Exodus 5
5
OMosesa naArona kosipara saFarawo
1Va tunda opo oMosesa naArona tava zi nye kwaFarao, va ka mu tantere asi: “Hompa, Karunga gwaIsraeli ta tanta asi: ‘Siga mbunga zange zi ze, zi ka danene nge sipito momburundu.’ ”
2Nye Farawo ta limburura asi: “Eraka lyahompa ke eli nani purakena ame, ni sige Israeli a ze.”
3Ano awo tava tanta asi: “Karunga goVahebeli yige ana gwanekere nose. Tu siga ngatu gende mazuva gatatu, tu ze momburundu, ngatu ka zambere Hompa Karunga gwetu, neisi nga tu dipagesa komukisi ndi korufuro.”
4Nye hompa goVaegipite ta va limburura asi: “One oMosesa naArona, yinke muna kugusira mbunga poyirugana yazo? Zendeni koyirugana yeni!” 5Farawo ta twikire ko hena kutanta asi: “Tareni, vantu womosirongo ntaantani vana vhuka, makura one yiyo nye muna hara asi mu va guse po poyirugana yawo?”
6Mezuva lyoolyo yilyo ga tanterere Farawo varuganesi wovantu novatareli woyirugana asi: 7“Vantu nokuvapa si hena rwenge moomu mwanare asi va forome nodopi. Kuvaninka va ka pongaike vene rwenge. 8Nye sivaro sonodopi edi ava foroma napwanare va pamperekedeni, nokuhora ko si, yeeyi vadwa, yiyo vana kuzogomoka asi: ‘Tu zeni, tu ka zambere Karunga gwetu!’ 9Vagara owo va tengekeni noyirugana, ava yi rugane va dire kugwana siruwo sokupurakena nonkango doyimpempa.”
10Varuganesi wovantu makura tava zi, va ka yi tantere vantu asi: “Farawo ta tanta asi: ‘Ame nokumupa si rwenge nampili nakauke. 11Omu ze, tomu ka hara nyamweni rwenge kooku muna kukarugwanena. Nye kombinga zoyirugana yeni kutupu asi va yi goworore.’ ” 12Vantu makura tava lihanene mosirongo saEgipite mudima, va ka pongaike yihagadidi pevega lyorwenge. 13Varuganesi tava va sininike asi: “Sikiseni mo yirugana yeni eyi va panga mezuva, ngwendi moomu ya kere porwenge.” 14Vatareli woVaisraeli ava va va tulilire po varuganesi vaFarawo, ngava va toona oku tava va tantere asi: “Yinke nye yokudira kusikisa mo nkera nanaina yirugana yeni eyi va tura po yokuforoma nodopi, moomu mwanare?”
15Yipo nye va zire vatareli woVaisraeli kwaFarawo, va ka mu likwambere asi: “Yinke ono kuruganena ngesi vantu woge? 16Rwenge ntaantani kapi vana kurupa hena vantu woge, nye kuna kutuninka asi: ‘Ruganeni nodopi!’ Tara nye, ose vantu woge kuna kututoona tupu, nye nzo zoge.”
17Nye age ta limburura asi: “Udwa one, udwa! Yiwo una kumutantesa asi: ‘Tu zeni tu ka zambere Hompa nonzambo.’ 18Tundeni po apa mu ka rugane! Nye rwenge nokurumupa si. Ano sivaro sonodopi esi va panga asi sike mo ntani.” 19Vatareli woVaisraeli tava mono asi yina va yipa nye, morwa tava va tantere asi: “Kosivaro sonodopi edi va tura po dankenye ezuva nokuhora ko si.”
20Awo apa va tundire kwaFarawo, makura tava ligwana naMosesa naArona, ava va sikamene monzira, va va ndindire. 21Awo tava va tantere asi: “Hompa ngano ta mu rugwidire kuwoko a mu pangure, morwa muna tu nyengesa kwaFarawo nokovantu vendi, yiyo mwa va pa marufuro momawoko gawo, ngava tu dipagese ko.”
Ekanderero lyaMosesa
22Mosesa makura ta zi hena kwaHompa, makura ta tanta asi: “Hompa yinke ono kuziruganena ezi mbunga momudona ngesi? Yinke wa tumina nge? 23Yeeyi kutunda apa na za kwaFarawo ni ka uyunge nendi medina lyoge, yipo ga tameka kuhepeka mbunga ezi, nye ove kapi wa zowora mbunga zoge nampili nakauke!”
Iliyochaguliwa sasa
Exodus 5: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
