MATEU 23
23
1Hohene Yesu wahanjikile ku mbunga ni kuli tumbaji twenyi, 2ngwenyi, Akwa kusonyeka ni A-Fwariseu hanatambula chitwamo cha Mose: 3yuma yeswe kashika manwamba, lingenu, fungenu: alioze kanda nukalinga nikulita ni yitanga yo; mumu kakwamba, alioze keshi kulinga. 4Ewa, kakukasa yiteli yilemu ni yikalu kumbata, kakuyitwika ha yipaya ya atu; alioze ayo ene kasolo kuyitutulula chipwe ni munwe umuwika. 5Yitanga yo yeswe kakuyilinga akamoneke kuli atu: mumu kakutohesa #23.5 Te yijingo ya yisoneko yisandu. yipenya yo, kakutohesa mapula jo. 6Kakufwila mihela yilemu ku yiteleka, ni yitwamo ya lutwe mu masunangonga, 7ni kwameneka ku yitanda, ni kwavulwoka kuli atu ngwo, Longeshi. 8Alioze yenu kanda akanuvuluka ngwo, Longeshi; mumu umuwika Longeshi yenu, ni yenu eswe nuli mandumbu. 9Hano hashi kanda nukavuluka niumwe ngwenu, Tata: mumu umuwika Tatenu, te yoze uli mwilu. 10Chipwe kanda akanuvuluka ngwo, Miata: mumu umuwika Mwata wenu, mwe Kristu. 11Alioze yoze munene Wahiana eswe hakachikenu, akapwe kavumbi kenu. 12Mweswawo malinangamisa, kumakamulelesa; ni mweswawo malilelesa, kumakamunangamisa.
13Lamba lienu, akwa kusonyeka ni A-Fwariseu, yilembese! mumu nwakuyika wanangana wa malilu kuli atu: mumu kunushi kunjilamo yenwene, ni waze mazanga kunjila kunushi kwatayiza. 14Lamba lienu, akwa kusonyeka ni A-Fwariseu, yilembese! mumu nwakuwumbula mazuwo ja twamishi ja mapwo, shimbu te, ha ulembekese, nwakulemba yipinji yisuku. Kashika kumunukatambula upatwilo Wahiana. 15Lamba lienu, akwa kusonyeka ni A-Fwariseu, yilembese! mumu nwakujinga kalungalwiji ni hashi homu mukutayisa kambaji umuwika; ni muze hatá, nwakumupwisa mukwa Heteze yisuho yiali kuhiana yenwene.
16Lamba lienu, tusongo a kupuputa, yenu nwakwamba ngwenu, Mweswawo malishinga ni tembele, chamokomoko; alioze mweswawo malishinga ni oru ya tembele, iye kalikasa. 17Yihepuke ni tupuputa! mumu yinene yahiana yika, shina oru nyi, shina tembele yize ya kusela ku usandu ye oru? 18Mweswawo malishinga ni chilumbilo, chamokomoko; alioze mweswawo malishinga ni mulambu uze uliho, iye kalikasa. 19Yihepuke ni tupuputa! mumu chinene chahiana chika shina chawana nyi shina chilumbilo chize cha kusela ku usandu che chawana? 20Yoze kashika malishinga ni chilumbilo, malishinga nacho, ni yuma yeswe yiliho. 21Yoze malishinga ni tembele, malishinga nalio, ni yoze watwamamo. 22Yoze malishinga ni lilu, malishinga ni ngunja ya Zambi, ni yoze watwamaho.
23Lamba lienu, akwa kusonyeka ni A-Fwariseu, yilembese! mumu nwakufweta chihanda cha kumi cha ku chimbumba ni endru ni kominyu, alioze hinunalelesa yuma yilemu yahiana ya shimbi, upatwilo wa kulita, ni keke, ni Ufulielo: alioze yino Chanutamba kulinga, alioze kanda nulelesa yikwo. 24Tusongo a kupuputa nwakusála kangunu, nwakumina kamelu!
25Lamba lienu, akwa kusonyeka ni A-Fwariseu, yilembese! mumu nwakupemesa haze lia musenge ni panda, alioze muchima munazala ni mbenga ni kuhungumuka ni usolo. 26Yena Ka-Fwariseu wa kupuputa, pemesa hatangu muchima lia musenge ni lia panda, hanga haze liayo nawa hakapeme.
27Lamba lienu, akwa kusonyeka ni A-Fwariseu, yilembese! mumu kununapu ngwe mafuka a kutomesa ni pemba waze akusoloka ngwe apema haze, alioze muchima munazala ni yifwaha ya afu, ni luchisa mweswe. 28Chochene ni yenu nawa haze nunasoloka ngwe akwa ululi kuli atu, alioze muchima nunazala tò ni ulembekese ni uhulia.
29Lamba lienu, akwa kusonyeka ni A-Fwariseu, yilembese! mumu nwakutunga mafuka ja aprofeta, nwakupemesa mafuka ja akwa ululi. 30Nwakwamba ngwenu, Kachi yetu twapwile ha matangwa ja akaka kachi kutwalifutwile no ha manyinga ja aprofeta. 31Kashika nwakulishindakenya hali yenwene nuli ana a waze ashihile aprofeta. 32Ni yenu nwakuzalisa njongo ya akakenu. 33Yenu tupela! vungu lia yihili! ngwe kuchi munwomboka ku upatwilo wa Ngehena. 34Kashika mungutuma kuli yenu aprofeta ni akwa mana, ni akwa kusonyeka: amwe a kuli ayo munukaashiha nikwahachila ha kulusu; ni akwo a kuli ayo munukaalamba ni shikote mu masunangonga jenu, nikwahungumiona katu ku limbo ndo ku limbo, 35hanga manyinga eswe a ululi a kumwangana hano hashi akeze hali yenu, chize ku manyinga ja mukwa ululi Abele ndo ku manyinga ja Zakaria, mwana Mbarakiya, yoze nwamushihile hakachi ka tembele ni chilumbilo. 36Pundu ngunambe kuli yenu ngwami, Yino yuma yeswe kumuyikeza ha chisemuko chino.
37A Yerusaleme! A Yerusaleme! Yena, wakushiha aprofeta, wakwasa mawe waze aatumine kuli yena! Yisuho yipwa haha hingunazange kukungulula ana je ngwe chali makunga ana jenyi mushi lia mapulwa jenyi, ni yenu kunwatayileko! 38Ivwenu, zuwo lienu hanalihichika kuli yenu Hahululu. 39Mumu ngunambe kuli yenu ngwami, Kunuchi kangumona nichimwe chize ku haliapwila ndo munukamba ngwenu, Kawaha yoze meza mu jina lia Mwene.
Iliyochaguliwa sasa
MATEU 23: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
