Ezekiel 39
39
Gog A kizawna
1Vaanglianpipa Topa in, “A thithei mihing awng, Meshech le Tubal ngamte ukpi pa Gog sonsia in a, keima sia a ngal ka hi hunlam ama tungah son in. 2Keima in ama sia lam thak khat ah ka heak tu a, saksang pek panin, Israel ngam mualte a thet dong lam ka pui tu hi. 3Tua zawkciang a khut veisang ah a toai thal le a khut ziatsang ah a toai thaltangte ka bekkeaksak tu hi. 4Gog le a ngalkaphonpite, a kipawlpuite Israel mualte tungah thi tu uh a, a mithi luangte sia ngamsate le vacimte an ka suaksak tu hi. 5Amate lozau sungah thi tu uh hi. Keima, Vaanglianpipa Topa ka pau zo hi. 6Magog ngam le thinmuang takin a mite teenna tuipi dung theampo mei taw ka hal tu hi, tuaciang mite theampo in, Keima, Topa ka hi hunlam hong he tu uh hi. 7Israel ka mite in ka min thiangtho ka hesak takpi tu a, ka min a kidaisak nawn buatu hi. Tuasia ciang, minamte in Keima, Topa sia Israel ii Thiangtho Pathian ka hi hunlam hong he tu uh hi,” ci hi.
8Vaanglianpipa Topa in, “A thu ka sonsa ni sia hong tung takpi tu hi. 9Israel khuapite ah a teang mite pai in, a kinusia ngalhiamte thingthu tu in khawm tu uh hi. Lumte, thalte, thaltangte, teite le molte thingin thut tu a, kum sali sung khom tu uh hi. 10Amate in lo sung pan thing tom tu le duisung pan thing phuk tu kul ngawl hi, banghang ziam cile amate in ngalhiam nusiatte a thut tu in nei uh hi. A ngalte ii a suttol a laaksak vanhte, amate in suttol a, laaksak tu hi,” Vaanglianpipa Topa in son zo hi.
Gog Kiphumna
11 Topa in, “Hi thu teng hong pian ciang, Gog kiphumna tu mun khat sia Tuipi Thi ii nisuana sang Israel ngam Khualhawte Ngamkuam sungah ka pia tu hi. Gog le a ngalkapte theampo tua munah kiphum tu a, tua kuam sia ‘Gog ii Ngalkaphonpi Kuam’ kici tu hi., 12Israel mite in mithi luangte theampo a phum natu le a leitang thiangthosak kik natu in tha sali hun bo tu hi. 13Ngamsung a teang mihingte theampo in mithi phumpui tu hi, tua ahiciang ka ngal zaw ni in amate minphatna kipia tu hi. Keima, Vaanglianpipa in ka son zo hi. 14Tha sali a bo zawkciang leitang a thianthosak thei natu in, ngamsung theampo ah khualhaw in mithi luang a kiphum ngawl lai theampo a zong tu le a phum tu pasalte kiteal tu hi. 15Amate sia ngamsung suk le to ah vak kawkoai in, mithi ngu khat a mu simin, tua ii hui ah tepteena khat vawt tu hi, tua hile thaankhuk tote pai in Gog ii Ngalkaphonpi Kuam sungah phum thei tu uh hi. 16(Tua mun taw a kinai na ah ngalkaphonpi ii min a kitap khua khat om tu hi) Tuabangin a leitang kithiangthosak kik tu hi,” ci hi.
17Vaanglianpipa Topa in kei tungah, “A thithei mihing awng, amate atu ka vawt sangaw biakpiakna sate ne tu in, kiim le paam theampo pan vacim le nganhingte theampo hong pai natu in sam in. Tua in Israel mual tungah poaipi khat hi tu a, tua munah sa ne in chi dawn thei tu uh hi. #Tpl 19:17-18 18Tuate in tuutalte ahibuale, tuunote ahibuale kealte ahibuale, khuital thaute bangin a kithatlum ngalkapte ii luangte ne in, leitung ngamukte ii chi dawn tu uh hi. 19Sangaw biakpiaknate bangin hi mihingte ka thalup ciangin, vacimte le nganhingte in a chi le a thaute theampo a kham dongin ne tu uh hi. 20Keima sabuai tungah tuate in siphute le a tungtote, ngalkapte le ngalsim mihingte ii sa a neak zawk zaza ne tu uh hi. Keima, Vaanglianpipa in ka son zo hi,” hong ci hi.
Israel ngam Kipua kikna
21 Topa in, “Minamte in ka vaangletna ka musak tu hi, tuaciang a maan a thu ka khensat natu in bangbangin ka vaangletna zangh khi ziam ci sia ka lak tu hi. 22Israel te in tua hun pan kipan Keima sia Topa a Pathian ka hi hunlam hong he tu uh hi. 23Minamte in kei tungah mawna khialna hong vawt nate hangin Israel te sal tang a hina thu a tel tu uh hi. Amate nungngat in a ngalte in ka zosak a, ngal sungah ka thatlumsak hi. 24Amate a ninnoi na le a seksol nate taw a kilawm bangin ka thuaksak a, amate ka nungngat hi,” ci hi.
25Vaanglianpipa Topa in, “Ahihang tu in Jacob suan le paal Israel mite ka hesuak tu a, ka nuamsasak kik tu hi. Ka min thiangtho ka sungsia tu hi. 26Amate kuama in tawng nawn ngawlin, a ngam sungah ngammuangin khatvei a teen kik ciangin, keima hong leeheak hu in, bangbangin a mindai ci sia a mangil thei tu uh hi. 27Keima thiangtho ka hi hunlam sia minam tampi ka lak natu in, a ngalte teenna ngam theampo panin ka mite ka pui kik tu hi. 28Tua hun ciangin, ka minamte in Keima, Topa a Pathian ka hi hunlam hong he tu uh hi. Hi thu amate ii a tel theina sia, keima in amate matsa in ka puak a, tu in khawm kikin, khat zongh kikhe ngawlin, a ngam ah ka puak kik hu ahi hi. 29Israel mite tungah ka thaa ka buak tu a, amate ka nungngat kik ngei buatu hi. Keima, Vaanglianpipa Topa in son zo khi hi,” ci hi.
Iliyochaguliwa sasa
Ezekiel 39: SCB2
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Siyin Chin Bible © Bible Society of Myanmar, 2016