ACHINEMI 9
9
Aaron Kümllagho Ikhilutsü
1Atsala akütacheni Moses no Aaron ngo pa nuli eno kichimi ku, 2eno pa no Aaron vilo pi, “Axine kümllagho ghenguno amshitsü lhothe eno akipti kümllagho ghenguno anetsü lakhikhi tukutiye kühakeu pesü Ampeu mlla lo. 3Eno Israelmi vilo pilo, ‘Axine kümllagho ghenguno anetsü lakhi, akipti kümllagho ghenguno amshiti ngo ambeti süghilo, kinikujo ampe lakhikhi eno tukutiye kühakeu, 4külakishi kümllagho ghenguno amshitsü ngo anetsü Ampeu zülono aghashi lo, eno athi kümllagho thazü gholo kiteve keu süghilo, kughengu Ampeu ye ishi nongu lau ipeghini cheni.’” 5Moses no kuposhukulu phiki zülono azah tsüke toi aqoaho kümtsü no tipaqo pesü Ampeu kupunu ighi. 6Moses no pi, “Hi ye Ampeu no nongu vilo shilo pikeu ke, tishianguno Ampeu juküvü nongu lau ipeghi peniye ke.” 7Pa no Aaron vilo pi, “Akiptia kupunu wuno o xine kümllagho ngo o kipti kümllagho shino no eno ow timi ghenguno lokichile shilo, eno Ampeu no azah tsüke toi timiqo kümllagho süghi no pano ghenguno lokichile shitsü lo.”
8Ikehu Aaron no akiptia lo wuno pa ghenguno axine kümllagho mishiti heqhi. 9Pa nuli no tipau ji pesü pa tsükelo pa no pa uloti aji lo chosü no pewo akiptia kiboqo lo lesü no itaghi akiptia bophi lo leqhi. 10Ikemu axine kümllagho lo atha, amchi lothi eno apuloshi ye Ampeu no azah tsüke toi akiptia lono pitive. 11Pa no ashicho eno ayiko pesü aghazü khalau no ami lono pitive.
12Tithiu pa no akipti kümllagho lhoxü heqhi no pa nuli no aji pesü pa tsükelo pa no akiptia vehomxa leqhi. 13Panoqo no ghekuchove keu shileqhi eno akütsü pa tsükelo pa no akiptia lono qhoi pitive. 14Pa no azü no aboloshi eno apukhuqo qhuve no kuchopu akipti kümllagho gholono pitive.
15Tithiu pa no timiqo xine kümllagho ghenguno ane heqhi no lhoxü atüghüu toi axine kümllagho shi ikhiphe tsü. 16Pa no akipti kümllagho khuaye kiqi lono peitha tsü. 17Inaqhe akipti kümllagho nguno alau pa no athi kümllagho peithatsü, akümllagho süghi keu lono pa u kichhi lakhi luve no akiptia lono pitive.
18Tithiu timiqo ghenguno külakishi kümllagho mishitsü ngo anetsü pesü pa no aghashi. Aaron nuli no lhoxü ji pa tsükelo pa no akiptia vehomxa leqhive. 19Ikemu lhoxü hi küma philo atha, ashomhi tha, amxu ngo amchi lothi küzüpe achekeu tha, eno apuloshi ye 20amlashi shou beve no pewo akiptia lono pa no atha thaqhü pitive, 21ikemu amlashi eno aluko ajeu shi ye Moses no azah tsüke toi Aaron no Ampeu zülo akimchi gho lakhi shi qhitsü.
22Aaron no timiqo küdau pa u peqhe no panoqo kümghatsü, pa no axine kümllagho, akipti kümllagho, eno külakishi kümllagho kümtsü shitave kethiu iqighive. 23Moses ngo Aaron pama kuposhukulu phiki lo ilove no ipeghi kelo timiqo kümghatsü, eno Ampeu juküvü timi kümtsü lau ipeghi. 24Ampeu zülono ami ipeghi no akipti kümllagho eno atha jeli akiptia lo akeqo pitive, ikehu kughou timi kümtsü no ti ithulu keno, panongu no ighau khave no ikiqi agi pishiqho luve.
Iliyochaguliwa sasa
ACHINEMI 9: SUMRVBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible Society of India
© 2023, Used by permission. All rights reserved. More