Rit 3
3
Naomi fer plan pou Rit
1Enn zour, Naomi dir Rit: “Mo tifi, mo bizin ed twa trouv enn dimoun. Koumsa, to pou ena to prop menaz e li pou ava fer to boner. 2To konn nou fami, Boaz. Limem ti les twa travay avek so bann servant. Zordi-swar li pou taminn lorz dan so plantasion. 3Bengn twa, met to pli bon linz ek parfim twa. Apre sa, to al dan landrwa kot li pe taminn lorz. Me res kasiet ziska ki li fini manze-bwar. 4Kan li pou al dormi, get bien dan ki plas li ete. Lerla, to ale, san fer tapaz, to dekouver so lipie#3:4 Dapre koutim sa lepok la, kan enn fam ti dekouver lipie enn zom, sa ti vedir ki fam la ti pe rod proteksion zom la. e to alonz twa lamem. Limem li pou dir twa ki bizin fer.” 5Rit dir so belmer: “Mo pou fer tou seki to finn dir mwa.”
6Alor Rit al dan landrwa kot Boaz pe taminn lorz. Li fer exakteman seki so belmer ti dir li. 7Kan Boaz fini manze-bwar, li ti dan enn bon mood. Li al dormi kot enn ta lagrin ti anpile. Alor Rit ale, san fer okenn tapaz, li glis li anba dra kot lipie Boaz. 8Omilie lanwit, somey Boaz kase! Li gagn sok letan li trouv enn fam pe dormi kot so lipie. 9Li dimande: “Kisannla twa?” Rit reponn: “Mwa sa, Rit, to servant. Mo finn vinn rod to proteksion, parski to enn fami pros. To ena enn responsabilite anver mwa.” 10Boaz dir li: “Ki LESEGNER beni twa, mo tifi. To ti montre to fidelite anver fami to belmer, me sann-fwa la, to finn montre enn pli gran fidelite ankor. To pa finn al rod zenn-zenn garson, ki zot ris ouswa pov. 11Pa bizin to trakase, mo pou fer tou seki kapav pou rann twa erez. Tou dimoun dan pei kone ki to enn fam drwat. 12Wi, li vre ki mo enn fami pros e mo ena enn devwar anver twa. Me ena enn lot misie ki pli pros ek to fami ki mwa. 13Res lamem pou sa lanwit la. Dime gramatin nou ava gete si li oule pran to responsabilite kouma enn fami pros. Si li aksepte, les limem fer li. Si li pa aksepte, mo promet divan LESEGNER ki mo pou pran to responsabilite momem. Ale! Dormi lamem ziska gramatin.”
14Rit dormi kot lipie Boaz ziska gramatin. Me li lev boner, avan mem ki lizour fer, pou ki personn pa remark li. Boaz dir: “personn pa bizin kone si enn fam finn vinn isi.” 15Avan ki Rit ale, Boaz dir li: “Amenn to manto e trap li bien.” Boaz ranpli manto la ar apepre 15 kilo lorz e li met li lor ledo Rit. Lerla, Rit retourn dan vilaz. 16Rit al direk ar so belmer. Naomi dimann li: “kouma sa finn pase, mo tifi?” Lerla, Rit rakont tou seki Boaz finn fer pou li. 17Rit dir: “Li finn mem ofer mwa sa 15 kilo lorz la. Li pa ti anvi mo retourn kot mo belmer lame vid.” 18Naomi dir Rit: “Pran pasians mo tifi. Biento nou pou kone ki pe rezerve pou twa. Mo sir ki lespri Boaz pa pou trankil tanki li pa fini okip tousala zordimem.”
Iliyochaguliwa sasa
Rit 3: KMOTPOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kreol Morisien OT Portions © Bible Society of Mauritius, 2020.