ROOMU SOKKA 9
9
MAGANU DOORSHA
1Kiristoosinni noommo daafira halaale coyi'reemmo ikkinnina dikapheemmo. Kapheemmokkita Qullaawu Ayyaani massagannohu tii"i'ya kulannoe. 2Lowo dadillinna agurannokki qarri wodani'ya giddo no. 3Maalu fiixa'ya ikkitinorira gosa'ya daafira yee, Kiristoosiwiinni badameenna Maganu rumo iillitoomme"ero nafa digiwoommo. 4Israeele Maganu doorino gosaati. Maganu insa oososi assi'rino; ayirrinyesi leellishinonsa; gondoorono einonsa; Seerano uyinonsa; halaalaancho magansi'ranna hexxo uyinonsa.#Ful 9:4 lai. 5Insa albi annuwawiinni dagginoreeti. Kiristoosino maalunni dayinohu insawiinniiti; wo'munkura aliidi Magani Kiristoosi, hegere geeshsha galatamo!#9:5woy wo'manka gashshanno Magani hegere geeshsha galatamo yaano dandiinanni. Hamii'ni.
6Ikkollana Maganu coyi'rino coyi ikkikkinni gatino yaa di"ikkino. Israeele baala Maganu doorino mannaati yaano di"ikkino. 7Abirihaami ooso baala Maganu uyino hexxote yaa di"ikkino. Maganu Abirihaamira, «Sirchikki sirannohu Yisihaaqi widoonniiti» yiino.#Kal 21:12 lai. 8Kunnira, ronsoonni garinni calla ilantinori Maganu ooso di"ikkitino; Maganu uyino hexxo garinni ilantinori Abirihaami sirchooti. 9Tini Maganu uyino hexxo, «Daanno diro techonte gede atewa galagale higeemmo; Saarano labbaa qaaqqo afidhanno» yitanno.#Kal 18:10 lai. 10Konne calla ikkikkinni, Ribiqari lamenti ooso mittu annira ahaahinke Yisihaaqira ilantinoreeti. 11Maganu doorshi loosunni ikkikkinni woshshattosinni ikkinota leellishate, lamenti ooso ilantukkinni busha woy dancha coye assitukkinni, 12Maganu Ribiqara, «Bayiru maa'neho soqqamaancho ikkanno» yiinose.#Kal 25:23 lai. 13Kuni ikkannohu,
«Yaiqoobi baxoommo;
Eesawu giwoommo»
yine borreessinoonni garinniiti.#Mil 1:2-3 lai.
14Xa ma yineemmo? «Maganu ditaashshanno» yinammora dandiineemmo? Dee'ni! Horonta hatto yaa didandiineemmo! 15Maganu Musera,
«Marareemmoha marareemmo;
maareemmoha maareemmo»
yiino.#Ful 33:19 lai. 16Kunnira Maganu doorshi maarosinniiti ikkinnina, mannu halchinonna loosino garinni di"ikkino. 17Kunnira Qullaawu Maxaafi giddo Feriooni daafira, «Ani ate kayisoommohu,#9:17 Ani ate kayisoommohuyaannoha, reyattokki gede assoommohewoy moohisoommohe yaa dandiinanni. (wolqa'ya ate aana leellishateetinna su'mi'ya gobba baalate ayirranno gede assateeti» yine borreessinoonni.) 18Maganu maarara hasi'rinoha maaranno; mito kayinni mokkookku wodaniha assanno.
19«Hatto ikkannoha ikkiro, Maganu manna mayira bushiishannoyya? Isi hedo ittisannohu nooni?» yaannohu hee'rannoha ikkanno. 20Koo mancho! Maganu ledo xa'mamate mayi taalleenyi noohe? Doru uduunnichi ganannosiha, «Togo assite mayira loosittoe» yaa dandaannoni?#Isa 29:16; 45:9 lai. 21Woy doru uduunne gananno manchi mitto tuutira, wole minira ikkanno gede asse gana didandaanno?
22Maganu hanqosi leellisharanna wolqasi xawisara hasi're, baote qixxaawinohura hanqu uduunnira lowo geeshsha cincino. 23Hatto assinohuno, umo asse ayirrinyeho qixxeessinorira maarote uduunnira ayirrinyisi batinye leellishara yeeti. 24Ninke Ayihudete giddonni calla ikkikkinni Dagate giddonnino woshshe maarote uduunne assinonke. 25Maganu Himanaanchu Hoosei widoonni,
«Manna'ya ikkitinokkire, ‹Manna'yaati› yeemmo;
banxoonnikki gosa, ‹Banxannireeti› yeemmo» yiino.#Hos 2:23 lai.
26«Manna'ya di"ikkitinoonni» yinoonninsa darga,
«Heeshshote Magani oosooti» yinanninsa.#Hos 1:10 lai.
27Isayaasino qaalesi naggi asse Israeelete daafira, «Israeelete manni baaru shaafi gede kiiro batidhurono, insa giddonni shiimu manni callu gatanno. 28Mootichu baattote aana keeshshikkinni gudisama yoo yaanno» yiino.#Isa 10:22-23 lai. 29Isayaasi umo asse,
«Olantote Mootichi Kaaliiqi taraare gatisa hoogoommenkero,
ninkeno Soddoomunna Gomooru Katami gede,
ba'ne hoongoommo»
yee coyi'rino.#Isa 1:9 lai.
ISRAEELENNA DANCHA DUDUWO
30Xa ma yineemmo? Keeraanchimma hasidhinokki daga keeraanchimma afidhino. Tenne keeraanchimmano amma'natenni afidhino. 31Ikkollana, keeraanchimma aanno Seeri hoode hadhannoti Israeelete gosa, Seera wonsha hooggino daafira keeraanchimma diafidhino. 32Afi'ra hoogginohu, insa keeraanchimma amma'natenni ikkikkinni loosunni hasidhanno daafiraati. Kunnira, guficho ikkinonsa kinchinni gufidhino. 33Kunino,
«Kuneeti Tsiyooni kincho woreemmo.
Kuni kinchi, manna gufi'ranno gede assanno;
manna gane karanno.
Ikkollana iso amma'nannohu disaalfatanno»
yine borreessinoonni gedeeti.#Isa 8:14; 28:16 lai.
Iliyochaguliwa sasa
ROOMU SOKKA 9: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
