MARKU 3
3
1Iye wanjilile cheka nawa mu sunangonga; mwapwilemo mutu ni kwoko lia kusosewa. 2O amulayilile kachi mamuwuka ha tangwa lia Sambata; hanga akamusume mutonga. 3Iye yamba kuli mutu yoze wapwile ni kwoko lia kusosewa ngwenyi, Katuka, umane mukachi. 4Mba yamba kuli ayo ngwenyi, Muchilita ni shimbi kulinga yipema ha tangwa lia Sambata nyi, shina kulinga yipi? Shina kulamwina mwono, nyi shina kushiha? Alioze aholele kulungunga kwo. 5Muze te hakengesa hali ayo ni utenu, nikwivwa chinyengo ha kukala cha mbunge jo, yamba kuli mutu ngwenyi, Olola kwoko lie. Iye waliolwele; ni kwoko lienyi liahindukile lingunu ngwe likwo. 6A-Fwariseu atuhukile, ni haze hene hamwe ni A-Heronde amutwamine punga hamuwika, ngwe chize mahasa kumwonwona.
7Mba Yesu hamwe ni tumbaji twenyi akatukile akaye ku Chitende: ni chizavu chinene cha ku Ngalileya amukawile, ni cha ku Yundeya, 8ni cha ku Yerusaleme, ni cha ku Indumeya, ni kuze kanda lia Yordau, ni waze a ku chifuchi cha kujingilika Teru ni Sendone, chizavu chinene ha kwivwa yuma yinene alingile, ejile kuli iye. 9Iye wahanjikile kuli tumbaji twenyi, hanga amusele wato, amanemo, mumu ha mbunga, hanga kechi kumushinjieka. 10Mumu te hawuka anji, chocho waze eswe apwile ni yilungo amuuzukilile, hanga amuse minwe. 11Ni maspiritu a luchisa, heswaho amumwene, afulamanyine kumeso jenyi, nikukololoka ngwo, Mwana Zambi yena. 12Iye waakanjishile chikolo, hanga kechi kamusolola.
13Iye yakanduka ha mulundu, yatambika waze waapalile iye mwene; o ejile kuli iye. 14Iye watongwele kumi ni aali, hanga akapwe hamwe nenyi, hanga akaatume mukwambujola sango lipema, 15hanga akapwe ni chiyulo cha kuwuka misongo, ni cha kutuhwisa andemoniu. 16Iye walukile Semone jina likwo ngwenyi, Petulu; 17Di Tiangu mwana Zembendeu, ni mwanakwo Yoano, waalukile jina likwo ngwenyi, Mboaneje, Unalumbunuka ngwo, Akwa kukulunguza. 18Ni Andeleu, ni Fwilipe, ni Mbatotomeu, ni Mateu, ni Tomase, ni Tiangu mwana Alefweu, ni Tateu, ni Semone Ka-Zeto. 19Ni Yundase Ka-Keriote, yoze nawa wamukunjikile.
Anjilile mu zuwo. 20Ni mbunga yakungama cheka nawa, chocho kahashile chipwe kutambula kulia. 21Muze usoko wenyi achivwile, atuhukile mukumukwata: mumu ambile ngwo, Kanazaluka. 22Akwa kusonyeka waze te hakatuka ku Yerusaleme, ambile ngwo, Mbelezepu akwete, chikwo ngwo, Ni tachi ja mwata wa andemoniu kakutuhwisa andemoniu. 23Waatambikile kuli iye, wambile kuli ayo ni yishima ngwenyi, Ngwe kuchi Satana mahasa kutuhwisa Satana? 24Nyi kachi wanangana muuli handununa wene, wanangana uze kuushi kuhasa kukola. 25Nyi kachi akwa zuwo malihandununa ene, akwa zuwo lize kechi kahasa kukola. 26Nyi kachi Satana malikatukila mwene, alihandunune, keshi kuhasa kukola, alioze kumujimuhwa. 27Alioze niumwe mahasa kunjila mu zuwo lia chitakame akapunde yikwata yenyi, shina hatangu makasa chitakame; mba hohene mapunda zuwo lienyi.
28Pundu ngunambe kuli yenu ngwami, Kumakakonekena atu mitonga yo yeswe, ni kushililika cho cheswe mashililika nacho. 29Alioze mweswawo mashililika Spiritu Musandu keshi ukonekeno ndo ku miaka ya mutolo, alioze mahia mutonga wa mutolo. 30Mumu ambile ngwo, Spiritu ya luchisa akwete.
31Ana-akwo ni naye yeza; no, nikumana haze, atumine kuli iye kumutambika. 32Ni mbunga ya atu atwamine ha kumujingilika; o yamba kuli iye ngwo, Noko ni ana-akwenu kanakufupu haze. 33Iye waakumbulwile, ngwenyi, Mama iya? Hanji ana-akwetu aya? 34Iye nikukengesa kuli waze anatwama ha kumujingilika, yamba ngwenyi, Talenu, mama ni ana-akwetu! 35Mumu mweswawo malinga upale wa Zambi, mwenawo mwanakwetu, ni pangiami, ni mama.
Iliyochaguliwa sasa
MARKU 3: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
