Лебийлиле 24

Чыракъгъа жараулу жау

(Чыгъ. 27:20-21)

1Раббий Муссагъа былай айтханды:

2– Исраил улулагъа буйрукъ бер да, ала санга таза зейтун жау келтирсинле. Бу жау, чыракъла дайым жанып, жарытыр ючюн, чыракълагъа къуюлсун. 3Харун хар заманда, ингирден эрттеннге, чыракъланы Тюбешиу Чатырда Шагъатлыкъ Кюбюрню сакълагъан жабыуну аллында, Раббийни аллында салсын. Сизни келлик тёлюлеригизге бу – ёмюрлюк жорукъду. 4Таза алтындан ишленнген чырахтанны чыракъ орунларына Раббийни аллында дайым да заманында жау къуйсунла.

Сыйлы ётмекле

5– Бидиш ун алып, онеки ётмек бишир. Хар ётмек эфаны ондан экиси#24:5 4,5 литрге жууукъ. чакълы ундан этилсин. 6Аланы алтышар-алтышар эки тизгиннге, Раббийни аллына, таза алтындан ишленнген столну юсюне сал. 7Хар тизгинни юсюне таза ладан сал. Бу, ётмеклени орунуна, эсгертиу юлюшге, Раббийге отда кюйдюрюлген къурман болсун. 8Исраил улуланы атындан ётмеклени хар заманда, хар шабат кюн, Раббийни аллында салыргъа керекди. Бу – ёмюрлюк кесаматды. 9Бу ётмекле Харунну бла аны уланларыны болсунла. Ала ётмеклени сыйлы жерде ашасынла. Раббийге отда кюйдюрюлген саугъаладан бу аланы бек сыйлы юлюшлериди. Бу – ёмюрлюк жорукъду.

Аллахны аманлагъаннга азап жетдириу

10Бир исраилли тиширыуну бла мисирли кишини уланлары болгъан адам исраиллилени къонушларына келип, бир исраилли бла тюйюшгенди. 11Исраилли тиширыуну уланы Раббийни Атын аманлап, кяфыр сёзле айтханды. Аны Муссагъа келтирдиле. Анасыны аты – Шеломит эди. Ол, Данны тайпасындан, Дибрийни къызы эди. 12Ол адамны, Раббий не буюругъун билгинчи, сакълаучуну къолуна бердиле.

13Раббий Муссагъа былай айтды:

14– Кяфыр сёзле айтхан адамны къонушдан тышына чыгъар. Аны айтхан сёзлерин эшитгенле аны башына къолларын салсынла да, битеу жамауат аны ташла бла уруп ёлтюрсюн. 15Исраил халкъына былай айт:

«Аллахына къаргъыш этген адам, ол гюняхына жууаплы болуп, азап чексин. 16Аллахны Атына аман сёзле айтхан адам ишексиз ёлтюрюлсюн. Битеу жамауат аны ташла бла уруп ёлтюрсюн. Тыш адам болсун, кеси адамыгъыз эсе да, Раббийни Атын аманласа, ёлтюрюлсюн.

17Башха адамны жанын алгъан адам ишексиз ёлтюрюлсюн. 18Биреуню малын ёлтюрген адам, тёлеуге, мал ючюн мал берсин. 19Башха адамгъа жара салгъаннга, кесине тюз аллай жара этилсин: 20сындырыу ючюн сындырыу, кёз ючюн кёз, тиш ючюн тиш. Башха адамгъа ол къаллай жара салгъан эсе да, аны кесине да аллай жара салынсын. 21Биреуню малын ёлтюрген адам аны тёлесин, адамны ёлтюрген а ёлтюрюлсюн. 22Тыш адамгъа да, кеси адамыгъызгъа да, хукму бир кибик болсун. Мен – Раббийме, сизни Аллахыгъыз».

23Мусса быланы Исраил улулагъа билдиргенден сора, кяфыр сёзле айтхан адамны къонушдан тышына чыгъаргъандыла да, аны ташла бла уруп ёлтюргендиле. Алайды да, Исраил улула Раббий Муссагъа буюргъаны кибик этгендиле.

Iliyochaguliwa sasa

Лебийлиле 24: МалкъСК

Kuonyesha

Shirikisha

Nakili