Aposolo 18
18
Polome mo Korindi ree anda para pupudengi nisaya ei
1-2Werepe nane Polome mo Adenisi ree anda gioma mo Korindi ree anda nane pumare Isaraelimi mandu rangala pae ali komea Akuila mo Pondasi andasu ali aisayapare mandaisipiya. Go aliri nipuna were Pirisila laapo mo Idali andasu minyapalaoma pena ipuma aisipiya. Mo Romo ree anda kalu ali Sisa Kolodiasi nipumi Isaraelimi mandu rangala pae wenaali raayo mo Romo ree anda giaoma pulupa, lisayanda ipisipiya. 3Mo repaaya pange Polo pange pupudengi komea noaisimiyanda Polore niipu laapo rapu palia ao-ala pumare palai anda pape akanu wamo pu rambuluaisimiyandare niipu laapona anda para paisaya. 4Gupuma koro piri naare raayona Polome mo Isaraelimi mandu rangala pae alinuna Godena angele kuruaeme anda para Isaraelimi mandu rangala pae alinu pange Giriki angele loaeme alinu pange nimuna kone perekeyaluame angele yokanali pala puaisimiya. 5Gupuma Sailasi Dimodi laapore mo Masedonia andasu nane aoma ipisipiya dinare, Polome nipuna pupudengi naya ei minyapalaoma naare raayo mo Isaraelimi mandu rangala pae alinu para lalore, Yesuri ora Kerisoae, loma wadoameyare kone waru suma walala puaisaya. 6Gupuaisaya eina Polona angele runguluma ralu duameya ara angele lala pula ara nipuna angelenu ero lala pisimiyapare Polome kana waraoma ma-alala ara nimu para lalore, Nimimi na angele na-pangoma pimi eina yangiri nimina kaluna wee manduma kenda pi ei milimindare gore na koae eina diayapare nimina peme einuna yanginu milimiae, lisaya. Ambiare nimi Isaraelimi mandu rangala pae wenaali gioma Isaraelimi na-mandu rangala pae wenaalinu menda para wada pulu, lisaya. 7Gupuma Isaraelimi mandu rangala pae alinu gioma Isaraelimi na-mandu rangala pae ali menda Disiasi Diasidasi Gode para panda punyaoma aisaya ali komeana anda para paisaya. Mo alina andare mo Isaraelimi mandu rangala pae alinuna Godena angele kuruaeme anda ree para aisaya. 8Mo Isaraelimi mandu rangala pae wenaalina Godena angele kuruaeme anda andere-aisaya ali Kirisipusimi nipuna wena naki nongonu pange Realina angele pangoma kone rulaisimiya. Gupuma Korindi wenaali menda para pange Polome wale angele pangoma mumare baparaisi au pisimiya.
9Gupuma rimbala menda Realimi upame pi nono pi rupa Polo para lalore, Paalame na-komape, lisaya. Niri nee rapu ayole neeme ni na-giae na angelenu waloape, lisaya. 10Go ree anda para na wenaali waru andapu aemendare ali mendame nee liiape einuna kone na-wilimi, lisaya. 11Gupuma Polome Korindi ree anda para kuni gipa komea ara sumba su mindipu aomare go para Godena angelenu nimu para walala puaisaya.
12-13Gupisayapare Galiore mo Akaya andasu nane Romo ree anda gapamani andaa ali aisaya dinare mo Isaraelimi mandu rangala pae alinumi Polo duameya mombea ara angele yokanali pulameya ma-puma lalore, Go alimiri alinuna rudule angele wi einu rungulala ara Gode para panda pinyayanda nimuna kone ma-perekeyao-aya, lisimiya.
14-15Gupi lisimiyanda Polome angele doameya ainya, Galiome mo Isaraelimi mandu rangala pae alinu para lalore, Isaraelimi mandu rangala pae alinuo, koae auna ree waru andaai pula payalore, neme nimina angele pangola pawapare nimina rudule angele pange binu pange angelenu wimi einuna lora pimi eiri gore niminale epealepape, lisaya. Ni gipiandare go angelenuri neeme na-lalua, lisaya. 16Gupuma nipumi nimu mo angele yokanali pi para giaoma kama nane penaya ralu liisaya. 17Go dina mo alinu raayome monde Isaraelimi mandu rangala pae wenaalinuna Godena angele kuruaeme anda andere-ae ali Sosedenisi pa riminyuma mo angele yokanali puaisimiya anda kama nane ara raki lu rumbisimiyapare Galiome angele menda na-le semende puma yoloma piruaisaya.
Polome mo Andioko ree anda nane Siria andasu nane wala paisaya ei
18Polore naare engesinda go para aomare werepena mo Korindiani ree anda aeme Keriso wenaali minyapalaoma pula ara paidapape, loma monde Pirisila Akuila repaaya rapu kawasona pua piruma Siria andasu nane paisimiya. Gupuma mo Sengeria ree anda nane ara nipuna angele loaisaya ei misayanda nipuna kalu iri mu rumbisaya.#18:18 Diu wenaali nimuna au mendare gore ale menda pula loma wili mandaa muma pala pisimiya dinare nimuna iri rungulala pisimiya.
19Gupuma mo Epesusi ree anda para opapala ipumare niipu laapo go para ainyalomare Polo nipuri mo Isaraelimi mandu rangala pae alinuna Godena angele kuruaeme anda para konda pamboma pua Isaraelimi mandu rangala pae wenaali rapu angele yokanali pisimiya. 20-21Mo alinumi lalore, Ongesinda pa apeleo, lisimiyapare Polome lalore, Diae, lomare mo alinu minyapalaoma pula ara lalore, Godena rana piliandare nimi para wala epola, lisaya. Gupuma kawasona piruma Epesusi anda minyapalaoma paisaya.
22Sisaria ree anda opapala ipumare mo Diurusaleme ree anda nane mo Keriso wenaali para paidapape da ipuma opaisala pumare mo Andioko ree anda nane wala perekeya paisaya.
Polome rana repopao wala popisaya ei
23Go para ongesinda aomare minyapalaoma mo Galaesia Pirisia andasu laapo nane Keriso para kone rulao-aisimiya wenaalimi puri pale ei minyaya puri ma-palada ara pamulopoaisaya.
24Go dinare Isaraelimi mandu rangala pae ali menda Alekasandaria ree anda ali mo Epesusi ree anda para ipisaya. Nipuri Godena angele wia buka angele epe rupa kone waru suma wenaalimi pangenaya angele loaisaya aliae. 25Ali mendame nipu para Realina Pora ambala walisayanda nipumi go eina puri pale ali ara Yesumi pisaya einu waru ma-rendepoyao waloaisaya. Gurupa waloaisayapare Dioni baparaisi au paya ei para komea, kone wisaya. 26Mo Isaraelimi mandu rangala pae wenaalina Godena angele kuruaeme anda para Apolosi nipumi paalame na-kome puri paloma ara wenaalinu menda para angele rambamu walisaya. Gurupa walala-ainya Pirisila Akuila repaayame nipuna angele pangisipiya. Nipuna angele pangoma werepe nanere niipu laapome Apolosi niipu laapona anda para karu ma-puma Godena Pora ree wi einu ora epe rupa waru walisipiya. 27Apolosiri Akaya andasu nane polameya kone wisaya dinare mo Keriso alinumi epelea puainyae loma so anda nane aisimiya Keriso alinu para ramayo wape puma lalore, Go ali lamu mealepapeae, lisimiya. Gupuma opapala pumare Godeme yarame kome eina angele misimiya wenaaliri nipumi waru rambamuaisaya. 28Apolosi nipumi wenaali lee rona ara puri paloma ara ape loma mo Isaraelimi mandu rangala pae alinuna lee wilina ara nimuna angele lu rambuaoma ara nipumi lalore, Mo Godena angele wia bukana wape pea eiri Yesuri ora Kerisoae, lea, lisaya. Nipumi lisaya angelenu ora einu lisayandare nimumi angele menda na-lisimiya.
Iliyochaguliwa sasa
Aposolo 18: POLENT23
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
