Ester Introdiksion
Introdiksion
Liv Ester rakont zistwar enn kominote Zwif ki bann dimoun ti menas pou extermine. Liv la rakonte ki manier kominote Zwif la finn reysi sap dan difikilte. Zistwar la pase dan lepok kot bann Pers ti pe dominn rezion Pros-Orian, depi Lenn ziska Lezip. Boukou Zwif ki ti deporte depi Izrael ek exile dan Babilonn, pa ti retourn dan zot pei apre ki bann Babilonien ti perdi pouvwar (539 avan Zezi). Sa bann Zwif la ti pe bizin siport boukou difikilte parmi pep kot zot ti pe viv parski zot ti kontign swiv zot prop lalwa ek koutim. Zistwar la deroul kouma enn dram. Ti ena enn gran tansion ant Amann, premie minis lerwa Zerses ek Mardose, fonksioner zwif. Dapre zistwar la, Ester, lor konsey Mardose, reysi vinn larenn Pers ek sov lavi so pep. Sa fer nou konpran ki manier tou bann plan pou detrir bann Zwif finn touletan tom dan dilo. Zisteman, dan ka sa zistwar la, sa zour kot swadizan ti pou touy tou bann Zwif la, vinn zour kot bann Zwif mem finn masakre zot bann lennmi. Dat ki bann Zwif finn swazir pou selebre sa viktwar la dan zistwar zot lavi, tom mem zour ar enn fet Zwif ki apel Pourim. Fet Zwif la, ti selebre dan sezon printan, avan fet Pak. Samem lorizinn fet la.
Liv la met lanfaz lor dezir ki bann Zwif ti ena pou tir vanzans dan enn fason ki kapav sok nou. Dan tousala, nou bizin plito get bann Zwif kouma enn pep ki ti pe fer tou pou defann zot. Zot ti viktim dominasion dan enn pei etranze. Rasis ek reze par lezot, bien souvan amenn sa kalite reaksion la. Zistwar Ester, ankor enn fwa montre ki manier laviolans prodir laviolans. Si nou get bien, kan sa liv la ti finn ekrir, ti dan enn lepok kot bann Zwif ti finn perdi tou lespwar pou gagn zot lindepandans nasional. Zisteman, bann seki finn ekrir li, ti anvi rapel pep la dan ki difikilte zot ti finn sorti e ki kalite gran delivrans zot ti finn gagne.
Iliyochaguliwa sasa
Ester Introdiksion: KMOTPOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kreol Morisien OT Portions © Bible Society of Mauritius, 2020.