Genesis 20
20
Abirahamu naAbimereki
1Abirahamu kwa tundire poMamure, ta zi kosirongo soMbindakano, makura ta tura pokatji kaKadesi naSuru. Apa ga kere moGerara, 2nga tanta asi mukadendi Sara mpanzendi. Ano Abimereki, hompa gwaGerara, yipo ga ka retere Sara asi a ya kware. 3Masiku ogo Karunga ta monekere Abimereki monzodi, ta tanta asi: “Opo ono kara ono fu, yeeyi ogo Sara kwa mu kwara.”
4Opo ngoso age Abimereki kapi ana mu kundama simpe, makura ta tanta asi: “Hompa, to dipaga nye age muntu kutupu nzo ndi? 5Abirahamu kwa tanta asi, ‘Ogu mpanzange,’ ano age ko mwene kwa tanta asi, ‘Ogu mukurwange.’ Eyi ame kwa yi rugana nezwi lyewa lyomomutjima, kapi na zona.”
6Karunga ta mu limburura monzodi asi: “Nhi, na yi diva asi ove kwa yi rugana mezwi lyewa lyomomutjima, yiyo na ku kavere kokuzona kwange, pokudira kumuguma. 7Ano moomu ngesi, mu tengwida nye kwayendi. Age muporofete, age nga ku kandererera, neisi ngo fa. Nye nsene kapi ono kumutengwida, nyove tupu kufa, nyamoge nembo lyoge mudima.”
8Abimereki eyi ga pinduka ngurangura zonene, ta zigida vakareli vendi navenye, ta va tantere nayinye eyi. Vena makura tali va gwana ehuhwe lyenene. 9Abimereki makura ta tumine Abirahamu, ta ya mu pura asi: “Yinke eyi ono tu rugana? Ame nani yinke eyi na rugana yokuhwedesa nge nosirongo sange? Kutupu gokuyirugana eyi wa rugana nge. 10Yinke eyi wa gazara yokurugana eyi yangesi?”
11Abirahamu ta limburura asi: “Ame kwa gazara asi nampo mutupu mo omu ogu a tjira epanguro lyaKarunga, neisi ngava dipaga nge, va guse mukadange. 12Mwene‐mwene sili mpanzange. Age munwaotate, nye kozinyetu kozinyetu, ame yipo na gusa ni kware. 13Makura Karunga ta gusa nge membo lyotate, a tware nge koyirongo yapeke. Ano ame yiyo na mu tanterere asi: ‘Ngo fire nge nkenda nkenye oku ngatu za pokutanta asi, ogu mukurwange.’ ”
14Makura Abimereki ta gava Sara kwaAbirahamu. Ta mu pe hena nonzwi nonongombe novapika. 15Ta tantere Abirahamu asi: “Sirongo sange soso, kuna lizata; nkenye apa ono hara kutunga, kutunga tupu.” 16Abimereki ta tantere Sara asi: “Tani pe mukuroge yimaliva yosisiliveli eyovi, yi kare sidiviso sanavenye ava wa kara nawo asi kutupu nzo. Navenye ngava ku dive asi kapi wa zona.”
17-18 Hompa kwa patere ruvharo rovakadi navenye vemembo lyaAbimereki, morwa eyi ya horokerere Sara, mukadaAbirahamu. Abirahamu makura ta kandererere Abimereki, ano Karunga ta mu verura. Age kwa verwire hena mukadendi novapika vendi wovakadi, va rete hena vana.
Iliyochaguliwa sasa
Genesis 20: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003