Lujia 6

Hhamuraku Udude Boudei Qiorun Sidazho

(Mat 12:1-8; Mak 2:23-28)

1Nie hhamuraku udude Ersa boudei ghazhaghun yozhi daokude tujilani boudei qiorunni sidadene huluzhi ijiezho. 2Niezhan Falisai kunla kieliewo, "Ta yangiezhi hhamuraku udude ulie giekui giene?" 3Ersa hhelade kieliewo, "Dawude hhantuku kunlarene oliesukude giesan shiqinyi ta onshizhi ese daowu? 4Hhe Hudai giede orodene Hudade ogiku ginanyi bareidene ijiewo. Pse hhantuku kunladene ogiwo. Ene ginanyi buwase andase kiema ijiezhi ulie olune." 5Ersa pse hhelade kieliewo, "Kunnikewonshi hhamuraku uduni Ezhan wo."

Ghosan Khanni Goudaghazho

(Mat 12:9-14; Mak 3:1-6)

6Pse nie hhamuraku udude Ersa huitande orodene kunlade sughazho. Hhende nie borun khani ghosan kun wine. 7Jinwun hanjia, Falisai kunla Ersa hhamuraku udude goudaghase zhaku zhenji ereine giezhi ghulazhi uzhezho. 8Ersa hhela sumulasei mejiedene khani ghosan kunde kieliewo, "Bosizhedene dunda bei." Ingie hhe kun bosizhedene beiwo. 9Ersa hhelade kieliewo, "Bi tande asaye, hhamuraku udude gouni giese gou onu huaini giese gou wo? Aminni jiuinu, heine? Alinie oluzho?" 10Ingie zhouwini kunlai uzhedene hhe kunde khane khizhegha giese khizheghase khani goudawo. 11Ingiese hhela hende hokudene Ersai matugiene giezhi shanlian giezho.

Ersa 12 Gie Shitu Sunghuwo

(Mat 10:1-4; Mak 3:13-19)

12Hhe xienzide Ersa ulade khireidene nie xii Hudase onxian giewo. 13Ogheikude tujilane uru iredene hhelai dundase 12 gie kun sunghudene shitu danlaghawo. 14Hhelai niereshi Ximun (Ersa Ximunde niere ogise Beduru giene), hhei jiu Andelie, Yagebu, Yaheiya, Feili, Badolomai, 15Matai, Doma, Yalefeini kewon Yagebu, Rexinpai giezhi urusan Ximun, 16Yagebuni kewon Yuda, pse Ersai ghudandusan Jialie kun Yuda wo.

Olon Kun Ersani Daghazho

(Mat 4:23-25)

17 Ersa hhelare hhantu boudene pin oronde beiwo. Olon tujilaye hhantu wo. Pse tebieji olon bexinla Yudaya, Yelusalen, haibienzini Tuilo, Xidunse man irezho. 18Hhela Ersa jianjisan kielienni chenliezhi gientulai goudaghase giezho. Sudoro zannan ruhher orosan kunlai goudaghawo. 19Kunla man Ersai maqine giezho. Hhei nenli khizhese gientulai man goudaghane.

Fuqi Gou Widakughala

(Mat 5:1-12)

20 Ersa qiorunne qila tujilane uzhedene kieliewo,

"Jiahui kunlade fuqi wine,

Hudai gojiashi tanughun wo.

21Ede oliesusan kunlade fuqi wine,

ta chudune.

Ede wilasan kunlade fuqi wine,

ta bayasune.

22Mii yenyinghala kunla tai henjizhi fandui giene, shizheghazhi doghun kun danlaghadene minshenyi bixindaghase tande fuqi wine. 23Hhe shihoude ta bayasuzhi jiulindu, asiman jiere tande ogiku jianli fugie wo. Tani xienrenlaye xienzhilani ingiezhi fandui giezho.

24Ta bayan kunlade gou widawo,

ta xianshou gie kuruwo.

25Ede chudusan kunlade gou widawo,

ihou ta oliesune.

Ede bayasusan kunlade gou widawo,

ihou ta houhui giezhi wilane.

26Kunla man tai kuaiku shihoude tande gou widawo, hhelai xienrenlaye jia xienzhilai ingiezhi kuaizhi daozho."

Duitoudene Orendu

(Mat 5:38-48; 7:12)

27"Ingieliuzhe kielienyimi chenliesan kunlade bi kielieye. Duitoudene ore, tani henjisan kunlade goude gie. 28Tani sugiesan kunlade gouni kielie. Tai peichilasan kunlade oluzhi onxian gie. 29Kunla niemien khizhaichii eghise pse niemienne eghigha. Kunla chii mienzii jienni agi echise lizii jienneye ogi. 30Kunla xiahua giezhi kerese ogi. Tani dunxilani agi echise kerezhi bu ire. 31Ta kunlai goyadene matugie gieghaku duranshi taye kunlade qingiezhi gie."

32"Ta zinie tande oresan kunlade orese yan gou wo? Zuirenlaye goya oresan kunladene orene. 33Ta zinie tande goude giesan kunlade goude giese kunlase yan gou wo? Zuirenlaye ingiezhi giene. 34Ta baer asughuzhi ogikude goyane ogine giesan hhe kunlade ogise kunlase yan gou wo? Zuirenlaye zuirenlade asughuzhi ogidene yen khareizhi kerene."

35"Ta duitoudene ore. Hhelade goude gie. Baer asughuzhi ogise khareizhi ogi dakuse bu ayi. Qingiezhi giese tande jianli olon wo, Zui Undu Hudai kewosi gholune. Huda nenjienni matasan kun, doghun kunlade man goude giene. 36Adatai ubali xiiku mutun taye qingiezhi ubali xii."

Kunlai Bu Kielie

(Mat 7:1-5)

37"Kunlai bu kielie, taiye ulie kieliene. Kunlade zui bu jinji, tandeye zui ulie jinjine. Kunlani roulie, taiye rouliene. 38Kunlade ogi, ingiese tande khareizhi ogine. Tande ogise gashende sidaghazhi daruzhi moighazhi olon ogine. Ta kunlade yanghala nanjizhi ogise tandeye yanghala nanjizhi ogine."

39 Ersa pse hhelade bilazhi kieliewo, "Sugho sughone uduru shidanu? Qingiese ghuala nokiende anda ulie bounu? 40Xieshen loushise fugie uwo. Xieshenla man suru baraghase loushighala jian pindane. 41Chi yangiezhi gaijiune nudundedu osun zhazhai chanlane, goya nudundedu lianni chanla dane? 42Chi goya nudundedu lianni chanla dadene matui 'Gaijiu, bi chini nudundedu osun zhazhai agiye.' giezhi kieliene? Chi ene jiazhon giesan kun, xien goya nudundedu lianni agidene uzhezhi qinchu olusenu gaijiune nudundedu osun zhazhai agi."

Mutun Alimani Bilazho

(Mat 7:16-20; 12:33-35)

43"Gou mutun jiere langan alima ulie soune. Langan mutun jiere gou alima ulie soune. 44Alimani uzhese mutunni tanine. Eghesunse uhuago zhei dane, osunse putouiye zhei dane. 45Gou kunlai zhughede gounishi yen gouni khizheghane. Doghun kunlai zhughede doghunnishi yen doghunni khizheghane. Zhughede durusei amande kielie khizheghane."

Ghua Gie

(Mat 7:24-27)

46"Ta mini yangiezhi, 'Ezhan, Ezhan!' giezhi waradadene mii kielien mutun ulie giene? 47Mini enende iredene mii kielienyi chenliedene giesan kun yanni xianli bikui bi tande kielieye. 48Hhe hoxian nie goude gie beighasan kunyi xianli. Zeminni waizhi gundaghadene jigunni fugie tashi jiere giezho. Fugie usu irezhi gieni chunjiliuzhe ulie gojiolune. 49Mii kielienyi chenliedene ulie giesan kunshi hoxian jichu ulie waidene gie beighasan kunyi xianli. Usu nie chunjise gie tairewo, pse tairesan fugie wo."

Iliyochaguliwa sasa

Lujia 6: sce

Kuonyesha

Shirikisha

Nakili