Genesis 43
43
Vakuru vaJosefa tava zi rwauvali koEgipite kumwe naMbenyameni
1Nye erumbu edigu lya kere mosirongo. 2Dina kupwa kulya nondya edi va ka retere koEgipite, makura guhyawo ta va tantere asi: “Zendeni hena, mu ka rande ko nondya dononsesu.”
3Juda makura ta limburura asi: “Gwina mugara kwa mana mo mokututantera asi: ‘Kapi ngomu ya mona sipara sange, nsene kapi ngomu wiza nogo mumbyeneni.’ 4Hawe, nsene asi tomu tu tumu namumbyetetu, ngano ngatu za, tu ka mu randere nondya. 5Ano nsene asi muna nyoka kumutuma, nose kapi ngatu za, yeeyi mugara ogo kwa tu tantera asi: ‘Kapi ngomu ya mona sipara sange, nsene kapi ngomu wiza nogo mumbyeneni.’ ”
6Israeli makura ta pura asi: “Yinke nye yokukaruganena nge yoyidona ngoso yokukatanta asi namumbyeneni mwa kara?”
7Ano awo tava limburura asi: “Mugara kwa tu pulire nawa‐nawa nezimo lyetu asi: ‘Guhyeni pweli? Namumbyeneni mwa kara ndi?’ Kononkango odo makura nose tatu yi mu tantere. Omu nkare tu yi dive ngapi asi nampo na tanta asi: ‘Ngomu ka rete mumbyeneni’?”
8Juda makura ta tantere oguhwe Israeli asi: “Sigeni munona a ze name, makura tu liwapaike tu ze, asi ngatu paruke, tu dire kufa, nyamwetu nove noruvharo rwetu. 9Nyame nani kara mugameni gwendi, ngomu mu tondore mokuwoko kwange. Nsene asi kapi ngani ka mu tengwida ni mu mu likide, ngani kara munzoni moukaro wange naunye. 10Ngano kapi twa liranga, hawe, yosili ngano nare twa ka tunda ko ruvali.”
11Guhyawo Israeli makura ta va tantere asi: “Nsene asi yimo ngoso, ruganeni nye ngesi: Guseni yuma yoyiwa po yomu mosirongo mu yi ture mononsako deni, makura mu yi pitwire ogo mugara mauhwi, magadi gobalisemu nokausi kononyiki noyidumba nomanganganga gedumba lyewa nonondongo nonomandeli. 12Guseni hena yimaliva yapeke yokuhura pweyi mwa gwana mononsako deni, nayo yi pitureni, mpange kwa lipuka va lipuka. 13Pitureni mumbyeneni. Katukeni mu ze hena kogo mugara. 14Ngano Karunga, Munankondo nadinye, ta ninki ogo mugara a ka mu fire nkenda asi, mukweneni naMbenyameni ngano nga ka va sige mu wize nawo! Ano ame, nsenesi kuna kuhakana nge vana vange, vana hakana nge tupu nye makura.”
15Makura owo vagara tava gusa mauhwi noyimaliva ruvali yokuhura pweyi yomuhowo naMbenyameni nage, makura tava katuka va ze koEgipite. Makura tava ka sika kosipara saJosefa. 16Ano Josefa tupu ana kumona Mbenyameni gogu nawo, makura ta tantere erenga lyembo lyendi asi: “Va twara owo vagara membo, nkumwe o tome eyi ava tomo, o yi wapeke, yeeyi vagara ava naina tava ka lya muzuhwa kwange.” 17Ogo mugara nage ta yi rugana moomu ga yi penge Josefa, makura ta twara owo vagara membo lyaJosefa.
18Owo vagara tagu va pwaga, morwa vana va reta membo lyaJosefa. Makura tava tanta asi: “Ayi huru, yeeyi yimaliva eyi ya tengwira mononsako detu, yiyo vana tu retere mo omu asi va tu homokere, va tu kwate ngatu kare vapika, kumwe noyindongi yetu.” 19Yipo nye va hedererere kerenga lyembo lyaJosefa, makura tava uyunga nendi pevero lyembo, 20tava tanta asi: “Ani tate, ose kwa wizire muhowo tu ya rande nondya. 21Ano twa wiza pontanda zomapwizumukiro tu diture nonsako detu, hawe, nkenye ogu yimaliva yendi yeyi, monsako zendi. Hawe, yimaliva yetu paapa ya hura, nye yeyi, tuna ka rugura nayo. 22Tuna ka pitura ko hena yimaliva yimwe, tu ya rande nondya. Nye ose nokumudiva si ogu ga yi tulire mo yimaliva yetu mononsako detu.”
23Age makura ta va limburura asi: “Gu mu dame! Neisi nagu mu pwagera! Karunga gweni naKarunga gwaguhyeni yige ga mu pa emona mononsako deni. Yimaliva yeni koyili kwange.” Ga ninka makura ta reta Simiyoni pwawo.
24Olyo erenga makura tali twara owo vagara monzugo zaJosefa, tali va pe mema, va likuhwe konompadi dawo. Yindongi yawo nayo ta yi havareke nondya dayo. 25Awo makura tava wapaike mauhwi gawo menomeno asi Josefa ta wiza komuzuhwa, yeeyi awo kwa zuvhire asi yimo nava ya lya muzuhwa. 26Ano apa ga wizire nye Josefa membo, tava mu twarere mauhwi aga va kere nago, makura tava mu linyongamene va pe yipara pevhu. 27Ano age makura ta va pulida omu vana kerere, ta tanta asi: “Guhyeni gokukurupa ogu mwa ya tantere, nye ta pinduka tupu ndi? Simpe pweli?”
28Awo tava limburura asi: “Muntu goge, guhyetu, ta pinduka, simpe pweli.” Awo makura tava mu linyongamene, va pe yipara pevhu, va mu fumadeke.
29Ana kukankura meho gendi, makura ta mono mumbyendi Mbenyameni ogu ga mu kwama momugongo, makura ta tanta asi: “Yige nye mumbyeneni gomunona po ogu mwa tanterere nge, ogu ndi?” Yipo nye ga ninkire a tante asi: “Karunga ngano ta ku fire nkenda, munwange!” 30Josefa makura ta tundu mo usimbu‐simbu, yeeyi momutjima gwendi kwa pire morwa mumbyendi. Age kwa paparere evega a ka lire, makura ta zi monzugo zonkondwa, yimo ga ka lilililire. 31Ga ninka makura ta kuhu sipara sendi, ta pwaga, age mutjima ana gu kwata, yipo ga tente asi: “Reteni nondya!” 32Makura awo tava reta, dendi tadi likerere, dawo tadi likerere, ano doVaegipite ava ngava li kwendi nado tadi likerere; yeeyi Vaegipite nokuwapa si kulya kumwe noVahebeli, yeeyi Vaegipite awo kwawo sidira. 33Ano awo makura tava hingidike komeho zendi moomu ga va pangerere, mbeli poumbeli wendi, ano munona nage pounona wendi, vagara makura tava litara‐tara, sitetu sina va gwana. 34Opo ngoso makura ta va gavere nondya edi a li age. Nye nondya daMbenyameni nonzi unene, kupitakana pwedi dankenye ogu rutano. Awo makura tava nu, tava hafa kumwe nendi.
Iliyochaguliwa sasa
Genesis 43: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003