ROOMU SOKKA 7
7
SEERU BOROJJIMMANNI FULA
1Roduuwa'ya, konne coye diaffinoonni? Coyi'ranni noommohu Seera egenninokki manniraati. Seeru mannu aana wolqa afi'rannohu mannu lubbotenni noo geeshshaatilla. 2Coyi gedera, mine assidhino mancho ayiddaannise lubbote noo geeshsha isi ledo seerunni usurantinote. Ayiddaannise reyiro kayinni, usurinose seeriwiinni tidhantanno yaate. 3Kunnira, ayiddaannise lubbote hee'reenna wolu manchira mine assidhuro, foortinote yinannise. Ayiddaannise reyiro kayinni, isi ledo usurantino seeriwiinni tidhantanno. Woleho assidhurono foorate diyinannise. 4Roduuwa'ya, ki'ne coyino hattooho. Ki'ne Kiristoosi bisi widoonni Seeraho reyitinoonnireeti. Kunnira, Maganoho guma laallammora, reyotenni kainohura Kiristoosira fiixa ikkitinoonni. 5Mannu hedo garinni hee'noommo waro, Seeru kakkayisannoti busha yorto, reyote guma laallammora mannimmanke giddo loossanni heedhino. 6Xa kayinni usurinonke Seeriwiinni reyinohu gede ikkine baxxinoommo daafira, Seeru usuriwiinni tidhamme hee'noommo. Kunnira, xaate kunni ka'a haaro Ayyaanu heeshsho garinni, Maganoho soqqammeemmo ikkinnina, borreessinoonnihu albi budi garinni dihee'neemmo.
SEERANNA CUBBO
7Xa ma yineemmo? Seeru umisi cubbohoni? Dee'ni! Ikkollana, Muse Seeri widoonni ikka hoogoommero, cubbu maatiro bade diafeemmo. Seeru, «Yortooti!» yaa hoogoommero, yorto cubbo ikkitinota bade diafeemmo.#Kir 20:17; Mar 5:21 lai. 8Cubbu, Seeru hajajo widoonni hige, ane giddo yorto baala kakkayisate doogo afi'rino. Seeru hee'ra hoogoommero, cubbu reyinoho yaate. 9Alba ani Seera afummokkinni heeshsho afi're hee'roommo. Seeru hajajo afummo yannara kayinni cubbu wolqa afi'rino; anino reyommo. 10Heeshsho uyitanno gede hendoonniti Seeru hajajo anera reyo abbitinoe. 11Cubbuno Seeru hajajo widoonni hige so'risiisinoe; hajajosi garinni shiinoe.#Kal 3:13 lai. 12Seeru qullaawaho; hajajono qullaawate, keeraanchotenna danchate.
13Hatto yaa, kuni danchurichi anera reyo abbinoe yaateni? Dee'ni! Reyo abbinoehu cubboho. Cubbu, ewelummasi leellishate, danchurichi widoonni hige irki're anera reyo abbinoe. Kunnira, cubbu bunshe anfannihu Seeru hajajo widoonniiti.
MANNU HEESHSHO GIDDO NOO SHARRO
14Seeru ayyaanaamo coye ikkinota anfoommo. Ani kayinni maala uddi'roommo; qoleno cubbu borojjimmara hiramoommo. 15Ani asseemmore diegennoommo; baxeemmore agure, giweemmore asseemmo.#Gal 5:17 lai. 16Assate hasi'reemmokki coye asseemmoha ikkiro, Seeru dancha ikkinota leellisheemmo. 17Assate hasi'reemmokki coye assannohu, giddo'ya noo cubbooti ikkinnina ane di"ikkoommo. 18Ane giddo woy mannimma'ya heeshsho giddo horonta danchu coyi nookkita egennoommo. Dancha assate halcho nooe; dancha assate kayinni wolqa diafi'roommo. 19Assate hasi'reemmoha dancha coye diasseemmo; iso agure hasi'reemmokkiha busha coye asseemmo. 20Assate hasi'reemmokkiha busha coye asseemmoha ikkiro, konne assannohu ane giddo noo cubbooti ikkinnina ane di"ikkoommo.
21Dancha coye assate hasi'ranni hee'reenna, busha coye assa doodheemmo gede assannoehu wolu seeri noota afoommo. 22Giddoyidi mannimma'ya Maganu Seerinni hagiidhitanno. 23Ikkollana wodani'ya seeri ledo gaaramannohu, mannimma'ya widoonni cubbu seeri usuranya assannoehu wolu seeri mannimma'ya giddo noota afoommo. 24Ani hiittoo qarraataamooti! Tenne reyote massitannoe mannimmawiinni ayi gatisannoe? 25Mootichinke Yesuusi Kiristoosi widoonni Maganoho galatu iillosi!
Xa ani wodani'yanni Maganu Seerira borojjicho ikkoommo; mannimma'yanni kayinni cubbu seeri borojjichooti.
Iliyochaguliwa sasa
ROOMU SOKKA 7: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
