Maalʉko 6

ɄYeesu akhaanwa humwabho hu Nazaleeti

(Mataayo 13:53-58; Luuka 4:16-30)

1Ɨpo ʉYeesu ahasogola ʉhwo, ahaweela humwabho hwi‑ibooma ɨlyɨ Nazaleeti peeka na bhasundwe bhaakwe. 2ƗSabaato lwa yaafiha, ahanda amanyizye mu nyumba ɨya‑apuutile na‑amanyiilile. Abhinji bha bhahamʼmwʉmvwɨzye sha‑amanyizya, bhahaswijile na hunʼsyonshele haani huje, “Hee! Ɨshi, ʉnʉ azyajile hwi ɨzyo zyonti? Nantele, azyajile hwi ɨnjeele zyonti nanshi ɨzi ni‑ikhone ɨlya‑abhombele amayele nanshi ɨgo? 3Ʉnʉ saga mʼpunzi? Bhʉlɨ, saga mwana wa Maliya? Abhaholo bhaakwe saga bha Yaakobo, ʉYoose, ʉYuuda nʉ Siimoni? Bhʉlɨ, abhayɨlʉmbʉ bhaakwe saga bhali naatɨ pɨɨpa?” Ɨpo bhahakhaana humʼmwɨtɨshe.

4ɄYeesu ahabhabhʉʉzya ahaga, “Ʉnʼkuwi abha nɨ nshɨnshɨ ʉhwɨnjɨ hwonti, leelo saga abha nɨ nshɨnshɨ humwabho, hwa bhaholo bhaakwe na hu khaaya yaakwe.”

5ɄYeesu ahapootwa abhombe amayele gaminji ʉhwo, leelo ahabhabhɨɨshɨla amakhono abhabhinu bhashe lwene, ahabhaponia. 6Wope ahaswigaga haani huje, saga bhali nʉ lwɨtɨho nalumo.

ɄYeesu ahubhasonteelezya abhasundwe ishʉmi na bhabhɨɨlɨ

(Mataayo 10:5-15; Luuka 9:1-6)

ɄYeesu lwa‑ahazyʉngʉʉlaga mu vipanga ɨvya mu pɨɨpɨ hubhamanyizye abhantu, 7ahabhakwizya abhasundwe bhaakwe ishʉmi na bhabhɨɨlɨ. Ahabhapeela ikhone ɨlya hugadaje amapepo, ahabhasonteelezya bhabhɨɨlɨ bhabhɨɨlɨ. 8-9Ahabhalajizya huje, “Mwegaje zyɨ ngoodo zyene mu nyoobhe, mukwataje zyɨ ndaatʉ zyenyu. Leelo, musaheeje ahantu hohonti mwi‑idala, awe apaye ɨshalye, musaheeje ɨmbuguulu, awe ɨmpɨɨya, awe amenda aga‑agaluzanye hwa mubhala.” 10Nantele, ahabhabhʉʉzya ahaga, “Mu nyumba yoyonti ɨla bhahayihubhejeelela, mwahakhalaje mwʉnʉʉmwo afishe ɨpo lwa mwahayisogola mu nyumba ɨyo. 11Leelo poponti pa saga bhahayihubhejeelela na hubhatejeelezye lwonti, lwa musogola, mwahakunyuntaje inkondi mu manama geenyu hubhasunde huje, yʉ Ngʉlʉbhɨ yʉʉyo wa‑abhakhɨɨne.”#6:11 hubhasunde huje, yʉ Ngʉlʉbhɨ yʉʉyo wa‑abhakhɨɨne Mu njango ɨyɨ Shiyunaani ɨsimbwilwe huje, wubhe simishizi hu bheene. 12Abhasundwe bhaala bhahasogola, bhahanda hubhalʉmbɨɨlɨle abhantu huje, bhalambaje na huzileshe ɨmbiibhi zyabho. 13Bhahefwaga amapepo aminji hwa bhantu. Nantele, bhahabhapotozyaga ʉnʼnembo#6:13 ʉnʼnembo Mu njango ɨyɨ Shiyunaani ɨsimbwilwe huje, ɨnyemba. Hu habhaazyo haala, ɨnyemba bhahabhombelaga nanshi ʉnʼnembo. abhabhinu abhinji, bhope bhahaponaga ɨmpʉngo zyabho.

ɄYoohani ʉMwozi adumulwa itwe

(Mataayo 14:1-12; Luuka 9:7-9)

14Pɨnɨɨpo, ʉmwɨnɨ ʉwɨ nsi ɨla, ʉyo itaawa lyakwe ahali yʉ Heloode ʉAntipa, ahʉmvwɨzye ɨnongwa ɨzya Yeesu, pɨpo bhahayangaga poponti paala. Bhamo bhahagaga, “Yʉ Yoohani ʉMwozi azyʉshɨle afume hwa bhafwe, ya yɨ nongwa ɨnɨ ali ni‑ikhone ɨlya‑abhombe amayele amagoosi nanshi ɨgo.” 15Bhamo bhahagaga, “ɄYeesu yʉ Eliya, ʉnʼkuwi wa Ngʉlʉbhɨ ʉwɨ mandɨ.” Abhamwabho bhahagaga, “Wope nʼkuwi nanshi abhakuwi bha Ngʉlʉbhɨ abhanjɨ abhɨ mandɨ.” 16Leelo, ʉHeloode ʉAntipa lwa wʉmvwa, ahaga, “Ʉnʉ yʉ Yoohani, anɨ wa nahanʼdumuuye itwe. Ha! Azyʉshɨle afume hwa bhafwe.”

17-20ɄHeloode ʉAntipa ahali amʼmwejile ʉHelodiya wa‑ahali nʼshɨ wa mwanakwabho#6:17-20 mwanakwabho ɄHeloode ʉAntipa nʉ Filipo bhahali nʉ yise weeka, leelo shila muntu ahali nʉ nyina waakwe. ʉFilipo. Ɨpo ʉYoohani ahamʼmʉzyaga huje, “Mwiho humʼmweje ʉnʼshɨ wa mwanakwenyu sha‑ali mwʉmi.” Ɨnongwa ɨzyo zyahanʼsonzya ʉHelodiya huje abhe ni‑ilyoyo hwa Yoohani. Ahanzaga idala ɨlya hunʼgoje, leelo ahapotwaga. Ɨpo ʉHeloode ʉAntipa ahasonteelezya huje, bhanʼkhate ʉYoohani na humʼpinye mu hoobhe. Ahanʼdiimaga huje, ʉHelodiya agandi hunʼgoje, pɨpo ahamʼmwogopaga ʉYoohani na‑amanye huje, ʉYoohani nʼgolosu, nantele nʼsangalusu. ɄHeloode ʉAntipa ahagɨɨne hunʼtejeelezye ʉYoohani haani, leelo lwa wanʼtejeelezya, ahazugumilaga haani.

21Pamandɨ ʉHeloode ʉAntipa ahabhɨɨha ɨshikulukulu na bhitongwa bhaakwe, abhantu abhagoosi mu mukowa ʉgwɨ Galilaaya, peeka na bhagoosi bha bhagoosi bha bhalwi ahwizushe isiku ɨlya‑apaapwe hwakwe. ɄHelodiya ahalyaga idala ɨlya hunʼgoje ʉYoohani. 22Ʉmwalɨ wa Helodiya ahatʉʉha pa shikulukulu na hwanje pitagaalila lya Heloode ʉAntipa na bhaanwa bhaakwe, bhonti bhahasha haani. Ʉmwɨnɨ ʉHeloode ʉAntipa ahamʼmʉʉzya ʉmwana ʉla huje, “Ndaabhe hohonti hʉ‑ʉhwanza, anɨ ɨmbala hupeele.” 23Nantele, ahalapa huje, “Ɨmbala hupeele hohonti hʉ‑ʉhwanza, hwope ɨmbala hugabhile paahati yɨ wumwɨnɨ waanɨ.”

24Ɨpo ʉmwana ʉnʼnɨndu ʉla ahafuma hwʉnzɨ, ahamʼmʉzɨɨlɨzya ʉnyina waakwe huje, “Maayɨ, ɨndaabhe yeenu?” Ʉnyina ahamʼmwamula huje, “Laabha huje, aʼpeele itwe lya Yoohani ʉMwozi.”

25Ɨshi, ʉmwalɨ ʉla ahakhampila, ahabhala hwa mwɨnɨ, ahanʼnaabha huje, “Ɨhwanza huje, ʉmpeele shɨɨshi itwe lya Yoohani ʉMwozi mu bheeto.” 26Ʉmwɨnɨ ahazugumila tee, leelo hu nongwa yɨ nsoni zyɨ ndapo zyakwe pa bhaanwa bhaakwe, ahapootwa sha hunʼkhaanile. 27Ahanʼsonteelezya ʉnʼnwi abhale hunʼdumule ʉYoohani itwe. Ʉnʼnwi ʉla ahabhala, ahanʼdumula ʉYoohani itwe mu hoobhe muula. 28Ahalileeta itwe lya Yoohani mu bheeto, ahamʼpeela ʉmwalɨ ʉla, wope ahabhala ahamʼpeela ʉnyina waakwe. 29Abhasundwe bha Yoohani lwa bhʉmvwa ɨgo, bhahabhala, bhahagwega ʉmʼvimba gwakwe, bhahagusyɨla mu nkʉngwa.

ɄYeesu ahubhaliisya abhantu ashile ɨelufu zisaanu

(Mataayo 14:13-21; Luuka 9:10-17; Yoohani 6:1-14)

30Ɨpo abhasontwa bha Yeesu bhahamʼmʉngaanila, bhahamʼmʉʉzya zyonti zya bhahabhombile na‑amanyizye abhantu. 31Alɨngaane na‑aje, hwahali na bhantu abhinji haani, bhamo bhahɨnzaga, bhamo bhahasogolaga, ɨshi ʉmwene na bhasundwe bhaakwe bhahapootwa alye. ɄYeesu ahabhabhʉʉzya abhasundwe bhaakwe huje, “Saali, tibhale pamo pa saga pali na bhantu, mutʉʉye hashe.” 32Bhahasogola bheene mu waato, bhahabhala humo hwa saga huli na bhantu.

33Leelo, abhinji lwene bhahabhalola lwa bhasogola, bhahabhamanya. Abhantu bhaala peeka na bhanjɨ afume mu mabooma aminji bhahabhashɨmbɨɨlɨla ʉlwa pa nsi, bhahabhatagaalila afishe huula hwa bhahabhalaga. 34ɄYeesu lwa wiiha mu waato peeka na bhasundwe bhaakwe, hwahali nɨ mpʉga ɨngoosi. ɄYeesu lwa wabhalola, ahabhalolela ɨnkʉmbʉ, pɨpo bhahali nanshi ɨngoole zya saga zili nʉ nʼdiimi. Ahanda hubhamanyizye gaminji. 35Lwa hwabha lyabheela, abhasundwe bhaakwe bhahamʼmalila, bhahamʼmʉʉzya bhahaga, “Ɨpa tili pi‑igona pa pali peene lwene, nantele ɨshi hwabha lyabheela. 36Ɨshi bhabhʉʉzye abhantu ɨbha huje, bhasogolaje, bhabhalaje mu vipanga vya mu pɨɨpɨ huje, bhahwikalile bhɨɨbho ɨvyalye ʉhwo.” 37Leelo, ʉYeesu ahabhaamula ahaga, “Bhapeeli mwɨmwɨ ɨvyalye.” Ɨpo bhope bhahamʼmʉzɨɨlɨzya bhahaga, “Ʉyiga atɨ tibhale tibhakalile ɨntogito hu dinaali ɨmya zibhɨɨlɨ#6:37 Ɨdinaali ɨmya zibhɨɨlɨ zyahalɨngaanaga nʉ mʼposheelo ʉgwa humʼposheezye ʉmuntu hu meezi naana. huje, nka bhalye?” 38ɄYeesu ahabhabhʉzɨɨlɨzya ahaga, “Bhʉlɨ, muli nɨ ntogito zilɨnga? Bhalaji mwenye.” Lwa bhazyaga, bhahamʼmʉʉzya bhahaga, “Tili nɨ ntogito zisaanu nɨ nswɨ zibhɨɨlɨ.”

39ɄYeesu ahabhabhʉʉzya huje, “Bhakhazyi abhantu bhonti mu mpʉga mpʉga mu sole ʉlemba.” 40Bhahakhala mu mpʉga, bhamo ɨmya yeeka, bhamo amashʉmi gasaanu. 41Ɨpo ʉYeesu aheega ɨntogito ziila zisaanu nɨ nswɨ zibhɨɨlɨ ziila, aheenya hu mwanya na hunʼsalifye ʉNgʉlʉbhɨ. Ahamensulanya ɨntogito ziila, ahabhapeela abhasundwe bhaakwe huje, bhabhagabhile abhantu. Nantele, ahabhapeela abhasundwe ɨnswɨ ziila huje, zyope bhabhagabhile. Zyahabhakwɨla abhantu bhonti. 42Bhonti bhahalya na‑angute. 43Abhasundwe bhaakwe bhahabhʉngaanya vya visyalile vyɨ ntogito nɨ nswɨ, bhahamemya ɨviseje ishʉmi na vibhɨɨlɨ. 44Bha bhahaliiye ɨshalye shiila bhahali bhinji, abhalume bheene bhahali ɨelufu zisaanu.

ɄYeesu ajenda pa mwanya pa mɨnzɨ agɨ nsʉmbi

(Mataayo 14:22-33; Yoohani 6:16-21)

45Hu habhaazyo hɨnɨɨho, ʉYeesu ahabhalajizya abhasundwe bhaakwe huje, “Tʉʉshi mu waato, mutagaalile alobhoshe ɨnsʉmbi abhale hu shipanga ɨshɨ Betisayida, lwɨ‑ɨlagana na bhantu ɨbha.” 46Lwa walehana nɨ mpʉga ya bhantu, ahazʉbha hwi‑igamba apuute. 47Lwa hwabha lyabheela, ʉwaato wahali wufishile paahati yɨ nsʉmbi, ʉYeesu ahali mwene hwi‑igamba. 48Ahabhalola abhasundwe bhaakwe sha bhayɨmba haani alongozye ʉwaato hwi‑ikhone lyabho,#Bhaazya Maalʉko 4:35-39. hu nongwa yɨ haala ya yahavugulaga hwilongolela. Lwa huhwanda ashe, ahabhabhalila sha‑ajenda pa mwanya pa mɨnzɨ, ahanzaga hubhashile. 49-50Leelo, bhonti lwa bhanʼnola ajenda pa mwanya pa mɨnzɨ bhahasɨɨbhaga huje nʼzimu, bhahoogopa haani, bhahakhoola. Nalinaali ʉYeesu ahabhabhʉʉzya ahaga, “Leshi ahwogope lwonti, amooyo geenyu gagwɨlaje, nɨɨnɨ!” 51ɄYeesu ahatʉʉha mu waato mwa bhahali, ɨhaala yahaleha avugule. Bhahaswiga haani, 52alɨngaane na‑aje, saga bhahazyaganyaaga nazimo ɨzyɨ mayele ga Yeesu ga hwonjele ɨntogito ziila. Amooyo gaabho gahali makhome.

ɄYeesu ahubhaponia abhabhinu hu Genesaleeti

(Mataayo 14:34-36)

53ɄYeesu na bhasundwe bhaakwe bhahafwɨmɨɨla ɨnsʉmbi ɨyɨ Galilaaya, bhahafiha mu nsi ɨyɨ Genesaleeti, bhahɨɨmɨha ʉwaato huhuula. 54Lwa bhaafuma lwene mu waato, abhantu abha paala bhahamʼmanya ʉYeesu lubhilo. 55Ɨpo bhahashɨmbɨlaga abhale hubhabhʉʉzye abhantu mu nsi ɨla yonti. Abhantu lwa bhʉmvwa, bhahabhanyemulaga abhabhinu mu vyɨlɨlɨ abhale hwohwonti hwa bhʉmvwa huje, ʉYeesu alɨɨho. 56Poponti paala pa‑ahabhalaga, mubhe mu vipanga, mubhe mu mabooma awe mu magʉnda gaala, bhahanʼnetelaga abhabhinu. Bhahanʼnambaga huje, bhapalamansyaje nka lupinto lwɨ mwenda gwakwe. Bhonti bha bhahamʼpalamansyaga, bhahaponaga ɨmpʉngo zyabho.

Iliyochaguliwa sasa

Maalʉko 6: SBK

Kuonyesha

Shirikisha

Nakili