Ester 5
5
Festin Ester
1Apre trwa zour karem, Ester met so rob rwayal. Li rant dan lakour ki trouv andan pale. Lakour la vizavi ar lasal kot ena tronn. Lerwa pe asiz lor so tronn ki vizavi lantre pale. 2Kouma lerwa trouv Ester pe diboute dan lakour, lerwa donn li so faver. Deswit, li tir so baton rwayal e li prezant li dan direksion Ester. Ester aprose e li tous baton rwayal la dan so bout. 3Lerwa dimann li: “Ki finn arive, larenn Ester? Ki mo kapav fer pou twa? Seki to dimande mo pou donn twa, mem si sa kout mwa lamwatie mo rwayom.” 4Ester reponn li : “Si sa fer lerwa plezir, les li vinn avek Amann dan festin ki mo finn prepare pou lerwa zordi.” 5Lerwa dir: “Degaze al sers Amann pou ki nou realiz dezir Ester.” Lerla, zot toulede, lerwa ek Amann, al dan festin ki Ester finn prepare. 6Letan ki zot pe amize, manze-bwar, lerwa dimann Ester: “Ki to ti anvi dimann mwa? Mo pou donn twa tou seki to oule, seki to dimande to pou gagne. Mem si sa kout mwa lamwatie mo rwayom, mo pou fer li pou twa.” 7Ester dir: “Ala seki mo oule: 8Si mo finn gagn lestim lerwa e si sa fer li plezir pou donn mwa seki mo dimande, mo ti pou kontan si lerwa ek Amann vinn dan festin ki mo pou organize pou zot dime. Lerla, mo pou dir lerwa mo dezir.”
Amann fer plan pou pandi Mardose
9Sa zour la, Amann ale leker kontan. Li trouv Mardose dan lakour pale. Mardose pa ni leve ni gagn per divan li. Sa fer so koler monte. 10Me Amann kontrol so koler e li al so lakaz. Letan li rant kot li, Amann apel so fam, Zeres, ek so bann kamarad. 11Li koumans flat limem ar zot. Li dir zot ki kantite rises ek komie garson li ena. Li osi dir zot ki manier lerwa finn nomm li pli gran fonksioner lakour rwayal. Sa donn li enn gran loner. 12Amann dir ankor: “Mem larenn Ester pa finn les personn, apart mwa, akonpagn lerwa dan festin ki li ti prepare. Dime osi mo invite pou al dan so festin ansam avek lerwa. 13Me tousala pa fer mwa plezir, tanki mo pou trouv sa Zwif la, Mardose, pe travay dan lakour pale.” 14So fam, Zeres, ek so bann kamarad ki la, dir li: “Dime gramatin, fer aranz enn safodaz. Kan to pou al dan festin avek lerwa, dir li fer pandi Mardose. Koumsa, to ava amize lespri trankil apre.” Sa konsey la fer Amann plezir e li fer aranz safodaz la.
Iliyochaguliwa sasa
Ester 5: KMOTPOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kreol Morisien OT Portions © Bible Society of Mauritius, 2020.