Genesis 41
41
Josefa ta zagura nonzodi daFarawo
1Pwa pita nomvhura mbali, makura Farawo ta roto nzodi asi ana sikama pomukuro gwaNili. 2Ga tara ko moNili, nongombe ntano‐nambali donongwa dokuneta dina kuzauka mo, makura tadi zi di ka lye meteva. 3A tare ko hena, tamu tundu momukuro nongombe ntano‐nambali donondona dokutongoma, makura tadi wiza di ya sikame podo nonkwawo konontere domukuro. 4Ano nongombe odo donondona dokutongoma tadi mini odo donongwa dokuneta. Farawo makura ta pahuka. 5Age ta rugwire po hena a ponyoke, ta roto asi, ta mono nompakwa ntano‐nambali donongwa donondanda dokundondomoka dina kupwaga mosihatji simwe tupu. 6Monyima zado tamu pwaga hena nompakwa ntano‐nambali dokurakera, edi za senyeka mpepo zoUpumezuva, 7makura nompakwa dokurakera tadi mini nompakwa ntano‐nambali dokundondomoka donongwa. Farawo ta pahuka, kuna kutara‐tara, nani nzodi kazi kara. 8Lina kusa, hawe, mutjima gwendi kapi guna pura. Age makura ta zigida nompure novanongo navenye womoEgipite. Farawo makura ta va sansekere nzodi zendi, nye nagumwesi ga vhulire kuzizagura.
9Erenga lyenene lyovapindi tali tantere Farawo asi: “Naina ntani nye na kudiworoka nzo zange. 10Farawo kwa handukilire vantu vendi, makura tava tu tura name nerenga lyovaduvi modorongo monzugo zomukurona govakungi. 11Masiku tatu roto natuvenye nzodi, nkenye ogu kwa rotere nzodi nositambo sazo. 12Twa kere nomudinkantu goMuhebeli, mukareli gomukurona govakungi, yige twa di sansekerere, makura ta tu zagwire nonzodi detu, nkenye ogu kwa mu zagwililire moomu za tambere nzodi zendi. 13Moomu ga di tu zagwililire, yimo ya kere. Ame yiyo ga rugwidira nge mosirugana sange, nye mukwetetu tava mu zenzeresa kositji.”
14Farawo makura ta ninki va ka zigide Josefa. Awo tava ka mu pwagesa mo usimbu modorongo, ta likurura, ta dwara yikoverero peke, ntani ana kuhoroka kwaFarawo. 15Farawo makura ta tantere Josefa asi: “Ame kuna roto nzodi, nye nagumwe si gokuvhura kuzizagura. Nye ove na ku zuvhu asi sinene o zuvha nzodi, kumwe nokuzizagura.”
16Josefa ta limburura Farawo asi: “Oyo kapisi yange! Nye Karunga yige na limburura Farawo elimbururo lyewa.”
17Farawo makura ta tantere Josefa asi: “Ame kuna roto asi na sikama konontere daNili. 18Ni tare, momukuro tamu tundu nongombe ntano‐nambali donongwa dokuneta, makura yiyo dina zi di ka lye meteva. 19Ni tare ko, dimwe hena ntano‐nambali dina kukwama ko, ado nondona, ado hena da tongama, kapi na di mona mo rumwe omu mosirongo nasinye saEgipite donondona ngado. 20Ano odo nondidi donondona dokutongama tadi mini odo dokuhova ntano‐nambali donongwa dokuneta. 21Nye nampili ngomu da di minine, nye muntu nokudimburura si asi yido da di minine, morwa no di tara hada yipira moomu momuhowo. Makura tani pahuka. 22Nina kurugwira po, tani mono hena nompakwa ntano‐nambali donongwa dokundondomoka kosihatji simwe. 23Monyima zado tamu pwaga hena nompakwa ntano‐nambali dokurakera za senyeka mpepo zoUpumezuva. 24Makura nompakwa dokurakera tadi mini odo nompakwa ntano‐nambali donongwa. Na di sansekere vakonentu, nye nagumwe si gokuyizagwira nge.”
25Josefa makura ta tantere Farawo asi: “Nonzodi daFarawo yido tupu. Eyi ana hara kurugana Karunga, yiyo ana kudivisa Farawo. 26Nondidi ntano‐nambali donongwa kuninka asi nomumvho ntano‐nambali, ano nompakwa ntano‐nambali donongwa kuninka asi nomumvho ntano‐nambali; nonzodi yido tupu. 27Ano nondidi ntano‐nambali dokutongama donondona edi da di kwamene kuninka asi nomumvho ntano‐nambali, ano nompakwa ntano‐nambali dokurakera za senyeka mpepo zoUpumezuva kuninka asi nomumvho ntano‐nambali donzara ngadi kara ko. 28Eyi yiyo na tamba pokutantera Farawo asi, eyi ana hara kurugana Karunga, yiyo ana taresa Farawo. 29Tara, ngaku kara nomvhura ntano‐nambali dewogo lyenzi mosirongo saEgipite nasinye. 30Konyima zado ngaku kwama nomvhura ntano‐nambali derumbu, ano ewogo nalinye lyosirongo saEgipite ngava li divara, makura erumbu ngali veveke sirongo. 31Nedumba si lyewogo kapi ngali zuvhika mo hena mosirongo, morwa erumbu ngali kara mo, yeeyi edigu-digu ngali kara. 32Ozo nzodi eyi vana zi rugwililire Farawo, kuninka asi Karunga ana mana kuyitokora, ano age hena ta genderere kuyisikisa mo.
33“Farawo a papare nye ntaantani mugara gonondunge goukonentu, a mu ture mo a pangere sirongo saEgipite. 34Farawo a ture mo noforomani monomukunda, va pongaike siutano somuzangu gwaEgipite monomvhura odo ntano‐nambali dewogo. 35Ngava pongaike muzangu gonomumvho donongwa edi dina kuwiza, va pongaike nombuto monodoropa, ngava di pungure kepitisiro lyaFarawo. 36Odo nombuto ngadi pungukwire nomumvho ntano‐nambali derumbu eli ngali wiza moEgipite, neisi ngasi veva sirongo kerumbu.”
Josefa tava mu tura moupangeli waEgipite
37Odo nonkango kwa di pende oFarawo novantu vendi. 38Farawo makura ta tantere vantu vendi asi: “Nye ngatu mu gwana tupu muntu ogu nga kara nage nompepo zaKarunga ngwendi mugara ogu?” 39Makura Farawo ta tantere Josefa asi: “Ngomu ana yi ku divisa Karunga, ose nakumwe si natu mu gwana gonondunge noukonentu ngove. 40Nyove nye no kara mukurona gombara zange. Nkenye eyi ono kutantera vantu vange va yi rugane, posipundi souhompa yipo pwelike ngani pitakanena poge.” 41Farawo ta tantere hena Josefa asi: “Tani ku tumbu, o kare gepangero lyaEgipite nazinye.” 42Farawo makura ta hutura kalinga kendi kosidiviso souhompa, ta ka dwareke Josefa, makura ta mu dwareke yikoverero yoyiwa yokurerema yoyizera nokalyenge kongorodo monsingo zendi. 43Makura ta mu ninki a ronde metemba lyendi lyauvali. Vakareli vendi makura tava zigire komeho zendi asi: “Tweni nongoro!” Makura ana mu tura nye a kare mupangeli gwaEgipite nazinye. 44Ano Farawo ta tantere Josefa asi: “Nyame Farawo, nye nsene kapi ono yi panga, nagumwe si gokuvhura kugumagura mpadi zendi ndi kuwoko kwendi moEgipite nazinye.” 45Farawo makura ta ruku Josefa Safenata Panea, makura ta mu pe Asenata, munwaPotifera, mupristeli gwaOno, a kware. Josefa makura ta zi mosirongo saEgipite, a ka si tare.
46Apa ga zire Josefa mosirugana saFarawo, hompa gwaEgipite, age nomvhura dendi nomurongo ntatu. Josefa makura ta tundu po pwaFarawo, a ka gende moEgipite nazinye. 47Ano nomvhura odo ntano‐nambali, sirongo kwa zangwire muzangu gomunzi. 48Age kwa pongaikire muzangu nagunye gonomvhura ntano‐nambali odo donongwa ogu va zangwire moEgipite, ano nombuto kwa di pungwire monodoropa. Mwankenye doropa kwa pongaikire mo nombuto domomapya aga ga likara pepi nazo. 49Josefa yimo nye ga pongaikire ngoso nombuto dononzi unene, ngwendi muheke gwekefuta, dogoro tava hageke kuheteka, yeeyi nokuvhura si kuyivarura.
50Josefa kwa mu hampurukilire vanona wovagara vavali, ado nomvhura donzara simpe nokuwiza si. Asenata, munwaPotifera, mupristeli gomoOno, yige ga va mu hampurukilire. 51Ano mbeli Josefa kwa zi rukire Manase (kutanta asi kudivara), yeeyi age kwa tente asi: “Karunga ana divaresa nge ruhepo rwange narunye nembo lyotate nalinye.” 52Ano gwauvali kwa mu rukire Efurayimi (kutanta asi kukara mvhadi), yeeyi age kwa tente asi: “Karunga ana pe nge ruvharo mosirongo soudigu wange.”
53Ano nomvhura odo ntano‐nambali dewogo moEgipite eyi dina kupwa, 54nomvhura ntano‐nambali derumbu edi ga pumbire Josefa nado dina wiza. Erumbu kwa kere moyirongo nayinye, nye moEgipite nazinye amo nondya mo. 55Ano sirongo nasinye saEgipite eyi sina kukara nzara, vantu makura tava zi va ka lihenge nondya kwaFarawo. Farawo makura ta tantere Vaegipite navenye asi: “Zendeni kwaJosefa, nye tomu rugana yeeyi ana kumutantera.” 56Ano nzara kwa gwanekere uzuni naunye. Josefa makura ta paturura yihete nayinye omu mwa kere yuma, a randese koVaegipite. Erumbu edigu lya kere mosirongo saEgipite. 57Uzuni naunye kwa zire kwaJosefa moEgipite va ka rande nondya, yeeyi erumbu edigu lya kere moyirongo nayinye.
Iliyochaguliwa sasa
Genesis 41: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003