Пётрил тӀоцебесеб кагъат 2
2
2 бетӀер
1Гьанже кинабго квешлъиги, хӀилла-рекӀкӀги, ххвелал гьариги, жахӀда-хӀусудги, мацӀги рехун тун, 2гьабсагӀат гьабураб лъимер гӀадин, нужги гӀедегӀе бацӀцӀадаб рухӀанияб рахьдаца къеч буссинабизе, гьеб гьекъон нужго кӀудиял гӀезе ва хвасарлъизе. 3БетӀергьанасул рахӀму-цӀоб щибали лъайдалха нужеда!
Аллагьас тӀаса бищараб ГамачӀ
4Къадалъ лъезе ярагьунарилан гӀадамаз нахъе рехараб, амма Аллагьас тӀаса бищараб, къиматаб ва чӀагояб ГанчӀихъе рачӀа нуж. 5Нужгоги чӀагоял ганчӀаллъун ругелъул, нужгоги къадалъ лъун балеб буго мукъадасаб рукъ. Гьенир нуж рукӀина Аллагьас тӀаса рищарал кашишаллъун, ва ГӀиса МасихӀидалъун Аллагьас къабул гьарулел илагьиял къурбаналги кьела нужеца. 6ТӀехьалда буго: «Гьале дица Сионалда лъолеб буго тӀаса бищараб, цололъ рекъолеб ва къиматаб гамачӀ. Гьеб ганчӀида божарав чиясул ракӀбухӀиларо». 7Божи-иман бугел нужее къиматаб буго гьеб. Божуларезени – «Къадалъ лъезецин ярагьунарилан къадахъабаз нахъе рехараб гамачӀ битӀахъе цололъ лъун буго». 8Цогиги:
«ГӀадамазул хӀетӀе тункулеб гьецӀо ва гьел гӀодор ккезе гьарулеб гамачӀ». Аллагьасул каламалъухъ гӀенеккуларелъулин гьезул хӀетӀе тункулеб, – гьединаб къадарлъидалха гьезие хъван букӀараб.
9Нуж руго тӀаса бищараб агьлу – Зобалазул ПарччахӀасул кашишзаби, мукъадасал гӀадамал, Аллагьасул жиндирго халкъ. Гьес бецӀлъиялдаса нуж жиндирго гьайбатаб нуралде ахӀана жиндирго чӀахӀиял ишазул хӀакъикъат тӀибитӀизабизе. 10Цере нуж цо халкъ букӀинчӀо, гьанже нуж Аллагьасул халкъ ккола. Цебе нужеда цӀоб лъун букӀинчӀо, гьанже нужеда цӀоб лъун буго.
Иман лъуразда тӀадал ишал
11Гьаб дуниялалъул рокъор нуж нухлулалги апарагзабиги ругелъул, дица нужеда гьарула, хириял, нужер рухӀалда данде багъулеб чорхол гьаваялдаса напс цӀуне. 12Мажусиязда гьоркьор цӀакъго лъикӀ хьвадизе ккола нуж, нужеца квешлъи гьабунилан гьез нужеда гӀайиб чӀвараб мехалъгицин, жидее лъикӀлъи гурони гьабичӀин нужецайилан мукӀурлъун, ГӀиса МасихӀ ракьалде вачӀараб къоялъ гьез Аллагьасе рецц гьабизе.
13ТӀадегӀанасе гӀоло мукӀурлъе нуж инсанасдасан бугеб кверщелалъе – бищунго кӀудияв вугелъул, къайсарасул амруги тӀубазабе. 14Квешлъи гьабулезе тамихӀ гьабизе, лъикӀлъи гьабулезе шапакъат кьезе гьес тӀад тарал наибзабазеги мукӀурлъе. 15Аллагьасул амру буго лъикӀал ишаздалъун нужеца гӀабдалзабазул жагьилаб кӀал къазабеян. 16Эркенаб гӀумру гьабе нужеца, амма гьеб эркенлъи квешлъиялъе хӀалтӀизабуге, – Аллагьасул лагъзаллъун рукӀа. 17Киназулго адаб-хӀурмат гьабе, диналъул вацал рокьа, Аллагьасукьа хӀинкъа ва къайсарасул къадру-къимат гьабе.
18Гьединго нужги, лагъзал, нужерго бетӀергьабазул адаб-хӀурмат гьабун, гьезие мутӀигӀлъе, – гурхӀарал-хӀалимал гьел ругониги, хъачӀал ругониги. 19ГӀайиб гьечӀого тамихӀалда гъоркье ккедал Аллагьги рекӀелъ цӀунун гӀазаб-гӀакъуба хӀехьарасдаса Гьев разилъула. 20Нужерго квешлъи сабаблъун рухулеб мехалъ гӀакъуба хӀехьонилан цӀар щоларо. Амма лъикӀлъи сабаблъун гӀазаб-гӀакъуба хӀехьарасдаса Аллагь разилъула. 21Нужее гӀоло МасихӀица гӀазаб-гӀакъубаги хӀехьедал, нуж нахърилълъине мисалги бихьизабидал, гьесул нухдасан ине ккола нуж. 22Гьесда цохӀониги мунагь букӀинчӀо, гьересиги гьесул кӀалдиб батичӀо. 23Инжит-къабихӀ гьавулел рагӀаби жинда абуниги, инжитаб-къабихӀаб рагӀи данде рехичӀо гьес. ГӀазаб-гӀакъуба хӀехьезе кканиги, бихьилин-рагӀилин хӀинкъиги кьечӀо, ритӀухъаб суд гьабулев Аллагьасул кверщаликье кьуна живго. 24Нилъер мунагьал гьес жиндирго чорхолъ хъанчалда тӀаде росун ана, мунагьазе нилъ хвараллъун рукӀине, амма ритӀухълъиялъе – чӀагояллъун хутӀизе. Гьесда лъурал ругъназдалъун нилъер чурхдул сахлъана. 25АхӀун риччарал чахъаби гӀадин рукӀарал нуж гьанже Вехьасда аскӀоре тӀадруссана, нужер рухӀал цӀунулесухъе рачӀана.
Iliyochaguliwa sasa
Пётрил тӀоцебесеб кагъат 2: АварАК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2005-2023