Пётрил тӀоцебесеб кагъат 1
1
1 бетӀер
Саламалъул рагӀаби
1-2ГӀиса МасихӀил чапар Пётрил рахъалдасан Понт, Галатия, Каппадокия, Асия ва Битиния улкабазда чияр халкъазда гьоркьор рикьа-риххун ругезде салам. Хъвараб къадаралда рекъон Эмен – Аллагьас нуж тӀаса рищана. Гьесул РухӀалъ нуж жиндирго халкълъун лъугьинаруна, жиндирго биялъ нуж рацӀцӀалъизарурав ГӀиса МасихӀиде мутӀигӀлъизе. Нужеда цӀикӀкӀараб баркат лъеги ва сах-саламат хутӀаги.
ГӀиса МасихӀ хваралъуса вахъана
3-4Нилъер ТӀадегӀанав ГӀиса МасихӀил Эмен – Аллагьасе рецц. Хваралъуса ГӀиса МасихӀ вахъинавиялдалъун, кӀудияб цӀоб лъун, гьес нилъее цӀияб гӀумру кьуна. Гьедин чӀаголъизабуна зобалазда цӀунараб холареб, хъублъулареб, бечӀалареб лъикӀаб бутӀа щвеялде бугеб нилъер хьул. 5Нуж божулел ругелъул, Аллагьас жиндирго къудраталдалъун цӀунун тун буго гьеб бутӀа, дуниял ахирлъидал къватӀибе загьирлъун, нуж хвасарлъизаризе.
6Гьанже дагьабго заманаялъ батӀи-батӀиял къварилъабаз нужер хӀалбихьулеб бугониги, гьелдаса роха нуж. 7Нужер божи-иман хӀакъаб бугищали хӀалбихьизе рачӀуна гьел къварилъаби. Биун-тӀагӀун унеб меседалъулгицин цӀадуца хӀалбихьула. Меседалдасаги къиматаб бугелъул нужер божи-иман, гьелъулги хӀалбихьизе ккола, ГӀиса МасихӀ загьирлъараб къоялъ нужее цӀар-реццги къадру-къиматги насиблъизе. 8ВихьичӀониги вокьулев вуго нужее гьев; гьанже вихьулев гьечӀониги, гьесда божулелги руго. Бицун хӀалкӀолареб кӀудияб рохел рещтӀинабулеб буго гьелъ нужер рекӀелъе, 9гьеб божи-иманалдалъун хвасарлъизе ругелъул нужер рухӀал!
Аварагзабаз бицараб рагӀи
10Гьеб хвасарлъиялъулин аварагзабаз, цӀех-рех гьабун, хӀакъикъат лъазабулеб букӀараб. Аварагзабаз цебеккунго бицунеб букӀана нужеде рещтӀине бугеб баркаталъул. 11Гьез хӀаракат бахъулеб букӀана жиндие кьезе бугеб гӀазаб-гӀакъубаялъулги гьелдаса хадуб щвезе бугеб бергьенлъиялъулги хӀакъалъулъ МасихӀил РухӀалъ бицунеб букӀарабщинаб кида ва кин лъугьине бугебали лъазе. 12Аллагьас аварагзабазе загьир гьабун букӀана, жинца гьел жидеего гӀоло гурел, нужее гӀоло ритӀун ругеллъи. Аварагзабаз доб мехалдаго бицунеб букӀиндалха зобалаздасан рещтӀараб Илагьияб РухӀалъул къуваталдалъун Рохалил хабар лъазабулез гьанже нужеда бицунеб бугебщиналъул хӀакъалъулъ. Малаикзабазегицин бокьилаан гьеб лъазе.
РацӀцӀадго хьвадейилан амру
13Гьединлъидал нужерго гӀакъиллъиялъул рачел щулаго къай. РорчӀуда чӀа. ГӀиса МасихӀ вачӀараб къоялъ нужеде рещтӀине бугеб баркаталде унго-унголъунги хьул лъе. 14Аллагьасде мутӀигӀлъе, жагьиллъиялда ругеб мехалъ нужер рекӀелъ рукӀарал къасдазда хадурги унге. 15Нуж тӀаса рищарав Аллагь вацӀцӀадав вугелъул, нужги кидаго рацӀцӀадго хьваде. 16ТӀехьалда хъван буго: «Дун вацӀцӀадав вугелъул, нужги рацӀцӀадго хьваде».
17Гьурмахъ валагьичӀого щивасул ишазе суд гьабулев Аллагьасде нужеца Эменилан ахӀулеб бугелъул, гьесукьа хӀинкъун тӀаме гьаб дуниялалъул рокъоб хутӀараб гӀумру. 18Нужерго умумуздасан ирсалъе щвараб чӀобогояб гӀумруялдаса нуж биун-тӀагӀун унеб гӀарац-месед кьун гурелъулха тархъан гьарурал. 19ГӀайибги мунагьги гьечӀеб КьегӀер гӀадинав МасихӀил къиматаб биялдалъун тархъанлъидалха нуж. 20Дуниял бижилелдего Аллагьас гьединаб къадар хъван букӀана гьесие, амма нужее гьев загьирлъана гьаб ахирияб заманалда. 21Гьесдалъунин нуж божулел ругел, хваралъуса вахъинавун гьев машгьурлъизавурав Аллагьасда. Гьединлъидалин нужер божиги хьулги Аллагьасде бугеб.
22ХӀакъабщиналда нахърилълъун нужеца нужерго ракӀал рацӀцӀад гьаридал, нужее насиблъана диналъул вацаздехун унго-унгояб рокьи. Цоцаздехун ракӀ-ракӀалъулаб рокьи загӀиплъизе биччаге. 23Нуж цӀидасан рижана, лъугӀун-тӀагӀун унеб хьоналдасан гурел, хвел гьечӀеб хьоналдасан. Аллагьасул абадияб ва нилъее чӀаголъи кьолеб каламалдалъун рижана. 24ТӀехьалда хъван буго: «Харида релълъуна кинабго рижи, харилъе тӀогьолалдаса цӀикӀкӀараб машгьурлъиги щоларо гьелъие. Херги бакъван уна, тӀегьги бечӀала, 25амма Бичасул калам абадиялъего хутӀула». Гьеб калам ккола нужеда лъазабураб Рохалил хабар.
Iliyochaguliwa sasa
Пётрил тӀоцебесеб кагъат 1: АварАК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2005-2023