ROOMU SOKKA 4
4
ABIRIHAAMI AMMA'NATENNI KEERAA'MINO
1Maahoyyena, maalunni annanke ikkinohu Abirihaami ma afi'rino yineemmoyya? 2Abirihaami loosunni keeraa'minoha ikkoommero, adawadhannori noosihu baino. Maganu albaanni kayinni adawadhannore diafi'rino. 3Maganu Qaali, «Abirihaami Magano amma'ni; amma'nasino keeraanchimmate kiirantusi»#Kal 15:6; Gal 3:6 lai. yaanno. 4Loosanno manchi afi'rannohu hunkiisi gumi, isira malinosiho ikkinnina afansha di"ikkino. 5Mannu loosa hoogirono, cubbaataamma keereensanno Magano amma'niro, amma'nasi keeraanchimmate kiirantannosi. 6Daawitino Maganu loosiweello keereensannosi manchi ba'raa'rinoha ikkinota coyi'ranni,
7«Saonsa agurroonninsarinna,
cubbonsa haa'ne hoolloonninsari, ba'raadhinoreeti.
8Maganu cubbosi kiirannosikki manchi ba'raa'rinoho»#Far 32:1-2 lai. yiino.
9Kuni ba'raa'ri barcintinori callunnihonso barcintinokkirirano ikkannoho? Lamunkunniho. Hatto ikkannohuno, «Abirihaami Magano amma'ni; amma'nasino keeraanchimmate kiirantusi» yinoommo daafiraati. 10Abirihaami amma'na keeraanchimmate kiirantusihu mamooteeti? Barcimikkinniitinso barcimihu gedensaanniiti? Barcimikkinniiti. 11Gedensaanni Abirihaami barcimino; barcimasi kayinni albaanni noosi amma'nanni keeraa'minota leellishshanno malaateeti. Kunnira, Abirihaami barcintukkinni amma'nitannoriranna amma'nansa keeraanchimmate kiirantannonsarira baalaho annaho. 12Abirihaami barcintinorirano annaho; anna ikkinohuno, barcimansa callatenni ikkikkinni, isi barcimara albaanni afi'rino amma'na hoode hadhino daafiraati.
AMMA'NITINORIRA UYINOONNI HEXXO
13Maganu, Abirihaami sirchisi ledo tenne alame ragi'ranno gede hexxo uyinosihu, Seera agadhino daafira ikkikkinni amma'natenni afi'rino keeraanchimmanniiti.#Kal 17:4-6; 18:18; 22:17-18; Gal 3:29 lai. 14Hexxote ragi'raasine Seera agadhitannoha ikkiro, amma'na haafaho. Hexxono mullare ikkite gattanno yaate. 15Seeru Maganu hanqo abbanno; Seeru nookkiwa, sao diheedhanno.
16Kunnira, hexxo amma'nate aana rumuxxitinote. Tenne hexxo Abirihaami sirchi baalaho Maganu eltonni uyinoonnita ikkasera huluullo dino. Kunino Seera agadhitannorira calla ikkikkinni, Abirihaami gede amma'nitinorira baalahooti. Amma'nate widoonni Abirihaami ninke wo'munku annaati. 17Maganu Qaali giddo, «Lowo gosa anna assoommohe»#Kal 17:5 lai. yine borreessinoonni. Abirihaami, reyitinore kayisannohanna nookkiha hee'ranno gede assanno Magano amma'nino daafira, Maganu albaanni isi ninkera annankeeti.
ABIRIHAAMITA KAAJJADO AMMA'NA
18Abirihaami amma'ninohunna hawaqi'rinohu hexxinanniri mitturi nookki yannaraati. Kunnira, «Sirchikki hatto ikke bati'ranno»#Kal 15:5 lai. yinoonninte gede lowo gosa anna ikki. 19Xibbu diriha ikke noo yannara, bisisi reyino daafira ila dandaannokkitanna Saarano gaananna geercho ikkasenni ilte affannokkita afe hee'reennanni ammanasi didaafurtino. 20Amma'nasinni kaajje Maganoho ayirrinye uyino ikkinnina, ammanasi dishoshshoggitino; Maganu uyinosi hexxono dihuluullamino. 21Maganu uyino hexxo wonshannoha ikkinota seekke buuxino. 22Abirihaamira amma'na keeraanchimmate kiirantinosihu kunniraati. 23«Keeraanchimmate kiirantinosi» yaanno qaali Abirihaami callaho borreessinoonniha ikkikkinni, 24ninkerano ledooti. Mootichanke Yesuusa reyotenni kayisino Magano amma'nineemmorira ninkerano, ammananke keeraanchimmate kiirantannonke. 25Mootichinke Yesuusino, cubbinke daafira sae aamaminohonna ninkeno keereensate reyotenni kainoho.
Iliyochaguliwa sasa
ROOMU SOKKA 4: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
