Lujia 5

Tujilani Uruzho

(Mat 4:18-22; Mak 1:16-20)

1Niudude Ersa Genisaleni hu ghizhade beizho. Olon kun jigheidazhi Hudai kielienni chenliene giezho. 2Ersa uzhese hu ghizhade ghua chon beizho. Zhaghasun bareisan kunla chon jiere uwo, on waghazhi souzho. 3Ersa Ximunyi chon jiere khireidene Ximunde kieliewo, "Chonne bienzise usu dunda daogha." Ingie chon jiere soudene olon kunlade sughawo. 4Jianji baludene Ximunde kieliewo, "Chi chonne keizhi usui gun oronde echi on xiaizhi zhaghasun barei." 5Ximun kieliewo, "Bijien nie xii bareise yama barei dawoma, chii kielien mutun bi onni xiaiye." 6Ingie onni xiaidene zhaghasun texien olon bareizhi onni bii gha olughakui xianli. 7Hhela kha rouizhi psedu chon jieredu kunlai banman giele ire giezho. Hhela iredene ghua chon jiere zhaghasunyi durughase chon pudane giezho. 8Ximun-Beduru ene shiqinni uzhedene Ersani melie papalazhi kieliewo, "Ezhan, chi mase likai gie, bishi zuiren wo!" 9Ximun hhantuku kunla zhaghasun texien olon bareise uzhe beizho. 10Xibitaini kewon Yagebu, Yaheiyashi Ximunyi nokie wo. Hhelaye uzhe beizho. Ingie Ersa Ximunde kieliewo, "Bu ayi. Enedu khuinase chi kun louine." 11Hhela chonlai haibienzide khizhegha soyujilane man jiedene hhei daghawo.

Pifugientuni Goudaghazho

(Mat 8:1-4; Mak 1:40-45)

12Niefade Ersa chenshide bikude hhende nie hunshendeni pifugientu kun wine. Hhe Ersai chanlasenu papaladene xiahua giewo, "Ezhan, chi duran bise mini ganjinragha shidane." 13Ersa khane zhighazhi hhei maqizhi kieliewo, "Bi duran wine. Chi ganjinra." Ene kielienni dei kieliese pifugienni goudawo. 14Ersa hhende fenfulazhi kieliewo, "Chi kiemade bu kieliedene echizhi beyene buwade uzhegha. Musai shu jiere fenfulasan mutun beyechii ganjinrasande oluzhi Hudade mure ogizhi kunlade ganzhen bei." 15Ingieliuzhe Ersani minshen yebeiseye fugiedazho. Olon kunla Ersani kielienni chenliezhi gienne goudaghale irezhoma, 16Ersa tuidene hontande onxian giele echizho.

Tanhon Gientuni Goudaghazho

(Mat 9:1-8; Mak 2:1-12)

17Niudude Ersa kunlade surughakude Falisai kun, jinwun loushila kanzideni souzho. Enela Jialili, Yudayani go aghin, Yelusalense irezho. Hudai nenli Ersaghala hhantu bizhi kunlai gienni goudaghazho. 18Kunla ruzide nie tanhon giesan gientui qienliezhi Ersai shida echine giese 19kun olonshi echi dazho. Ingiesenu gie jiere khirei wani agidene ruzide bareizhi Ersai melie boughawo. 20Ersa hhelai xianxin giekui uzhedene kieliewo, "Zhanlien, chii zuini mienliewo." 21Ingiese jinwun hanjia, Falisai kunla kieliendu qiiwo, "Imutu kufurei fanjichen kunshi kien wine? Hudase chugo zuini kien mienliene?" 22Ersa hhela sumulasanni mejiedene kieliewo, "Ta yangiezhi zhughedene imutui sumulane? 23Chii zuini mienliewo giese sunfan onu, bosizhe yo giese sunfan wo? 24Ingieseye Kunnikewon duyade zuini mienlieku qienli bikui tande mejieghane giezho." Ingiedene tanhon giesan gientude kieliewo, "Bi chade kielieye, bosizhedene ruzine agi giedene echi."

25Hhe kun kunlai melie deigo bosi ruzine agisenu Hudai kuaizhi giedene echiwo. 26Kunla man ghanira beizho. Zhughesene ayizhi Hudai kuaizhi kieliezho, "Enedu bijien nie fugie shiqin uzhewo!"

Liwini Uruzho

(Mat 9:9-13; Mak 2:13-17)

27Enese khuinashi Ersa khireidene shui shanjisan Liwi giesan nie kun shui shanjisan oronde sousei chanlawo. Ersa hhende kieliewo, "Chi mii dagha." 28Ingie hhe man benda jie bosizhedene Ersai daghawo.

29 Liwi Ersade oluzhi giedene fugiede xi beilawo. Shui shanjisan tebieji olon kunla psedu kunlare hhantu xi souzho. 30Falisai kun, hhelai jinwun hanjiala Ersani tujilani sugiezhi kieliezho, "Ta yale shui shanjisan kun, zuirenlare hhantu ijiezhi ochine?" 31Ersa kieliewo, "Gien witu kunla deifu ulie kerene. Gientula deifu kerene. 32Bi irese gou kunlai ereile ese irezho, zuirenlani geizhen gieghale irezho."

Orozo Bareiku

(Mat 9:14-17; Mak 2:18-22)

33Hhela kieliewo, "Yaheiyani tujila chan orozo bareizhi onxian giezho. Falisai kunni tujilaye ingiezhi giezho. Zinie chii tujila jin ochizhi ijiezho." 34Ersa hhelade kieliewo, "Ghurunde iresan zhochenla shini khughon bikude matugie orozo bareine? 35Shini khughonni kunla lai echiku udu kuzhene. Hhe udude hhela orozo bareine."

36 Ersa pse bilazhi hhelade kieliewo, "Shini jienne ghighazhi khuichen jien jiere huduchen kun uwo. Qingiese shini jien tanturawo. Pse ghigha bouzhesan hhe nie shidu khuichenni jiere ulie talane. 37Shini jiuni khuichen tulunde zhonlochen kun uwo. Qingie zhonlose shini jiu tulunni ghalughazhi jiu usuru khizhese tulunye qida olune. 38Shini jiuni shini tulunde zhonlone. 39Kunla khuichen jiu ochidene shini jiu ochiku duran uwo. Hhela kieliese khuichenni gou wo giene."

Iliyochaguliwa sasa

Lujia 5: sce

Kuonyesha

Shirikisha

Nakili