TĨĨGI WERE 48
48
Jakob kaŋ bosaʼ ne jar ni Josef wo ti
1Blam wããre sen wo mono, à kal age wii Josef go bol ga pan ɓo de cegè. Á kal hoo jar ni ɓe ma ɓogn wo doo, Manase wo de Efrayim. 2À kal wii Jakob go bol ga : Ko nen ɓo wel ɓo Josef yaŋ le seege ɓiŋ ɓo. Israyel kal coɓ see ɓe coɓ kal urgi go ciŋ ti ɗeere yeʼe. 3Jakob wii Josef ga : Baa ma de Egre Ɓuyn naa nen le me Lus ɓi sir Kanaan. Á hay kaŋ bosaʼ me ti. 4Day wii me ga : Ndi tes mo yaŋ ge, ndi dus mo ge yaŋ ge, ndi joŋ ge wer jar yaŋ de ɓo ngaɓa ngaɓa dusglugi. Ndi hãge sir sen la yaŋ ne wer mani ɓon wo no, maga á mo hay diŋ ma ɓi ma tum. 5Patala weere ma ɓog maga ndo biŋ ra go ɓi sir Ejipte la taŋgu age ɓi go ɓiŋ ɓo Ejipte lam no, joŋ ge wo diŋ ma ɓi. Efrayim wo de Manase joŋ ge wo diŋ ɓi doo Ruben wo de Simeyoŋ nono. 6Ama weere maga ndo biŋ sen wo blam ɓaara mo lay no, sen joŋ ge wo diŋ ɓo lay. Á daʼge wo taabúl ma horge ma ɓaaran diŋ ɓi sir mani hẽẽre ɓaara ma kluurin wo no. 7De maga ndi fer le Aram mono, Rasel huu go ti faage ɓiŋ ɓi ɓi sir Kanaan, go see Efrata genaʼa. Ndi teen diŋ ti ngel sen ni, ti faage Efrata, ga diŋ Betlehem mono.
8Israyel kal ko jar ni Josef wo day ga : 9Ma lag la diŋ wose wo ne? Josef kal fer wããre ne pan ɓe ga : Á diŋ jar ni ɓi maga Baa hã ra go me ti ngel lam no. Israyel day ga : Yaʼ ra le me ɓiŋ la no kay maga ndi mo kaŋ bosaʼ ne hara ti. 10Nen Israyel hay kol go de gayre doo tããbe so. Á hay bay de kããge ma ko rage wa so. Josef kal yaʼ rage le ɓiŋ ɓe. Israyel kal ɗaw rage see ɓe, kal klew rage. 11Israyel wii Josef ga : Ndi hay ɗig ga ndi ko nen ɓo gà so, ko ɗa Baa fer joŋ ge ga ndi mo ko weere ɓo wo. 12Josef kal hoo rage le go ne pan ɓe ɓaale, kal leʼ monɗra de jel nen ɓe gesiŋ pel ɓe. 13Blam ɓe Josef kal hoo rage ɓog ɓuy, ɗaw Efrayim ti ɓaŋ war ɓe, coŋn ne Israyel ti ɓaŋ gùr ɓe, Manase ti ɓaŋ gùr ɓe coŋn ne Israyel ti ɓaŋ war ɓe, kal yaʼ rage wo ɓiŋ ɓe. 14Israyel kaŋ doo ɓe ma war kaŋn ne Efrayim maga hay diŋ ma kleen ti, day kal kaŋ doo ɓe ma gùrn ne Manase ti. Á hay joŋ mbe de ɓe doosen nono reʼe, werga Manase diŋ jag mbarga no. 15Á kaŋ bosaʼ ne Josef ti, day ga : Daga Baa maga pããre ɓi Abraham wo de Isag hay see wo pel ɓe, daga Baa maga koɗ me de wur maga ndi tĩĩ wer go caw hãã wara, 16daga je peele maga yãã me go jag ɓlaggen wo mo ɓuy mo kaŋ bosaʼ ne weere sen wo ti! Daga ɗúu ɓi mo gwaʼ go see ɓaara, de ɗúu Abraham wo de Isag pããre ɓin wo no. Daga á mo dus wo ngaɓa ti sir no.
17Josef ko mokay doo maga pan ɓe kaŋn co jag ɓe gà de maga á kaŋ doo ɓe ma warn ne Efrayim ti mono. Á maŋ doo pan ɓe le go ne Efrayim ti, ma yaʼge kaŋge ɓe go ne Manase ti. 18Josef wii pan ɓe ga : Bay doosen no wa baba, werga ma kay la diŋ jag mbarga no, kaŋ doo ɓo ma warn ne hẽn ti. 19Pan ɓe laa dayge gà day ga : Ndi yaŋ mbi de koge wel ɓi! Á yaŋ mbe nen ɓi. Á de see ɓe joŋ mbe yaŋ je jar lay, á de see ɓe joŋ mbe yaŋ kluu lay. Wer mani ɓen joŋ ge mbe yaŋ diŋ sir wo ngaɓa lay. Ama hẽn ɓe ma ti ɓen kol ge kluu de daŋge ɓe, wer mani ɓen joŋge mbe yaŋ diŋ wer sir wo ngaɓa lay. 20Á kal ɓoʼ bosaʼ ne hara ti wursen so day ga : Diŋ see ɓo ga Israyel kaŋ ge bosaʼ yaŋ ga : Daga Baa mo joŋ mo doo Efrayim, doo Manase nono! Á kaŋ Efrayim go taŋgu Manase. 21Israyel wii Josef ga : Ko ɗa, ndi day nà ndi huu go! Ama day Baa joŋ ge yaŋ de ɓay, á fer ge yaŋ de ɓay ɓi sir mani pããre ɓay wo no. 22Ndi hã ge ne ndo ciŋ ti ɓon de daŋ hẽẽre ɓon wo diŋ Sikem maga ndi yããn doo jar Amorid wo de moslam wo de waa mono.
Iliyochaguliwa sasa
TĨĨGI WERE 48: TUP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Tupuri Bible © Bible Society of Cameroon, 2016. All rights reserved.