Exodus 15
15
Rusumo rwaMosesa
1Yipo nye va tundire oMosesa noVaisraeli, va dimbe oru rusumo va fumadeke Hompa. Awo kwa tente asi:
“Ame kuna hara ni dimbire Hompa,
yeeyi age munene unene,
nonkambe novarondi vado ga yi
zugumina mefuta.
2 Hompa yige nonkondo dange
norusumo rwange rwekandanga,
yeeyi mwendi yimo nina parukire.
Age Karunga gwange,
age yige nina kuhamberera po.
Karunga gotate yige nina kufumadeka.
3 Hompa mukwayita,
edina lyendi yige Hompa.
4“Age kwa zugumina Farawo
nomatemba gendi goyita
novakwayita vendi mefuta.
Nontoni dendi edi ga horowora
da dama mEfuta lyEgeha.
5Etondo lyomema kwa va kudumika.
Awo kwa dama konhiinhi
ngwendi mamanya.
6“Hompa, nonkondo dokuwoko
koge kokorulyo kwa fumana,
ako kutezagura nonkore.
7Mounene wefumano lyoge
o gandere pevhu nonkore doge.
Ehandu lyoge kupwaga mo,
makura tali va veveke
moomu au veve wayi.
8Ove kufuda, makura munku goge
tagu ninki mema ga litepane,
mema gokupupa, ga sikame
ndjikiti ngwendi ekuma,
efuta lyetondo tali kukuta
nywee‐nywee dogoro kosinko.
9Nkore kwa tente asi: ‘Ngani va
konka, ni va kwate.
Ngani gaununa emona lyawo,
tani va gusa nkenye eyi nina hara.
Ngani pweza mo rufuro,
makura ngani va guse yininke
yawo nayinye.’
10Ove yipo nye wa fudire munku goge,
makura efuta tali va kudumike.
Awo kwa damene ngwendi
nterekwa momema gokupupira.
11“Hompa, yilye ga fumana
mokatji kovakarunga?
Yilye ogu ga ku heteka,
ove ogu wa yererepa moupongoki,
yirugana yoge kwa fumana ayo yokutjilisa,
ove mururugana yitetu.
12Ove kwa gonwene rulyo roge,
makura evhu tali va mini.
13Mbunga zoge ezi wa zowora,
ove kwa zi gendesa noufenkenda,
ove kwa va twara kouhingiro wokupongoka
nokuwoko koge kononkondo.
14Nombunga eyi da yi zuvha,
kwa kankama da kankama.
Ava va tunga moFilisiti
mpwagetjima tazi va gwana.
15Ano vapangeli womoEdomu kwa tukukire,
va kare vanankondo womoMowaba
nawo kwa kankamene.
16Etukuko nowoma kwa va gwene,
unene wokuwoko koge yiwo
wa va mwenekedere va fane mamanya,
azo mbunga zoge tazi piti, Hompa,
awo vantu woge ava
wa horowora kuna kupita.
17Ove ngo va twara mo, makura to
va tapeke pevega eli wa liwapaikira,
asi li kare uhingiro woge wanarunye,
evega lyokupongoka eli ga dika
mawoko goge, Hompa.
18 Hompa yige nga pangera narunye‐narunye.”
Rusumo rwaMiliyama
19Nonkambe daFarawo noturukara twendi toyita novarondi vendi wononkambe kwa zire mefuta, makura Hompa ta tengwida mema ga va kudumike. Nye Vaisraeli kwa vindakanene efuta, awo kuna kugenda poukukutu.
20Ano Miliyama, muporofete gomukadi, mpanzaArona, makura ta gusa ngomagona zongoporo. Ano vakadi navenye tava mu kwama nonongoma dawo oku tava dana. 21Miliyama makura ta va limburura oku ta tongwenyene asi:
“Dimbeni mu fumadeke Hompa,
yeeyi age munene unene.
Age kwa zugumina nonkambe
novarondi vado mefuta.”
Mema goururu
22Mosesa makura ta katura Vaisraeli pEfuta lyEgeha va vyuke momburundu zaSuru. Awo kwa gendere mazuva gatatu momburundu va hana kugwana mema. 23Makura tava wiza poMara, nye mema gopoMara kapi va vhulire kuganwa, morwa ururu. Yipo nye ava li tumbwire olyo evega asi Mara. 24Mbunga makura tazi vhungutire Mosesa asi: “Yinke nye eyi natu nwa?” 25Mosesa makura ta kugu kwaHompa; ano Hompa ta mu likida sitji, gwina ta si zugumine momema, makura mema taga tovara.
Opo yipo nye ga va pererere Hompa sipango nompangera a va heteke, 26ta tanta asi: “Nsene mu zuvha eraka lyaHompa Karunga gweni, mu rugane eyi ya hungama, mu sikise mo yipango nonompangera dendi nadinye, ngano kapi ngani mu pa uvera ou na pere Vaegipite; yeeyi ame nyame Hompa, muveruli gweni.”
27Awo makura tava ka sika poElimi, apa pwa kere marunone gomema murongo nagavali nonongone nomurongo ntano‐nambali, makura tava dike kamba zawo opo pomema.
Iliyochaguliwa sasa
Exodus 15: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
