MATEU 22
22
1Yesu wakumbulwile ni yishima, ngwenyi, 2Hanapwisa wanangana wa malilu ngwe mwanangana yoze walulikile ulungi hali mwanenyi, 3mba watumine ndungo jenyi mukutambika waze aalakenyene ku ulungi: no katayile kwiza. 4Cheka nawa watumine ndungo akwo, ngwenyi, Nukambe kuli waze aalakenyene ngwenu, Hinalulika kulia chami; ngombe jami ni yimuna jami a kutoha haashiha, ni yuma yeswe yinalulika: tweyenu ku ulungi. 5Alioze achilelesele, ayile mu majila jo, umwe ku munda wenyi, ni mukwo ku chitanda chenyi; 6Akwo akwachile ndungo, nikwalinga chipi, nikwashiha. 7Muze mwanangana achivwile, watenukine, watumine mbunga ya maswalale jenyi, wonwene yingalwe aze, mba wochele limbo lio. 8Hohene yamba kuli ndungo jenyi ngwenyi, Ulungi kuunalulika, alioze waze aalakenyene kateleleko. 9Yénu kashika ku makano ja majila, ni waze munuwana, nukaalakenye eze ku ulungi. 10Ni waze ndungo atuhukile ku majila, akungulwile waze eswe awanyine, ni yingulungulu ni apema, ni zuwo lia ulungi liazalile tò ni ngeji.
11Alioze muze mwanangana anjilile mukutala ngeji, wamwenemo mutu kazalile uzalo wa ulungi: 12Yamba kuli iye ngwenyi, Mukwetu, ngwe kuchi wanjilanga muno kushi uzalo wa ulungi? Alioze waholele. 13Hohene mwanangana wambile kuli tuvumbi ngwenyi, Mukasenu molu ni moko, numumbile mu milima ya haze; kumukukapwa malilo ni kulikopola ku mazo. 14Mumu matambika anji, alioze matongola akehe.
15Hohene A-Fwariseu ayile, atwame punga ngwe chize mahasa kumutela ha kuhanjika chenyi. 16Atumine kuli iye tumbaji two, hamwe ni A-Heronde, ngwo, Longeshi, tunanyingika yena uli wamwenemwene, wakulongesa jila ya Zambi nikulita ni umwenemwene, kushi kuvwila woma niumwe: mumu kushi katonde kuli atu. 17Twambulwilenu kashika chize yena unashinginyeka ngwetu, Muchilita ni shimbi shina kuhana lijimu kuli Sesare nyi, shina ka? 18Alioze Yesu wanyingikine ungulungulu wo, kashika wambile ngwenyi, Kuchi te nunangweseka, yenu yilembese? 19Ngulwezenu lumbongo wa lijimu. Anehene lumbongo kuli iye. 20Yamba kuli ayo ngwenyi, Chizulie chino ni chisoneko chino chaya? 21Ngwo, Cha Sesare. Hohene yamba kuli ayo ngwenyi, Hanenu kevwe kuli Sesare yuma ya Sesare; ni kuli Zambi yuma ya Zambi. 22Muze amuvwile, akomokene, akatukile.
23Ha tangwa lize, A-Satuseu ejile kuli iye, waze akwamba ngwo, Uhindukilo wa afu wakuhi niumwe: no amuhulile ngwo, 24Longeshi, Mose wambile ngwenyi, Kachi umwe mafwa keshi ana, kachi mwanakwo akambate mukwo-pwo, akasangule ana kuli yayo. 25Achi, kwapwile ni yetu, asongo-ni-atu shimbiali; ni mutangu wambachile pwo, wafwile, mba se kapwile ni mwana, wahichikile mukwo-pwo kuli mwanakwo. 26Chizechene wamuchiali ni wamuchitatu ndo kuli wamuchishimbiali. 27Mba kulutwe lia ayo eswe, pwo nawa wafwile. 28Ha uhindukilo wa afu, kashika hakachi ka shimbiali, pwo liaya makapwa? Mumu o eswe apwile nenyi?
29Yesu wakumbulwile, ngwenyi, Nunapianguka, se kunushi kunyingika yisoneko, chipwe tachi ja Zambi, 30mumu ha uhindukilo wa afu keshi kumbata, chipwe keshi kuhangisa malo, alioze kanapu ngwe angelo ja Zambi mwilu. 31Alioze ha kutwala ku uhindukilo wa afu, kunwatangile chize Zambi ahanjikile kuli yenu, nyi? 32Yami nguli Zambi ya Apalahama, ni Zambi ya Izake, ni Zambi ya Yakomba? Zambi hi Zambi ya afu ko, alioze ya a mwono. 33Muze mbunga achivwile, alishimwokene ha longeso lienyi.
34Alioze A-Fwariseu muze evwile ngwo, Haholesa A-Satuseu, alikungulwile hamuwika. 35Mba umwe wa kuli ayo, mukwa shimbi, wamuhulile, akamweseke ngwenyi, 36Longeshi, liji linene lia shimbi mu mukanda wa shimbi lika? 37Yesu wambile kuli iye ngwenyi, Ngwo, Ukazange Mwene Zambi-ye ni mbunge ye yeswe, ni mwono we weswe, ni kunyonga che cheswe. 38Lino lie liji litangu ni linene lia shimbi. 39Ni liamuchiali Yinalifu nalio, lino ngwo. Ukazange mwenyembo we ngwe wakulizanga yena mwene. 40Ha maliji ano aali a shimbi, shimbi yeswe lukombo ni mikanda ya aprofeta yinakolo.
41Achi, shimbu A-Fwariseu akungulukile, Yesu waahulile, 42ngwenyi, Kuchi nunashinginyeka hali Kristu? Mwana waya? O ngwo, Mwana David. 43Iye ngwenyi, Ngwe kuchi kevwe David muli Spiritu anamuvuluka ngwenyi, Mwene, nikwamba ngwenyi,
44Mwene wambile kuli Mwene wami,
Ngwenyi, Twama ku kwoko liami lia chindume,
Ndo mungusa akwa kole je kushi lia yiliato ye.
45Kachi kashika David kanamuvuluka ngwenyi, Mwene, ngwe kuchi kevwe mapwa mwanenyi? 46Mba niumwe wahashile kumukumbulula liji nilimwe, chipwe chize ku tangwa lize kahunukine niumwe kumuhula nawa nichimwe.
Iliyochaguliwa sasa
MATEU 22: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
