IPEKULU 23
23
1“No ye alatsa veküpha moni. No ye akimki thopi shiniye kixikilami sasü au kumsho moni. 2No ye küsakügha shiniye amqo akichiu gholo ikiqi ilomoni, momu achipiu xakütha tuchighi niye amqo akichiu küdau shino atsa kükügha lo thopi shimoni, 3momu no ye kumlhomi tsa kükügha lo pa lau agi jumoni.
4“Tsala nono o ghümi mishitsü momu khurha aveghüzü shi cheghi keu sholu aye, no ye pa lau sachile saghini. 5Tsala nono milakhi khuu o mithi cheni keno paw khurha akho no qaqhipe aghi keu ithulu aye tishi qhive tsümoni; ikemu sawo pa tsüveni.
6“Atsa kükügha lo no ye kumlhomi launo pa chipiu tuchighive tsümoni. 7Akimki shi ngukube keu lono putosülo, eno pimihami ngo achipiu mikuchomi pithi moni, kughengu Ni ye küsaküghami ngukube kepu kühave no pheve keu shimo nani. 8No ye külügho lumoni, kughengu külügho no mtsümishei ithulu chekemi nhethi kighicheve tsü cheni eno khunono achipiu küdau ani keno panoqo chipiu süchighive tsü cheni.
9“No ye inaghami peitha püsa moni. Nono inaghami mlo ithi anie, kughengu nongu ghi Egypt yeghi lo inaghami shi acheke.
Sabbath ngo Tiqhetini Yezah
10“Ampe tsügho dolo nono o yeghi lo yisüni eno tipau pithi keu hekütsüni, 11ikemu ampe akütsüniu loye ayeghi pelo akulho qhilu pelo eno chimono qhiveni, tishikeu lono nongu gholo kumlhomi pelo chulu peni; eno panongu no kiu achili qhive keno aluza lo tüghashiqo pelo chupeni. O tsailu ngo ow olivelu lo ghi no ye titoi shini.
12“Atsala tsügho dolo nono o kümla shini, ikemu atsala akütsüniu loye akulhoqhi lo; tishianguno o mishitsü ngo ow khurha no akulho qhilu peni, eno o qemi totimi nuli ngo shoinami pelo aghüthi püxü kithelu penie.
13“I no nongu vilo pikeu kümtsü lo amlo tsülo, eno kütau lhouqo jeku moni, momu nongu kichi lono pikeu chilupe kevilo.
14“Ampe lo ghuthu küthü nongu ye I lau aghulhu shini. 15Kholaqhi sümokeu ghulhu ikhiluni. I no azah tsüke toi, kihitha tsükeu do, Abib qhi lono, no ye kholaqhi sümokeu sho atsala tsüni chuni, kughengu tipau qhi lono no ye Egypt lono ipeghi ke. Khumu au kümsashi I zülo ighi moni. 16Nono aluza lo kiu yisü keno, o ghime xathi pithi tüghüu pesü Ghile Ghulhu pinini. Ampe shekha lo o ghime xathi o luza lono hekütsü ke ghuloki lo no ye Pekükütsü Ghulhu shini. 17Ampe lo ghuthu küthü now kiptimi kümtsü Ampeu Alhou zülo ighini.
18“No ye Iw aghakishi ji gholo kiukiumu kholaqhi süve keu pesü mlla moni, momu I ghulhu lo atha ye inaqhe kutolo qhimoni.
19“O yeghi lo xathi amsüu akiviu pesü Ampeu o Lhou kilo süghilo.
“No ye aneti lakhi pesü paza kichhizü gholono kumqho moni.
Canaan Leni keu Shoqhi
20“Julo, ala lo nongu khekuto sasü I no kuto püakeu-a lo ighi peniye I no kungumi nongu züu puwu ani. 21Pa lau amlo tsüqhiyi shilo eno pa tsa gholulo; pa hebide kevilo, kughengu pa ye nongu kipimi qhitsümo nani, kughengu pa lolo I je ani.
22“Ikemu nongu no kutokupui pa tsa ini aye eno I no pikeu kümtsü shi aye, I no nongu ghümiw aghümi shi nani, eno nongu mjochile chekemi mjochile nani.
23“Kughou Iw kungumi no nongu züuno wuno Amorimi, Hittimi, Perizimi, Canaanmi, Hivimi, eno Jebusimi lau nongu sasü ighini keno, I no panoqo pühave nani, 24nongu ye pano lhouqo zülo pishiqho momu tipaqo qemoni, momu panongu no shiche ketoi shimoni, ikemu nongu ye qhoi panoqo haleveni eno pano tsükucho mukhumuno shi kuboveni. 25Nongu ye Ampeu nongu Lhou qeni, eno Pa no chuqu-kusho pesü nongu kümghatsü nani, eno I no küsükini nongu gholono ikhivetsü nani. 26Totimi khumu ala lono hauvemo momu anuha shimo nani; I no nongu xüpushu tsü nani. 27I no nongu züuno kichi kümsa keu puwu nani eno nongu no timi khunoqo lau ighi keno panoqo kümtsü pelo kübangüve penani, eno I no nongu ghümi kümtsü pelo idechilesü povepe nani. 28I no nongu züuno akhighiqo puwu nani, tipaqo no nongu züuno Hivimi, Canaanmi, eno Hittimi hapheve nani. 29Ampe lakhi lono Ni ye panoqo haphemo nani, tikumo aye ayeghi hipau ye küghüküghaleive no tüghashi no nongu nguno kutomo shive nani. 30Nongu no ikowo eno ayeghi qhasülu moke kutolo, I no kititi no nongu züuno panoqo haphe nani. 31Akuhu Züghi lono Philistiami Züghi kutolo eno asayeqha lono Euphrates kutolo, I no nongu ghuthu shitsü nani, kughengu I no aghakhu lo küxümi pesü o u lo süvetsü nani, eno nongu no panoqo hapheve nani. 32Nongu ye panongu eno pano lhouqo sasü puloshoqhi shimoni. 33Panongu ye no ghakhu lo küghüna moni, tikumo aye panongu no nongu pelo I shou axine shipe nani; kughengu nongu no pano lhouqo mlla aye, tino nongu ghenguno alichhe shive nani.”
Iliyochaguliwa sasa
IPEKULU 23: SUMRVBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible Society of India
© 2023, Used by permission. All rights reserved. More