.
8Aga yigo madina goruvharo rwaIsraeli ogu ga zire koEgipite. Jakopo novana vendi wovagara vava: Mbeli zaJakopo, Rubena. 9Ano Rubena vana vendi wovagara vava: Hanoka naParu naHesironi naKarumi. 10Vana wovagara vaSimiyoni vava: Jemueli naJamini naOhade naJakini naSohara naSauru gopomukadi gomuKanani. 11Vana vaRevhi vava: Geresoni naKehati naMerali. 12Vana vaJuda wovagara vava: Era naOnani naSera naPeresi naZera (nye oEra naOnani kwa fililire moKanani). Vana vaPeresi wovagara oHesironi naSimuroni. 13Vana vaIsasikali wovagara vava: Tora, Buva, Joba na Simuroni. 14Vana vaSeburoni wovagara vava: Seredi naEroni naJahireli. 15Ava yiwo vana wovagara ava ga reterere Reya Jakopo moMesopotamiya, ano gomukadona Dina. Ruvharo rwendi narunye rwapwaReya sivaro saro nomurongo-ntatu navatatu.
16Vana vaGada wovagara vava: Sefoni naHagi naSuni naEsiboni naEre naArodi naAreli. 17Vana vaAseli wovagara vava: Imunaki naIsiva naIsivi naBeliya nampanzawo Sera. Ano vana vaBeliya wovagara oHebeli naMalikiyeli. 18Ava murongo navatano‐nagumwe yiro ruvharo rwaJakopo rwapwaSilipa ogu ga pere Rabani munwendi Reya.
19Vana wovagara vaRakera, mukadaJakopo vava: Josefa naMbenyameni. 20Manase naEfurayimi yiwo ga reterere Josefa pwaAsenati moEgipite. Asenati munwaPotifera, mupristeli gomoOno. 21Vana vaMbenyameni wovagara vava: Bera naBekeli naAsibeli naGera naNamani naEhi naRosi naMupimu naHupimu naAredi. 22Ava murongo navane yiro ruvharo rwaJakopo rwapwaRakera.
23MunwaDana gomugara, Husimu. 24Vana vaNafitali wovagara vava: Jahuseli naGuni naJesere naSiremu. 25Ava vatano‐navavali yiro ruvharo rwaJakopo rwapwaBiliha, ogu ga pere Rabani munwendi Rakera.
26Ruvharo rwaJakopo oru ga zire naro koEgipite roposinena sendi, kwa kere vantu nomurongo ntano‐nazimwe novantu vatano‐nagumwe. Ongumweyi vaJakopo kapi va va varwire. 27Ano vana vaJosefa ava va mu hampurukilire moEgipite, vavali va kere. Vantu navenye vembo lyaJakopo ava va zire koEgipite, nomurongo ntano‐nambali va kere.
Jakopo moEgipite
28Age makura ta tumu Juda komeho zendi kwaJosefa, asi a ka mu likide nzira zokuza koGoseni. Awo makura tava wiza mosirongo saGoseni. 29Josefa makura ta kutire etemba lyendi, ta zi a ka gwanekere noguhwe Israeli koGoseni. Ano apa ga mene kulitongonona, makura ta mu lidingire monsingo, ta lili siruwo age monsingo zendi. 30Israeli ta tantere Josefa asi: “Ntaantani ame kuvhura tupu nye kufa, moomu na mono sipara soge, yeeyi na diva asi simpe ono kuhesera.”
31Ga ninka Josefa ta uyunga novakuru vendi nembo nalinye lyaguhwe asi: “Tani zi, ni ka sansekere Farawo asi: ‘Vakuru vange nembo lyotate eli lya kere mosirongo saKanani, lina wiza kwange. 32Nye vagara owo vasita woyimuna, yeeyi awo vanayimuna, awo kwa pitura nonzwi dawo nonongombe dawo neyi va weka nayinye.’ 33Ano Farawo nsene a ninka asi va mu zigide a pure asi: ‘Yirugana yeni yirugana musinke?’, 34tomu limburura asi: ‘Ose vantu woge vanayimuna ha twa tunda unona wetu nanaina eli, nozinyakurwetu nawo ngosikwawo, asi ngomu wape kukara mosirongo saGoseni.’ Yeeyi nkenye musita koMuegipite sidira.”
Iliyochaguliwa sasa
Genesis 46: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003