Mark 13
13
Liisimakusighqat Nunam Kenlekaghqaanun
1Jesus aanumaluku Temple‑meng, ataasim maligsaaghtengan pikaa, “Apeghtughista, ii‑i! Esghaqaghqiqun maakut pinighnaghllaget mangteghat uyghagrukutaaghllagneng ulimaaghet.”
2Jesus‑em pikaa, “Esghaghsikii mangteghaghllaget maakut? Talwa ataasiq uyghak nemininnaanghituq; qamaglluteng ulleghqughyaghqaagut.”
3Mount Olives‑mi, Jesus ellnginaghhaghmi aqumgamaluku Temple‑mun ayuqluni, Peter‑enkut James‑enkut John‑enkut Andrew‑nkut takukaat. 4Aaptekaat, “Ungipaatikut, qakun tamaakut piyaghqaawat? Sangulleqa liisimakusighqaghput tamaakut apeghiilleghqiitnun?”
5Jesus‑em pikii, “Kelengatek, kitumun alngunak puughtestegpenasi. 6Uglaapiglleghhii tagiyaghqaaguq atuqluku aatqa, whaten piiqluteng, ‘Ellnganguunga!’ Enkaam uglaapiglleghhii puughqughyaghqaqaat. 7Nagaququfsiki pilluwat, akusqaghtaatkellghetlu pilluwat, alingegpenasi. Tamaana piyaghqaaguq, salin iquggnaqngunghituq. 8Nunam ramkengi pilluwutullequt, nunamllu ataneghpagullghi sughugaallequt, nunatlu nani alngunak tuyepeghtaghaqluteng piyaghqaagut, neqangisagllagaqlunillu piyaghqaaguq. Qamaglluteng tamaakut aghnam ighniyukestallghatun ayuqut.
9“Iwernga elpesi kelengalusi. Tugulusi agghistenun aglaalleqiisi. Synagogue‑ni kagsagmiglleqiisi. Whanga apalluqlunga nekevellequsi sivungitni igleghutistetlu umiilgetlu ungipaghtengulusi Pinilghiineng Ungipaneng. 10Pinilghiit Ungipat ungipaqsaghqaagut tamanganun ramkenun sivungani iqugtellghem. 11Tugulusi aglaaskangisi nanqigtivigmun sumeghtaghaqestaghpenasi akuzitkaghqameng. Pilleghqaq kaataqegkan akuziiqnaaghtusi pisqelleghpesistun, qayughllak elpesingunaanghitut akuzilghiit, Agleghnalghiik Taghneghak elpesigun akuziiqnaaghtuk. 12Yuget angleguteteng tuqutesleqiit, yuget avaqutateng tawateghpigaq pisleqiit. Taghnughhaatlu angayuqateng kipullginaaghluki tuqutesleqiit. 13Whanga apalluqlunga qamaglluni yugem ugumiilleqiisi. Iwernga kina alngunak nuqenneghtuqaq kenlemun yugulillengyaghqaaguq.”
Jesus‑em Aapqanga Seghleliilleghqaghllak
14(Yeqay atightulghiim liigikligu una uuknaliqelleq!) “Esghaqufsigu agleghniighutista paaghqiitestilghii, nekaghqaqenghilkemini nekevelghii, tamaakut Judea‑melnguut anagniighhaat naayghanun. 15Yuuk mangtegham qaaynganilnguq qamavek kelqesaghqameng aqfatefqaami pilghaaq. 16Yugem piitesighaghvigmelnguum qaasligni aqfafqaamikek pilghaaq. 17Seghleghwaaghunaqnguut tamaakut qumilgetlu mamaghtilghiitlu tamaani aghneghni! 18Yughaghtek Kiyaghneghmun uksumi tawaten pifqaan pisqelluku! 19Qayughllak tamaani aghneghni seghleliiq seghleghataghaayaghqaaguq seghleliighaqelleghneng ima Kiyaghneghem ulimayuwhaallghaneng nuna whavemun kenlanga. Allamengllu tawatelnguq seghleliiq pinaanghituq. 20Atanghem takellimangisaqaki tamaakut aghneghet, kina alngunak unguvanayanghituq. Iwernga apalluqluki nakmikegkani aghneghet takellikaqii.
21“Taagken kitum alngunak pikangisi, ‘Esghaghteggu, Christ‑a whaa!’ nalighmeng ‘Esghaghteggu, tazigna esgha!’ ugpeqegpenaan. 22Christ‑asighwaaghetlu uuknaliqistesighwaaghetlu allgeghtuusaghqaagut. Allaaghlluwhaghtighllagaataghyaghqaagutlu, saghiighanaghqeghllagaataghyaghqaagutlu puughqughnaluki yuget, talwa Kiyaghneghem nakmikegkii puughsaqlegukumegteki pilleqiit. 23Enkaam kelengalusi! Sameng tamaghhaaneng ungipaatekestaghamsi tamaakut pistegpenaki.
Tagilleghqaa Ighneghan Yugem
24“‘Kingunganeng taam seghleliilleghllagem siqineq mamlegllequq,
tanqiq nighugunnanighllequq,
25ighaleqetaaghet ifkaquullequt qilagameng,
aghtughyaghqaanghillghet qilagamelnguut igleghallghit alngunaghqeslequt.’
26“Taagken yuget esghaghlleqaat Ighnegha Yugem tagilghii qilawaaghteggun aghtughyaghqaanghillelighllaglunillu nighughqellelighllaglunillu.
27“Taagken yaqulget kayaglleqii qerngughtesqelluki nakmikegkani yuget nunataghhaaneng tamaghhaaneng.
Figs‑em Uqfiga Liitfiksaghqaq
28“Liitfikiteggu figs‑em uqfiga. Avayii uniilliighaghluteng ququngii piitekestaqata sungaghyuketun liisimakelleqaghsi kiigyaghtulleq. 29Figs‑em uqfiganeng liitelleghpesistun esghaqufsiki tamaakut qilagamelnguut apellemtun pilghiit, liisimakelleqaghsi Ighneghan Yugem kaasaghtungestallgha, aaqun amigmun lliighumaaq. 30Ipa ungipaatamsi, maaten unguvalghiit tuqunaanghitut sivungani qamaglluteng tamaakut pilleghqiita. 31Qilagallu nunallu aviighusaghqaaguk, iwernga whanga akuzitenka aviighusagqaanghitut.
Kelengakluku Tagilleghqaa
32“Iwernga kitum alngunak nallukaa nani aghneghmillu aflumillu tagiyaghqaatanga. Talwa yaqulget qilagmelnguut nallukaat, Ighneghemllu nallukaa, Atanginaghhaam liisimakaa. 33Kelengatek, waaknanighpenasi qayughllak nallukaghsi qakun tagilleghqaa. 34Yugtun ayuqsaghqaaguq natmun pilghiitun. Aghulaqellghilluni qepghaghteni aflengakistengllaghlleqii mangteghaminun, ungipaalleqiillu sayaghqiitneng. Amigniighteminunllu kelengakesqegkaa uteghnilleghqani. 35Enkaam elpesi kelengatek, qayughllak nallukaghsi qakun mangteghalek uteghnighyaghqaatanga. Walluumllu tagiiqli ighivgaghmi, unugem qukaani, aghtaghaqestami, nalighmeng unaanguluku. 36Enkaangam kelengatek luuraq kaatqaghtekumi qavaalusi angunayukangisi. 37Aapqegka una elpesinun, tamaghhaghllaganun pingwaaqa: Kelengalusi!”
Iliyochaguliwa sasa
Mark 13: ess
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.
Mark 13
13
Liisimakusighqat Nunam Kenlekaghqaanun
1Jesus aanumaluku Temple‑meng, ataasim maligsaaghtengan pikaa, “Apeghtughista, ii‑i! Esghaqaghqiqun maakut pinighnaghllaget mangteghat uyghagrukutaaghllagneng ulimaaghet.”
2Jesus‑em pikaa, “Esghaghsikii mangteghaghllaget maakut? Talwa ataasiq uyghak nemininnaanghituq; qamaglluteng ulleghqughyaghqaagut.”
3Mount Olives‑mi, Jesus ellnginaghhaghmi aqumgamaluku Temple‑mun ayuqluni, Peter‑enkut James‑enkut John‑enkut Andrew‑nkut takukaat. 4Aaptekaat, “Ungipaatikut, qakun tamaakut piyaghqaawat? Sangulleqa liisimakusighqaghput tamaakut apeghiilleghqiitnun?”
5Jesus‑em pikii, “Kelengatek, kitumun alngunak puughtestegpenasi. 6Uglaapiglleghhii tagiyaghqaaguq atuqluku aatqa, whaten piiqluteng, ‘Ellnganguunga!’ Enkaam uglaapiglleghhii puughqughyaghqaqaat. 7Nagaququfsiki pilluwat, akusqaghtaatkellghetlu pilluwat, alingegpenasi. Tamaana piyaghqaaguq, salin iquggnaqngunghituq. 8Nunam ramkengi pilluwutullequt, nunamllu ataneghpagullghi sughugaallequt, nunatlu nani alngunak tuyepeghtaghaqluteng piyaghqaagut, neqangisagllagaqlunillu piyaghqaaguq. Qamaglluteng tamaakut aghnam ighniyukestallghatun ayuqut.
9“Iwernga elpesi kelengalusi. Tugulusi agghistenun aglaalleqiisi. Synagogue‑ni kagsagmiglleqiisi. Whanga apalluqlunga nekevellequsi sivungitni igleghutistetlu umiilgetlu ungipaghtengulusi Pinilghiineng Ungipaneng. 10Pinilghiit Ungipat ungipaqsaghqaagut tamanganun ramkenun sivungani iqugtellghem. 11Tugulusi aglaaskangisi nanqigtivigmun sumeghtaghaqestaghpenasi akuzitkaghqameng. Pilleghqaq kaataqegkan akuziiqnaaghtusi pisqelleghpesistun, qayughllak elpesingunaanghitut akuzilghiit, Agleghnalghiik Taghneghak elpesigun akuziiqnaaghtuk. 12Yuget angleguteteng tuqutesleqiit, yuget avaqutateng tawateghpigaq pisleqiit. Taghnughhaatlu angayuqateng kipullginaaghluki tuqutesleqiit. 13Whanga apalluqlunga qamaglluni yugem ugumiilleqiisi. Iwernga kina alngunak nuqenneghtuqaq kenlemun yugulillengyaghqaaguq.”
Jesus‑em Aapqanga Seghleliilleghqaghllak
14(Yeqay atightulghiim liigikligu una uuknaliqelleq!) “Esghaqufsigu agleghniighutista paaghqiitestilghii, nekaghqaqenghilkemini nekevelghii, tamaakut Judea‑melnguut anagniighhaat naayghanun. 15Yuuk mangtegham qaaynganilnguq qamavek kelqesaghqameng aqfatefqaami pilghaaq. 16Yugem piitesighaghvigmelnguum qaasligni aqfafqaamikek pilghaaq. 17Seghleghwaaghunaqnguut tamaakut qumilgetlu mamaghtilghiitlu tamaani aghneghni! 18Yughaghtek Kiyaghneghmun uksumi tawaten pifqaan pisqelluku! 19Qayughllak tamaani aghneghni seghleliiq seghleghataghaayaghqaaguq seghleliighaqelleghneng ima Kiyaghneghem ulimayuwhaallghaneng nuna whavemun kenlanga. Allamengllu tawatelnguq seghleliiq pinaanghituq. 20Atanghem takellimangisaqaki tamaakut aghneghet, kina alngunak unguvanayanghituq. Iwernga apalluqluki nakmikegkani aghneghet takellikaqii.
21“Taagken kitum alngunak pikangisi, ‘Esghaghteggu, Christ‑a whaa!’ nalighmeng ‘Esghaghteggu, tazigna esgha!’ ugpeqegpenaan. 22Christ‑asighwaaghetlu uuknaliqistesighwaaghetlu allgeghtuusaghqaagut. Allaaghlluwhaghtighllagaataghyaghqaagutlu, saghiighanaghqeghllagaataghyaghqaagutlu puughqughnaluki yuget, talwa Kiyaghneghem nakmikegkii puughsaqlegukumegteki pilleqiit. 23Enkaam kelengalusi! Sameng tamaghhaaneng ungipaatekestaghamsi tamaakut pistegpenaki.
Tagilleghqaa Ighneghan Yugem
24“‘Kingunganeng taam seghleliilleghllagem siqineq mamlegllequq,
tanqiq nighugunnanighllequq,
25ighaleqetaaghet ifkaquullequt qilagameng,
aghtughyaghqaanghillghet qilagamelnguut igleghallghit alngunaghqeslequt.’
26“Taagken yuget esghaghlleqaat Ighnegha Yugem tagilghii qilawaaghteggun aghtughyaghqaanghillelighllaglunillu nighughqellelighllaglunillu.
27“Taagken yaqulget kayaglleqii qerngughtesqelluki nakmikegkani yuget nunataghhaaneng tamaghhaaneng.
Figs‑em Uqfiga Liitfiksaghqaq
28“Liitfikiteggu figs‑em uqfiga. Avayii uniilliighaghluteng ququngii piitekestaqata sungaghyuketun liisimakelleqaghsi kiigyaghtulleq. 29Figs‑em uqfiganeng liitelleghpesistun esghaqufsiki tamaakut qilagamelnguut apellemtun pilghiit, liisimakelleqaghsi Ighneghan Yugem kaasaghtungestallgha, aaqun amigmun lliighumaaq. 30Ipa ungipaatamsi, maaten unguvalghiit tuqunaanghitut sivungani qamaglluteng tamaakut pilleghqiita. 31Qilagallu nunallu aviighusaghqaaguk, iwernga whanga akuzitenka aviighusagqaanghitut.
Kelengakluku Tagilleghqaa
32“Iwernga kitum alngunak nallukaa nani aghneghmillu aflumillu tagiyaghqaatanga. Talwa yaqulget qilagmelnguut nallukaat, Ighneghemllu nallukaa, Atanginaghhaam liisimakaa. 33Kelengatek, waaknanighpenasi qayughllak nallukaghsi qakun tagilleghqaa. 34Yugtun ayuqsaghqaaguq natmun pilghiitun. Aghulaqellghilluni qepghaghteni aflengakistengllaghlleqii mangteghaminun, ungipaalleqiillu sayaghqiitneng. Amigniighteminunllu kelengakesqegkaa uteghnilleghqani. 35Enkaam elpesi kelengatek, qayughllak nallukaghsi qakun mangteghalek uteghnighyaghqaatanga. Walluumllu tagiiqli ighivgaghmi, unugem qukaani, aghtaghaqestami, nalighmeng unaanguluku. 36Enkaangam kelengatek luuraq kaatqaghtekumi qavaalusi angunayukangisi. 37Aapqegka una elpesinun, tamaghhaghllaganun pingwaaqa: Kelengalusi!”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.