MARKU 2
2
1Muze anjilile cheka nawa mu Kafwanaume kulutwe lia matangwa amwe, achivwile ngwo, Mu zuwo ali. 2Haze hene anji akungulukile, chocho kukwapwile nawa muhela, chipwe ha kujingilika chikolo: iye wahanjikile lie liji kuli ayo. 3O yeza kuli iye, nikuneha mukwa kalepa, amumbachile kuli atu awana. 4Se kahashile kukundama kuli iye mumu ha mbunga, afukwile fulumba muze apwile, ni muze te halokolamo, azezele chalo haze apombele mukwa kalepa. 5Yesu ha kumona Ufulielo wo, yamba kuli mukwa kalepa ngwenyi, Mwanami, ngunakukonekena milonga ye. 6Alioze amwe hakachi ka akwa kusonyeka aze anatwama muze, nikunyonga mu mbunge jo ngwo, 7Kuchi te yono anahanjika chocho? Kanashililika Zambi: iya mahasa kukonekena milonga shina umuwika, iye Zambi? 8Haze hene Yesu, se kananyingika mu Spiritu yenyi, chocho anyongene, yamba kuli ayo ngwenyi, Kuchi te nunanyongo yino yuma mu mbunge jenu? 9Chashi chika, shina kwamba kuli mukwa kalepa ngwami, Kakukonekena milonga ye, nyi? Shina kwamba ngwami, Katuka, anda chalo che, wende? 10Alioze hanga nunyingike ngwe mwe Mwana Mutu chiyulo akwete hano hashi cha kukonekena milonga, yamba kuli mukwa kalepa ngwenyi, 11Kuli yena, ngunambe ngwami, Katuka, anda chalo che, uye ku zuwo lie. 12Iye wakatukile, ni haze hene wanjile chalo chenyi, watuhukile kumeso ja eswe; chocho alishimwokene, achichimiekene Zambi, ngwo, Kutwachimwene chocho nilimwe tangwa.
13Iye watuhukile cheka nawa mukuya ku sesa lia Chitende, ni mbunga ejile kuli iye, waalongesele. 14Shimbu machipalika, wamwene Levi, mwana Alefweu, kanatwama mu zuwo lia lijimu, yamba kuli iye ngwenyi, Ngukaule. Iye wakatukile, wamukawile.
15Shimbu atwamine ku mesa mu zuwo lienyi, akwa kufwetesa lijimu anji ni yivulumunyi atwamine ku mesa hamwe ni Yesu ni tumbaji twenyi: mumu apwile anji, no amukawile. 16Akwa kusonyeka ni A-Fwariseu, muze amwene ngwe alile hamwe ni yivulumunyi ni akwa kufwetesa lijimu, ambile kuli tumbaji twenyi, ngwo, Ngwe kuchi akulia ni kunwa hamwe ni akwa kufwetesa lijimu ni yivulumunyi? 17Muze Yesu achivwile, yamba kuli ayo ngwenyi, Waze akutakama keshi kufupa mbuki, alioze waze akuyiza: chejile mukutambika akwa ululi, alioze nejile mukutambika yivulumunyi alikonyeke.
18Tumbaji twa Yoano ni tumbaji twa A-Fwariseu apwile nikulitwamina kulia, no yeza, yamba kuli iye ngwo, Kuchi te tumbaji twa Yoano ni tumbaji twa A-Fwariseu akulitwamina kulia, alioze tumbaji twe keshi kulitwamina kulia? 19Yesu wambile kuli ayo ngwenyi, Akwa ulungi mahasa kulitwamina kulia shimbu sandungi achili hamwe no, nyi? Ha shimbu lieswe achili ni sandungi hamwe no keshi kuhasa kulitwamina kulia. 20Alioze matangwa kumakeza muze makachiza sandungi kuli ayo, mba makalitwamina kulia ha matangwa aze. 21Niumwe matonga chando cha hina lize kulishi kufunyisa ha hina likulu: mokomoko chando chaha muchichiza ku hina likulu ni chitutulu chahiana muchipwa. 22Niumwe malonga vinyu yaha mu tuku ja malambu akulu; mokomoko vinyu yaha muyimengununa tuku ja malambu, ni vinyu muyimwangana, tuku ja malambu mujifwa: alioze malonga vinyu yaha mu tuku ja malambu aha.
23Iye wapalikile ha tangwa lia Sambata ndusu mu minda; ni tumbaji twenyi shimbu endele, ahulwile mitwe. 24A-Fwariseu ambile kuli iye ngwo, Tala, kuchi te analingi ha tangwa lia Sambata chize kuchalitele ni shimbi? 25Iye wambile kuli ayo ngwenyi, Kunwatangile nilimwe tangwa chize alingile David, muze ahonene, evwile zala, iye, ni waze apwile hamwe nenyi? 26Ngwe chize anjilile mu zuwo lia Zambi ha matangwa ja sasendote mukwa lutwe Abiatare, alile mbolo ja kutumbieka, jize kuchalitele ni shimbi kulia shina hali asasendote wika? Wahanyine nawa kuli waze apwile hamwe nenyi? 27Iye wambile kuli ayo ngwenyi, Atangile Sambata hali atu, hi atu ko ha Sambata: 28kashika mwe Mwana Mutu iye mwene wa Sambata nawa.
Iliyochaguliwa sasa
MARKU 2: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
