Якъубил кагъат 3
3
3 бетӀер
МацӀалда чангит бай нужеца
1Нужеда гьоркьоса гӀемерал чагӀи вагӀза-насихӀат гьабизейилан лъугьин лъикӀаб иш гуро, дир вацал, насихӀатчагӀаздаса Аллагьас дагьабги цӀикӀкӀун тӀалаб гьабила. 2Нилъ киналгоги гӀемерисеб мехалъ нухдаса тарула. РагӀудалъун нухдаса таричӀев чи – гьев камилав чи ккола, жиндирго черхалда чангит базеги кӀолелъул гьесда. 3Нилъеца чода кӀалдираял рани, гьеб кӀудияб хьвани нилъее тӀубанго мутӀигӀлъула ва бокьараб рахъалде бачине кӀола. 4Мисалалъе босилин гама: кутакаб гьороца хъамун унеб кӀудияб гама гьитӀинабго рулалъул кумекалдалъун бокьараб рахъалде сверизабизе кӀола гьеб бачунев чиясда. 5Гьедин, жибго гьитӀинаб лага букӀаниги, мацӀалдаги кӀола кӀудиял ишал гьарунин жинцайилан чӀухӀдаризе. Нужеда лъала цӀадул гьитӀинаб хӀенехӀалъ кӀудияб рохь бухӀулеблъи. 6МацӀ – гьеб ккола цӀа. Гьаб дуниял мунагьазул цӀун бугеб гӀадин, нилъер черхалъул цогидал лугбазда гьоркьоб мунагьазул цӀураб лага буго гьеб. Гьелъ нилъер тӀолабго напс хъублъизабула ва инсанасул кинабго гӀумруялда цӀа рекӀинабула, жибгоги жужахӀалъул цӀаялъ бухӀула. 7Киналго гӀалхул жанаваралги, хӀанчӀиги, борхьалги ва ралъдал хӀайваналгицин жиндего мутӀигӀ гьаризе кӀвана ва кӀолелги руго инсанасда, 8амма мацӀ мутӀигӀ гьабизе лъиданиги кӀоларо. Гьеб буго жинда чангит базе кӀолареб, хвалде рачунеб загьруялъул цӀураб квешлъи. 9МацӀалца гьабула нилъер Эмен Аллагьасе рецц, амма гьебго мацӀалца какула жиндаго релълъун Аллагьас рижарал гӀадамал. 10Цого кӀалдисан рачӀуна баркалаялъулги нагӀанаялъулги рагӀаби. Гьедин букӀине бегьуларо, дир вацал. 11Цого иццунисан чвахулебищ бацӀцӀадабги цӀамгӀалабги лъим? 12Инжиралъул гъотӀода зайтуналъул пихъ бижулебищ? Яги цӀолбол гъабуда тӀад инжир бижулебищ? Гьедин цӀамгӀалаб лъадал иццунисан бацӀцӀадаб лъим чвахуларо.
ГӀакъиллъиялъул кӀиго тайпа
13Нужеда гьоркьов цониги гӀакъилав-цӀодорав чи ватани, гьес жиндирго лъикӀаб хьвада-чӀвадиялдалъун бихьизабизе ккела жив гӀакъилав ва гӀодове виччарав чи вукӀин. 14Амма нужер рекӀелъ хъубаб жахӀдаги чӀухӀун цеве кӀанцӀизе бокьиги бугеб батани, гьересиялъ битӀарабги хъублъизабуге, цӀакъал-тӀокӀал чагӀи ругиланги реццаруге нуж. 15Гьединаб «гӀакъиллъи» тӀасан рещтӀараб гуро, гьеб буго дуниялалдасан, мунагьаб напсалдасан ва илбисалдасан бачӀараб. 16Цоцаздехун жахӀдаги бугони, чӀухӀун цере кӀанцӀизеги бокьулеб бугони, гьелъ рачуна гӀала-гъважаялдеги квешлъиялдеги. 17Зобалаздасан рещтӀунеб гӀакъиллъийин абуни, гьеб бацӀцӀадаб букӀуна, гьединго сабруяб, хӀалимаб, гӀадамазухъ гӀин тӀамулеб, гурхӀел-рахӀмуялъул цӀураб ва лъикӀаб пихъ тӀад бижулеб гъветӀ гӀадинаб букӀуна. Гьеб гӀакъиллъиялъул васвасдиги ххвелалги рукӀунаро. 18Ракълие рачел къарал гӀадамаз ракълил хьон хьараб хуриса ритӀухълъиялъул бачӀин бакӀарула.
Iliyochaguliwa sasa
Якъубил кагъат 3: АварАК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2005-2023