PAU-PAUWANNA SIKONJO SURO-SURO 10
10
Petrus surang Kornelius
10:1-48
1Ri Kaisarea rie' tau bura'ne arenna Kornelius, se'rei parawira pasukang nuriare' pasukang Italia. 2Ia baji' geo'na, ia surang sibatu saponna malla' ngase'i ri Allataala na ia lohe passidakka lapassareang mange ri umma' Yahudi na sanging ngera dowaangi mange ri Allataala. 3Lalang rise're panjanjang, latette' tallu barang karahie', ia baji' panjanjanna rie' se're malaeka'na Allataala antama' ri saponna na lakua mange ri ia, ”Kornelius!” 4Latangarai malaeka' injo na lalang malla' ia appau, ”Apa Karaeng?” Appihali malaeka' injo mange ri ia, ”Sikonjo pangera dowaammu na passidakkamu nai'mu ri a'rakanna Allataala na Allataala lau'rangiko. 5Konni-konnina suroi sikura tau laa'lampa mange ri Yope lalakeokangko tau riareng Simon turiareng injo pole Petrus. 6Ia a'bangngi ri saponna tau paanyi' kukkulu turiareng Simon ammari ri biring bone.” 7Sungka'i maemmo a'bisara malaeka' injo mange ri ia ribokoimu, lakeo'mu rua atanna surang se're tau tantarana tubaji' injo geo'na battu risikuanna tau sanging assurang injo ia. 8Sungka'i maeng laseseiang sikuanna mange ri iyai, ia lasuroimu mange ri Yope.
9Rimintara'namo mae ritangnga allona talluiya tau injo rieki juapai ritangnga lalang na seppa'mu ri Yope, nai'i ri tanggaruma Petrus langera dowaang. 10Ia appisa'ringi pa're na sanna' a'ra'na nganre, mingka ampamu laripappatalaang kanre, sikalinna latallisi nyahana rikahasana Allataala. 11Ia lajanjangi ta'bungkara langi' na rie'mo se're nunaung assimpole kaeng la'ba' ta'gojeng appa'iya kasusuna, nuta'uloro naung ri tana. 12Assinna rie' ngase'i rupanna binantang appa' injo bangkenna, binantang a'lolo' na sikonjo jangang-jangang. 13Maeng injo rie'mo sa'ra kalangngerang ri ia lakua, ”Ambaungko, Petrus, sumbele na kanrei!” 14Mingka appihali Petrus, ”Untu'a, Karaeng, saba' gelepa minang nganre nuharang surang nurammasa.” 15Kalangngerammu isse' sa'ra injo makapinruang appau mange ri ia, ”Apa nulapahallalang Allataala, gele akkulle mupa'harangang.” 16Passala injo pintallungi lapakkuling na rimaenna injo tarangka'mu kaeng injo nai' ri langi'.
17Ria'amu-amuna juapa Petrus lalang ri atina, apamo bantuanna nusiba'lalo injo lajanjang, tau risuroi injo ri Kornelius la'boja saponna Petrus, riekimu ammenteng ri a'rakang babaang. 18Akkeokimu se're tau na lakuta'nangi, Apa Simon turiareng injo Petrus rie'i a'bangngi ri sapo inni?
19Rihattu a'amu-amuna juapa Petrus ripassala nulajanjang injo, appaumu Nyaha Allataala mange ri ia, ”Rie' tallu tau labojako. 20Ambaummoko na naungko na a'lampako surang iyai, akomo bata, saba' Nakke jua assuro ri iyai.” 21Jari naummu Petrus appaui mange ri tau injo, ”Nakkemo tau muboja injo, apa pattujummu rieki mae konni?” 22Appihali ngase'mu, ”Kornelius, se'rei parawira lambusu atina na malla'i ri Allataala, na baji' laisse'na risikonjo tau Yahudi, maengi risare pappijo'jo' rise're malaeka' Tangkasa, solanna ia lakeo'ko mange ri saponna na lalapilangngeri nulamupau injo.” 23Jari lakeo' ngasekimu a'bangngi ri injo.
Mintara'na mae ambaungimu na a'lampai a'rurung-rurung ngase', na lohe todo' urang siana' battu ri Yope lapinahangi. 24Ri allo mintaranna mae pole ambattuimu ri Kaisarea. Kornelius attangngai latajang-tajangi na ia maeng ngase'mu lakeo' bija pamanakanna surang baha'-bahaanna laasse're-se're. 25Rihattu antama'na Petrus, mangemu Kornelius laruppai. Ia a'demporo ri a'rakang bangkenna Petrus lasombai. 26Mingka Petrus lapaentengi ampai appau, ”Ammentemmoko, nakke inni rupatau samara to'jua.” 27Riallagarinna, ia antamakangi na larumpa'i lohe tau asse're-se're. 28Appaui Petrus ri iyai, ”Muisse'i, anteekamua terasa'na pappisangka inni ri tau Yahudi laassurang-surang iyareka laassileo' risikuanna tau gele Yahudi. Mingka Allataala maeng appijo'jo'i mae ri nakke ma'nassana gelea akkulle a'ngare' manna mange jua rise're tau rammasa iyareka harang. 29Injomo saba'na nagelei bera' nyahaku mae konni rihattu rikeo'ku. Konni-konnina a'ra'i kuisse' ngura narikeo'a.” 30Appihali Kornelius, ”Patangallomu lappasa'na barang rihattu komo inni, iamo intu tette' tallu rikarahie'na, ngera dowaanga ri sapongku. Gele kusanna-sanna sikalinna rie' se're tau ammenteng ri a'rakangku, ammillere pakeanna 31na appaui, Kornelius, pangera dowaammu lalangngeremu Allataala na passidakkamu lau'rangi ri a'rakanNa. 32Injomo saba'na, assuroko tau lamange ri Yope lakeo'i Simon turiareng injo Petrus; ia a'bangngi ri saponna Simon, se'rei paanyi' kukkulu, tau ammari ri biring bone. 33Injomo saba'na lassirima assuro tau lamange ri kau, na lalang rikarannuang kau rie' mae konni. Konni-konnina kambe ngase' rie'kang ri inni ri a'rakanna Allataala latapilangngeri nulapassuroang injo Karaeng Isa mange ri kau.”
34 #
Ul. 10:17
Jari pakaramulamu Petrus a'bisara, ”Sitoje'na kupahammu ma'nassana Allataala gele appassisala tau. 35Sikuanna tau manna bangsa tau battu ri antee juai mae ampa tappa'i ri Allataala na lapa'toje'i kanabaang ri Allataala lalang ripanggeokanna. 36Iamo pau numaeng lapabattu injo mange risikuanna tau ri Israele rihattunna Ia lapappiissekangi dame salehangang patteteang ri Isa Almase Iamo Karaeng ri iangase'na rupatau. 37Muisse'i sikuanna passala nua'jari injo risibatu Yudea, pakaramula battu ri Galilea, rimaennamo panrio injo lapappiissekang Yahya, 38iamo intu passala'na Isa battu ri Nazaret. Anteekamua Allataala labarakkaki Isa ri Nyaha Tangkasa na kahasa, Ia, tua'lingka-lingka injo mange-mange ampai a'geo' baji' na appakagassingi risikuanna tau lakahasai Ibilisi, saba' Allataala minahang ri Ia. 39Kambe ngase'mo inni sa'bi riiangase'na nulageokang injo Karaeng Isa ripammarianna tau Yahudi iyareka ri Yerusalem; na Iyaimo maeng lahunoi rilagojenginna risalli'. 40Allataala lapakaattalasai muliang ri allo makatalluna na Ia ripa'biangi lapappijanjangang kalenNa, 41gele mange risikuanna tau, mingka mange jua risa'bi-sa'bina, nurigelenapa injo maemmu rijo'jo' ri Allataala, iamo intu mae ri kambe tumaeng injo sipanganreang na sipanginungang surang Ia, sungka'i attallasamo muliang battu risikuanna tau mate. 42Ia maeng lasarekang jama-jamaang appala'bang mange risibatu bangsa injo, na assa'bi ma'nassana Iamo ritantuang ri Allataala laa'jari Hakking risikuanna tau attallasa surang tau mate. 43Passala'namo Ia sikonjo nabbi assare sa'bi ma'nassana inai tappa' mange ri Ia, languppai pangampungang kadorakaang ripassabakang arenNa.”
44Riappau appakonjona Petrus, turummu Nyaha Tangkasa mange risikuanna tau rie' appilangngeri injo bisaranna. 45Sikonjo tau tappa' battu risossorang Yahudi lapinahang injo Petrus, ammangnga-mangnga ngase'i, saba' anjanjanginna pangamaseang, iamo intu Nyaha Tangkasa ripadongko' todo'i ri tau maraeng, 46Saba' lalangngerinna tau lohe injo a'bisara ri lohe rupanna bisara na appakala'biri ri Allataala. Jari lakuamo Petrus, 47”Akkulleka tau inni ripisangkai laririo ere, na iyai inni maeng ngase'mu narima Nyaha Tangkasa assimpole ditte?” 48Maeng injo ia lasuro rio ngase'i lalang arenna Isa Almase. Maeng injo laeraimu ri Petrus laammari sikurangallopa pole surangang iyai.
Iliyochaguliwa sasa
PAU-PAUWANNA SIKONJO SURO-SURO 10: LAI_SLY
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@LAI 2012 Indonesian Bible Society (Lembaga Alkitab Indonesia)
